Nehemiya 9

Gà mayahaba gər gà mburma ta pəl a a bakal

1 I huɗ mehinne dzik səla gəra faɗ, nda kiye ma təsəla ŋana ya ka, gà Isərayel ti yahaba gər aà mege ndəra, tə dza akaba petek buhwa, tə ndàya aba ahəɗ a gər. 2 I dəba ŋa ya, tə ndzək ba ikaba ya, nda gà na tar gà Yahuda tsiye tserdze. Tə sər ka, tàa ge bakal, tar nda gà bàba gà tsir tar dze. 3 I dəba ŋa ya asa, tə dzəba a mehitse aà mbulum dzirìkke ler makər, tə dza zləm a medzeŋge wakita məpala ahəm BATSAH kwa ŋa Mbulum tar. I huɗ gà ler makər ŋgiɗ aaha ya ka, tə dza gurmits a bəɗ aka miɗ BATSAH kwa ŋa Mbulum tar, aà mewize ahər məpəla a bakal. 4 Ika təv dzəgəɗaf ŋa ata gà gwala Lewi tə tsala aaka ya ka, gà Yesuwa, Bani Kadmiyel, Sebaniya, Buni, Serebiya. Gà Bani nda Kenani ta hitse, ta wiz mezleke, a təv BATSAH kwa ŋa Mbulum tar, nda biye ɗa ŋgələkəkka ŋa. 5 I dəba gà gwala Lewi ata ya ka, gà Yeesuwa, Kadmayel, Bani, Hasabiniya, Serebiya, Hudiya, Sebaniya nda Petahiya. Ta gwaɗa a gà mayahaba gər gà mburma. « Hitswìm a mbulum, dite kə gwìm kəkaaha a BATSAH kwa ŋa Mbulum kurum, kà ywìm ba tsa kəla pat hiywe » BATSAH kwa ŋa, ku mege weke megìk kəkaaha aɗaba kər ka, marahaŋa nda mezlibe! Kər ka, lele batsah ŋa, ika gər gà ɓəzla megìk kəkaaha tserdze, dite mezlibe ka, i təv yak ilik asa mbaŋa. 6 Kər BATSAH kwa ŋa, kər ilik! Ki ge gà gəza mbulum nda gà dukw ana iɗəm a, dite nda gà mawusawus fit. Kər na a ge gər ahəɗ nda gà dukw ana ikə̀ka tserdze ya, ki geye gà bàba gà duluv, nda gà dukw ana iɗəm a fit. Kàa vəl tar mesife fit dze, dite gà mawusawus ana aà gəza mbulum a, ta hinne a a gər a bəɗ aka miɗ yak. 7 Kər BATSAH kwa ŋa, Mbulum, kər na kà zla Abram a, kər na kà zlara ŋgat ika ahəɗ Ur a, kà da a ŋgat a Babila ya, dite na ka vəlar zləm Abəraham a. 8 Aɗaba ka le ahər ka, ŋgwal mburma nder na i təv yak a. Agəra taŋa, na kə gəs masla nda ŋgat a. Kàa mbər metsiker duwa i sida ya, kə gwaɗar ka, i ta vileke a ahəɗ gà Kananiya, ahəɗ gà Hittiya, nda gà Amuriya, gà Perizziya, gà Yebusiya, dite nda gà Girgasiya. A ŋgat, nda gà ɓəza ŋgar. Nda gà ɓəza gà ɓəza ŋgar. I dəba ŋa ya ka, kàa ge dukw ana ka tsik i sida ya, aɗaba kər ka, ŋgwal ŋa, mala ndzer. 9 Kàa ŋgat a a mesewere are gà bàba gà tsir mə̀r ana i Ezipt a ya. Kàa tsaraka mezele tar ana tə zalak aba bise aà guva duluv Awasl ata ya. 10 Kàa geye gà dukw mene a mburma ŋgiɗ pampam, nda gà dukw ana wura a sle a aà mege a tsiye, aka gər Firawna Əbay gà Ezipt, aka gər gà ɓəzla meslire ŋgar, dite aka gər gà mayahaba gər gà mburma ana tserdze ika ahəɗ ŋgar a. I dəba ŋa ya, kà sər aà magə̀la a gər ŋgar, ana a ge nda təv gà bàba gà tsir mə̀r a. Ki ge gà dukw ata ka, aà zləm yak meɗe, batsah ŋa kamala ana mbakum a. 11 Kàa sas ikaba batsah duluv yam a, ika miɗ gà bàba gà tsir mə̀r a, tàa tsala iɗəm a sifek sifek. Gà mburma ana tə zazam tar zləmana ya ka, kàa dza a tar a huɗ duluv yam. Yam aka zlala aà tar kamala kur ana, ti ye aka arah maazaw ana a zlele a nda ndzəɗa ya. 12 I fata ya, ndaapat ŋana ka, ka ndzawa tar aka miɗ nda hulɓukw ana kamala mendweŋè ya. I huɗ həvəɗ a ka, ka zazamawa tar nda hulɓukw ata a newa akwa, a patawa tar à dzaydzay ika vatwa ana ti de a dərra . 13 Kà tarəra i mbulum i gər ŋa ya, na dite ka fafəl a tar ika gər kwite Sinay ya. Ka hitse tar a gà məpala ahəm ndaka vatwa ŋa, nda gà dukw ana ŋgwal ŋa ndzer biy mezezem a ya. Nda gà məpala ahəm ana ŋgwal ŋa lele pampam a. 14 Nda ahər Musa mala meslire yak, na ka ɗif a tar à Sabba ya, pat ata ka, biy yak. Kàa vəl a a tar gà məpala ahəm nda gà dukw ana, ka hitse dər ndaka vatwa ŋa ya, nda gà dukw ana ka vəl ahər vatwa aà mege ya. 15 Aà may mawur aà tar asa tsəka, kàa vəl a tar peŋ ana a dara i Mbulum a, dite yam makə̀ɗ tar asa tsəka, ka ŋgəz a à tarəra a yam i kur a. ka tsik a tar i sida ya ka, kì vile a a tar a ahəɗ ŋgiɗ, dite i dəba ŋa ya, kə gwaɗa a tar, tə zla, mene biy kurum. 16 Ama gà bàba gà tsir mə̀r ata ka, ti ne gà ɓəzla magə̀la gər, tàa kula a gə̀zlə̀n tar, dite tàa dzar zləm a məpala ahəm yak tsa. 17 Ti niw magəsa a kər ahəm. Dukw mene a mburma ana ki gewa aɗaba tar a ka, aka məts a tar gər. tàa kula a gəzləŋ tar. I dəba ŋa ya, tə dzala ka, məmbəɗa gər aka ahəɗ Ezipt a, i təv ana tə ndza idə̀m kamala gà ɓele ya. Ama kər ka, kàa miyak a tar tsa. Aɗaba kər ka, Mbulum ana a pil a à bakal a mburma ya, kər ka, mburma a ndzeke a are tsehe, dite kər ka, ŋgwal ŋa, kər ka, kə gəsawa gəzləŋ, dite kər ka, maràhà ŋa nda mawaya ba. 18 Ku mege tàa və̀ɗ a ba sla gura, dite ka, ta gwa ahər, araha na Mbulum kwa ana a ndzəkara kwa ika ahəɗ Ezipt ya ya. Nda mege dər ŋa kataya ka, taŋa, tàa ndavayak ka, hinne. 19 Tsaatsa ka, a kər, i huɗ batsah mawaya mburma yak a ka, kàa miyak a tar i dala i kusak tsa. Hulɓukw ata kamala mendweŋe ya na a ɗewa a tar a vatwa ndaapat a, aka sərə̀k à tar a diriŋ tsa. I huɗ həvəɗ tekeɗe ka, a patawa a tar à dzaydzay aka vatwa tar ana ti de a dəra. 20 I huɗ mege ŋgwal yak a ka, kàa vəl a tar mezite yak, aà meɗife tar a duwa. Kà vəl a tarəra mana ya, kamala dukw mezime ya, dite kàa vəl a tar yam asa akahər ana yam a kiɗe a tar a. 21 I huɗ mive dzik faɗ a ka, kà zlak tar, i fata ya ka, kuɗa duwa aka ge a tar, i dala i kusak ata tsa. Gà petek tar tekeɗe ka, tàa nəsa ya tsa, dite gà sik tar tekeɗe ka, tàa slesleye aka tar tsa. 22 Kàa vəl a tar mekwere ahər, nda mayahaba gər gà mburma ŋa dze. Tàa ndzàka gà ahəɗ gà mburma ana ta mbeye a tar aaha ya. Gà ahəɗ Sihun Əbay gà Hesbun, dite ahəɗ Uk Əbay gà Basan. 23 Kàa vəl mawuba aà gà ɓəza tar nda gà ɓəza gà ɓəza tar hinne, kamala gà mawusawus ana aà gəza mbulum a. Kàa ndzək tar aka ahəɗ ana kə gwaɗa ahər ɗa a gà bàba gà tsir tar a ka, tə da aɗəm, tə zla aà mene biy tar a. 24 I fata ya ka, tàa da mede aɗəm, dite tàa zla, aka ne biy tar. Kàa dza tar gà mburma ana mandza ŋa ika ahəɗ ata ya, ahər tar, ta kwara tar, gà Kananiya, kàa dza tar a huɗ ahər tar, nda gà Əbay tar ŋa, dite nda gà mayahaba gər gà mburma tar ŋa dze. Gà tsir mə̀r tàa kwara tar kamala ana gəzləŋ tar a waya ya. 25 Tàa ndzàka gà bàba gà kwite, ana malawaraŋa nda zlagam lele ya. Gà ŋgwal gà ahəɗ ana a ge a duwa lele ya. Gà ŋgwal gà ga ana marahaya ŋa nda gà ŋgwal gà duwa fit dze ya asa mbaŋa. Tàa ndzaka gà suwàh ana tàa mbər meleye aba ya asa. gà guvah gà viŋye, nda gà guvah uliviye, dite nda gà dizl ana mawa ŋa hinne tə zəmawa ya. Agəra batsah ŋgwal yak ata ki ge a tar a, na tə zəm gà dukw ata kamala ana gəzləŋ tar a waya ya. Tə zəmaya, a sleye tar, tàa gala dər ba. Tàa ndza nda maŋgayaba, kuɗa duwa aka ge tar tsa. 26 Tsaatsa ka, gà bàba gà tsir mə̀r ata tàa gəs à kər ahəm tsa, dite tàa tsalaba aà sègèmè a gər, aka gər yak, tàa mbəɗ dəba a məpala ahəm yak, tàa bats gà ɓəzla məmà à guma yak ana ti tsikawa a tar bazlam məmbəɗara gər a təv yak a. Aɗaba taŋa tàa ndavayak hinne asa mbaŋa. 27 I fata ya ka, kàa dzə tar ahər gà ɓəzla mene are tar, tàa bats tar, i təv ana tar a riŋ ti sèwère are ya ka, tàa tuwak aaha aba, dite kər tekeɗe, kàa tsaraka tar dərra daga ara i mbulum i gər ŋa ya. I huɗ batsah mawaya ba yak a, kàa slər tarəra gà ɓəzla mebeye a tar a, tàa beye a tar, ihər gà ɓəzla mene are tar a. 28 Ama i təv ana ta ŋgat medze zayzay ya ka, ta mbəɗ gər aka mege dukw ana ŋgwal ŋa tsiye nda təv yak. Aɗaba taŋa na ka miyak a tar ahər gà ɓəzla mene are tar, ta bats tar asa ya, na dite ta mbəɗ gər aka matawakaha aba asa ya. I fata ya ka, kər kàa tsaraka tar dərra daga ara i mbulum i gər ŋa ya, i huɗ mendze are tsehe yak ka, kàa beye a tar ihər gà ɓəzla mene are tar a, sik diŋdiŋ. 29 Kàa hama a tar aà ta mà aka magəsa ahəm aà məpala ahəm yak asa. Ama i huɗ magə̀la a gər tar a ka, tàa dze zləm a məpala ahəm yak ata tsa. tàa niw magəsa ahəm a dukw ana ka hitse dər a. Tsaatsa ka, a vile a mandza a bəra a gà na ta gəs ahər ahəm a, ta waya matsaraka ŋa tsidze, ta kula a gəzləŋ tar. Ti niw màdzak aaka zləm. 30 I təv ana kurum dze ya ka, kà pàt a tar dər, meme na kə gəs a gəzləŋ i huɗ gà mive ata ya. Kàa dzaya mesife yak aba a gà ɓəzla məma guma ana ta mawa a guma yak a. Ama ka, tàa dzar zləm tsa, i dəba ŋa ya, kàa miyak a tar, ahər gà mayahaba gər gà mburma ana ti ne gà mbəlakw a. 31 Ama i huɗ batsah mawaya ba yak a ka, kàa bats tar tsa, kàa miyak a tar ɓav tsa. Aɗaba kər ka, Mbulum ana maraha ŋa nda mawaya mburma, dite ka, ki pile a à bakal a. 32 Dite kinehe ka, Mbulum mə̀r, Mbulum ana batsah ŋa ya, mala ndzəɗa, dite ŋgat ana biy meger magəɗa ya. Kər ihər ki kèsle a masla ana kə gəs nda mə̀r a, ndaka vatwa ŋa lele. Kinehe ka, tike mesewere are ana a le a mə̀r aà ahər. Daga a gər mendze gà Əbay gà Assiriya ya, tsikw a mendze mə̀r ana mbakum a. Mər tserdze ka, maa sewèrère are, mə̀r ŋa, gà Əbay mə̀r, nda gà bàba ŋana ika miɗ mə̀r a. Gà ɓəzla məbatsa duwa a Mbulum ana ika magər mə̀r a, nda gà ɓəzla məma à guma Mbulum mə̀r, gà bàba gà tsir mə̀r, dite nda gà mayahaba gər gà mburma yak fit tserdze. 33 Ama i huɗ dukw ana a le a mə̀r fit tsedze ya ka, ki ge ka, nda ndzer ŋa, ndaka vatwa ŋa. Ama mə̀r ka, maa ge dukw ana ŋgwal ŋa tsiye. 34 I fata ya ka, gà Əbay mə̀r, nda gà bàba ŋana ika magər mə̀r a, nda gà ɓəzla məbatsa duwa a Mbulum mə̀r, dite nda gà bàba gà tsir mə̀r ka, tàa gəs ahəm aà məpala ahəm yak tsa. Tàa ge metsehe a məpala ahəm yak tsa, nda gà asiŋ gà metsehe ana ka tsikawa a tar a. 35 Akahər ana tar mandza ŋa i mekwere tar, nda ŋgwal gà dukw ana kà vəl a tar a tserdze, ika batsah ahəɗ ata a ge a duwa lele ya. I təv ana kà da aɗəm a tar a, tàa gik megemir kwizikw tsidze. Tàa mbəɗ dəba a mege dukw tar ana ta gewa ŋgwal ŋa tsiye tsa. 36 Araha mbakum mə̀r ka, gà ɓele! Mər mandza ŋa ka, ika ahəɗ ana, ka vəl a gà bàba gà tsir mə̀r, aà ta ŋgat nùba biy dukw ana a gewa ba ika ahəɗ ata ŋgwal ŋa ya. 37 Gà dukw ana ta gewa ba ŋgwal ŋa hinne ya ka, biy gà Əbay ana kà dza tar mə̀r ahər tar, agəra dukw bakal mə̀r a. Ta kwere a mə̀r nda gà dukw gənaw mə̀r kamala ana a sasa tar a. I fata ya ka, mə̀r mandza ŋa ka, i mesewere are.