Nehemiya 8

Medzeŋgè məpala ahəm Mbulum a mayahaba gər mburma tserdze

1 I fata ya ka, gà mburma tserdze, ti yahàbà gər kamala na mburma ilik a, aka varavada ana a mbe aka biye hərmaga yam a. Dite gà Isərayel ta wiz aà mala məbatsa duwa a Mbulum Ezra, ana ŋgat a sər duwa aka gər məpala ahəm Mbulum a. Mà zla wakita məpala ahəm Mbulum. BATSAH kwa ŋa a vəl wakita ata a mayahaba gər gà Isərayel ka, nda ahər Musa. 2 I fata ya ka, Ezra a zlara wakita ata aka miɗ mayahaba gər gà mburma ya. Gà mburma ana a riŋ i fata ya ka, gà asləka nda gà məkəs, nda gà ɓəza ana ti sle medze zləm aà guma ide ya tserdze. Taŋa a ge ba ka, i malahalah pat ana i huɗ kiye ma təsəla ŋana ya. 3 I fata ya ka, Ezra a hitse aka varavada ata ser a mbe aka biye hərmaga yam a. Daga, a gər pat ana a mbəzara ya, tsikw a magər pat, ar aà medzeŋge wakita məpala ahəm ata ika miɗ gà mburma. Gà məkəs nda gà ɓəza ana mandza zləm a guma ide ya tserdze. Gà mayahaba gər gà mburma ata tə dzar zləm lele. 4 Kamala taŋa ya, Ezra a hitse dzeŋ, aka təv dzəgəɗaf ŋa ata, ta ge nda dizl salakka aà megemir ata ya. Gà mburma ana ika tseke ahər mezime ŋgar a ka, gà Matatiya, Sema, Anaya, Uriya, Helkiya, nda Masaya. Gà na ndaka tseke ahər gula ŋgar a ka, gà Pedaya, Misayel, Malkiya, Hasum, Has-badana, Zakariya nda Mesulam. 5 I fata ya ka, Ezra a riŋ mehitsèŋa ika təv dzəgəɗaf ŋa ata, ika gər mayahaba gər gà mburma ya. Ku mege weke tserdze a sle a aà meŋgetere lele. I təv ana a hindike a ikaba wakita ata ya ka, gà mayahaba gər gà mburma tserdze tə dzəba a mehitse a mbulum. 6 I fata ya ka, Ezra a dzəba aà mege kəkaaha, a BATSAH kwa ŋa Mbulum ana batsah ŋa ya, dite gà mburma tserdze ta ŋgamar aaka nda madzə̀ka ahər a mbulum. « Haya, haya mege ba kamala taŋa ya! I dəba ŋa ya gà Isərayel tə dza gurmits a biye nda metike yemere tar aka ahəɗ aka miɗ BATSAH kwa ŋa. 7 I dəba ŋa ya ka, ta hitse aà mbulum, gà gwala Lewi nda gà Yeesuwa, Bani, Serebiya, Yamin, Akub, Sabitay, Hudiya, Masaya, Kelita, Azariya, Yuzabad, Hanan, nda Pelaya tə dzəba aà medzeŋge tar məpala ahəm Mbulum. 8 I dəba ŋa ya, ti dzeŋge terwihhwe lele i huɗ wakita məpala ahəm Mbulum a. Dite ta mawa tar dərra iɗəm a à wur bazlam ŋa ya, na dite ka, ku mege weke a tsereke a dukw ana ti dzeŋge ya ya. 9 I təv ana tə tsaraka gà bazlam ana, i huɗ wakita məpala ahəm ata ya ka, gà mayahaba gər gà mburma ata tserdze ya, tə dzəba aà tuwa, aɗaba taŋa na Nehemiya, mala makwara ahəɗ, nda mala məbatsa duwa a Mbulum Ezra, ŋgat ana mala masəra mesìnìk a à wakita mə̀palà ahəm ata ya, tar nda gà gwala Lewi, na ta mawara iɗəm a wur bazlam ana ti tsik a gà mburma tserdze ya » Pat aaha mbakum a ka, tsəɗaŋŋa biy BATSAH kwa ŋa Mbulum kurum, ahər aaha ka, biy mandza nda matsəɓatsəɓ, nda gà tuwa tsa . » 10 I fata ya ka, Ezra a gwaɗa a tar aaka asa: « Deywìm a gà ma kurum, kà deywìm gà ŋgwal gà dukw mezime. Seywìm ka, guzum ana a ndza himme ya. Sasayumaha ɗaf a gà na tàa deye duwa i gà ma tar tsiye. Haya kaɗəŋ pat aaha mbakum a ka, biy BATSAH kwa ŋa. Ka ndzum nda gà matsəɓatsəɓ tsa, maŋgayaba aaha a dara i təv BATSAH kwa ŋa ya ka, taŋa na a ne ndzəɗa kurum a. 11 I dəba ŋa ya, gà gwala Lewi ta vəl magəsa gəzləŋ a mayahaba gər gà mburma, nda magwaɗa tar: « Ndzum ɗikɗik a tuwa ya! Aɗaba pat aaha mbakum a ka, biy Mbulum. Kà ndzum nda matsəɓatsəɓ ŋa tsa! » 12 I fata ya ka, gà mayahaba gər gà mburma tserdze, tə daya a gà ma tar, aà mazəmaya gà dukw mezime, nda masaya gà dukw mese. Tə sasayaha ɗaf a gà na tàa deye duwa i gà ma tar tsiye. Dite ta ge batsah megirive. Aɗaba tàa mbər metsereke gà bazlam ana gà gwala Lewi ti dzeŋge a tar a.

Megirive mekiriweye gà ga

13 Aà mehinne sula ŋana ka, gà Əbay ana i gwala gà Isərayel a tserdze, gà ɓəzla məbatsa duwa a Mbulum, gà gwala Lewi, tə yahaba gər a təv Ezra ana ŋgat, a sər duwa lele, aka gər məpala ahəm a. Ta waya matsaraka mesìnìke a dukw ŋgar ana i wakita məpala ahəm a. 14 I huɗ wakita məpala ahəm ata, BATSAH kwa ŋa a vəl a tar nda ahər Musa ya ka, ti le à aɗəm aà məpala ahəm aaha. Gà Isərayel ti ndze a ka, say i huɗ mekiriwe gà ga, na akahər megirive mekiriweye gà ga ya, na nda kiye ma təsəla ŋa ya. 15 I təv ana tə tsaraka bazlam ata ya ka, ti neye bazlam ata a gà mburma ana mandza ŋa, i gà kwite tar, nda gà na tar mandzàya ŋa i Yeruzalem a fit tserdze. Tsalum a gər kwite, kà sasayumara gà ahər dizl uliviye ana i dala ya, kige tsa nda gà na i guvah a, gà ahər dizl ɗaf ana tə zalar Mirt a, gà ahər gà təɓah, gà ahər dizl ɗaf ana slambah aà tar devilville lele ya. Dite ki kiriweywim a dər gà ga. Kamala ana a riŋ mewetse ŋa i wakita məpala ahəm a. 16 I dəba ŋa ya, gà Isərayel tə da a kwite aà masasa ya, gà ahər gà dizl ɗaf, ta kiriwe a dər gà ga, aka gər gà ga tar. Kige tsa aka gà varavada ana ika gà biye hərmaga tar a. Kige tsa aka gà varavada ana a lawara ga mbulum batsah ŋa ata ya, aka gà təv ana ika biye hərmaga yam a. Dite aka təv ana a mbe aka tseke biye hərmaga Efərayim a. 17 Gà mburma ana ti yahaba gər tserdze a fata ya ka, gà na ta mara i kwite medwiŋè ya, ta kiriweye gà ga aà mendze iɗəm. Taŋa ka, batsah megirive ana ta ge nda maŋgayaba ŋa hinne ya. Nda ndzer ka, gà Isərayel tàa ge medzibe megirive ata ilik tsa, a gər mendze Yesuwa kəla Nun a ya. 18 Kəla wur gà pat megirive ka, daga aà malahalah ŋa ya, haa mandəvandəv ŋa. Misle ŋgiɗ ilik a dzeŋge təv medzeŋgè ana i huɗ wakita məpala ahəm Mbulum a, nda ŋgəlakəkka. Megirive ata a ndza ka, mehinne təsəla. I huɗ mehinne ma tsamakər ŋana megirive ata a ndəv a ka, ta ge batsah megirive, biy mandə̀va à megirive mekiriweye gà ga ata, kamala ana məpala ahəm a hitse dər a.