Madzəba 35

Mbulum a pise ahəm a Zakup i Betel

1 Aləka i dəba ŋa ya ka, Mbulum a gwaɗa a Zakup: « Mah ba i faha ya, ka da a kwite Betel, ka ndza riŋ i fata. Dite kà zlazl təv məbatsa dukw ana ki betsewa aaka a aɗaba iye Mbulum ana i pàtàk aba akahər ana kà val à damər yak Isuwa ya ya.»ppp 2 I dəba ŋa ya, Zakup a gwaɗa a gà mburma ana i ma ŋgar a, nda gà asiŋ gà mburma ana mandza ŋa i təv ŋgar a tsèrdze: « Ndzakumara gà fəla gà mburma ana kà ndzakayumara ika ahəɗ ŋgiɗ a ya, kà Dzawa dər a biye. Kà làmbaɗayum gà ba kurum, kà dzàyum akaba gà petek ana gà məbara ŋa lele ya. 3 Dite kà hadzalum ba, ka tàkwa a kwite Betel. Kàa ndzekwaha a fata ka, i zlezle a təv ana i batsawa aaka duwa aɗaba Mbulum ana a zlak iye akahər ana iye i mesewere are ya. ŋgat a kaslawa iye ku mege i ŋga, a gà təv ana i dawa aɗəm a tserdze.» 4 Gà mburma ata tə tsaraka kataya ka, tə ndzakayara gà fəla ana tə daya dərra ika ahəɗ ŋgiɗ a, a riŋ aà tar i gà ahər tar a, nda gà matsərəɗ gura ana i gà zləm tar a fit, tə dzàɗa a Zakup. Dite Zakup a ta mele a biye aà huɗ dizl ɗaf duwa batsah ŋa aà guva kwite Sehem. 5 Aləka i təv ana ta meh a ba i fata ya ka, magəɗa Mbulum a dara aka gər gà na i gà kwite ata ti le a tar tits a tserdze. A ge dər kataya ka, tàa duŋ tar asa tsa. 6 Aləka gà Zakup nda gà mburma ŋgar ti ndze a kwite duwa, tə zalar Luz ika ahəɗ Kanan. Taŋa ka, kwite ana tə zalar Betel ya kuɗa. 7 I fata ka, a zlazl təv məbatsa duwa a Mbulum, dite a dza ba aà mazàmbaɗa à zləm Mbulum i Betel i fata, aɗaba Mbulum a patar aba ka, i fata akahər ana a val aà damər ŋgar Isuwa ya ya. 8 I dəba ŋa ya ka, məkəs ana tə zalar Debura, a gewa gər a Rebeke nda kəla ŋa ya, a mət. Ti le ŋgat aà guva kwite Betel, aà huɗ dizl ɗaf duwa ndzəɗa ŋa hinne. Tə zalawa a dizl ɗaf ata ka, dizl ɗaf tuwa. 9 Aka na Zakup a mara i Mezapitamiya a ka, Mbulum aka patar aba asa, a piser ahəm. 10 Mbulum a gwaɗar: « Zləm yak kinehe ka, Zakup. Ama mba ka, ti zelek a Zakup asa tsa, zləm yak ti ta zelek a ka, Isərayel.» I fata ya tsara ka, a zalar Isərayel.qqq 11 Dite i dəba ŋa ya, Mbulum a gwaɗar asa: « Iye ka, Mbulum ana ndzəɗa ŋa, i slewa aà duwa tserdze ya. Gà ɓəza yak ta wuba hinne, tə̀ səkah aaka. Dite gà misle ŋgiɗ i liwiŋ gà ɓəza yak a, ti ta ge a gà Əbay ŋa. Aɗaba gà ɓəza yak ta we a ba ka, hinne, ti ne a gà slàla ŋgiɗ pampam. 12 Ahəɗ aaha i vəl a gà Abəraham nda Izak a ka, i ta vile a gà ɓəza yak mbaŋa, a ne a biy tar.»rrr

13 Dite i dəba ŋa ya, Mbulum a da à ŋgat a. 14 I fata ya tsara, i təv ata ta fèfil a ya ka, Zakup a hitse a kùr ana a dzalawa aaka gà gər a, a təv ata. A daha, a tə̀f meɗwìtsè mawà dukw ana a vəl biy taf aɗaba Mbulum a, a paslar, dite a tə̀f mal, a dza aaka mbaŋa asa. 15 Zakup a zal a təv ata ka, Betel.sss

Məməta Rasel ana a mət a

16 I dəba ŋa ya, ta mah ba i kwite Betel ya, tə da. Aləka i təv ana a ze a taraha hinne asa tsa na ti ndze a a kwite Efrat a ka, mawà kəla a dza ba aà Rasel, a wiŋa. Ama mawà kəla ŋgar ata a wa ya ka, nda mawura ba ŋa hinne. 17 I təv mawa kəla ŋgar ata a wurar ba hinne ya ka, mala mazla kəla ata a zla ihər a, a gwaɗar: « Magəɗa ma gek tsa, aɗaba ŋgat tekeɗe, asləka ŋa mbaŋa.» 18 Aləka i təv ana Rasel a samata, mesife ŋgar aka aà mendìve, à mite a ya ka, a zal a kəla ata Benuni. Ama tsir ŋa a zalar ka, Benyamin. 19 Məməta Rasel məkəs Zakup ata a mət a ka, ti le ika vatwa kwite Efrat i fata. Ama mbakum tə zal a təv ata ka, Betelehem. 20 Aləka ti le à ba ya ka, Zakup a zla kur, a hitse dər aka dive ŋa, taŋa ka, kur ana ika dive Rasel tə dzalawa aaka gà gər haa kinehe ya.

21 I dəba ŋa ya, Zakup aaha tə zalar Isərayel a, a mah ba i fata ya, a də̀ɗaba aka vatwa ŋgar ana a de a ya. A ndze a təv duwa ka, a hitse aà mekiriwe ga petek aka lìdè ga duwa zubul ŋa, tə zalawar Eder. 22 Akahər ana Isərayel a riŋ mandza ŋa ika ahəɗ ata ya ka, Ruben a daha, ta həna nda Bilha mala meslire Rasel ana a ne məkəs tsir ŋgar Zakup ya. Ama Zakup ka, a tsaraka bazlam ŋa ka, a tsəɓar hinne.

Gà ɓəza Zakup

Taŋa gà ɓəza Zakup ka, kura gəra sula.ttt 23 Gà ɓəza Leya ana a wa ya ka, Ruben na maləkwara kəla Zakup ya. Dite gà Simeyun nda Levi, nda gà Yuda, dite asa ka, nda gà Iskar nda Zabulun. 24 Gà ɓəza Rasel ka, tar sula, gà Yasufa nda Benyamin. 25 Dite gà ɓəza Bilha mala meslire Rasel ka, gà Dan nda Naftali. 26 Gà ɓəza gà Dzilpa mala meslire Leya ka, gà Gad nda Eser. Gà tar ata tserdze ya ka, gà ɓəza Zakup ana a wayara tar ika ahəɗ Mezapitamiya a ya.

Məməta Izak ana a mət a

27 Aləka i dəba ŋa ya, Zakup a ndze a təv tsir ŋgar Izak a kwite ata tə zalar Mamə̀r a, aà guva kwite Kiriyat-Arba, a təv ata tə zalawar Hevrun a. I fata na gà Abəraham nda Izak tə ndzawa piŋŋe ya.uuu 28 Ama mendze Izak ana a ndza aà bəra ya ka, mivè dərməka nda dzik tsamakər (180), 29 na dite a mət a. A mət ka, kamala gà tsir ŋgar ana ta mata ya, aka ge màndawal herem herem, aka ndza aà bəra ka, hinne. Dite gà ɓəza ŋgar gà Isuwa nda Zakup na ti le ŋgat a.