Madzəba 34

Gà mburma ana i fata ya ta gəs Dina

1 Aləka, i dəba ŋa ya ka, Dina dəm ana Leya a war a Zakup ya, a dara i ga ya aà məfə̀rà aka gà məkəs ana ika ahəɗ ata ya. 2 Tsam ka, wele duwa tə zalar Sehem kəla Hamur gà Hivviya, Əbay ana ika ahəɗ ata ya, a ŋgat a dəm ata. A daha, a gəs aà daala. A daha ka, a ndaɗa aka ŋgat hwarwa hinne, aɗaba ana a həna nda ŋgat tsara ya. 3 Wele ata ka, a vəl mesife ŋgar kweleŋ aɗaba Dina dəm Zakup, a waya dəm ata hinne, na dite a yaha vatwa aà məmàraha à arəv a. 4 Wele ata tə zalar Sehem a, a daha, a fàfəl a tsir ŋgar tsara, a gwaɗar: « Kamkam tsir gà, zliŋ daala ata te.» 5 Aləka Zakup a tsaraka tàa gəs dəm ŋgar Dina ka, a ndzaba tìytìy tə̀ma, aɗaba ana gà ɓəza ŋgar ta riŋ i ma tsa, tar i dala, ta kiv a gà duwa ya. A vava tar haa ta màra dzekwiŋ. 6 Ama Hamur tsir Sehem aaha ka, a da a təv Zakup aà mifefile akaba agəra dəm ata zləmana. 7 A ta medeha ka, tits a təv ana gà ɓəza Zakup ta màra a ma i dala i makəva gà duwa ya ya. Gà ɓəza aaha tə tsaraka kataya tsara ka, ta ge arəv, a tsəɓ a tar hinne, aɗaba Sehem a ge ka, dukw ana ŋgwala tsiye, nda təv gà Isərayel, agəra ana ta həna nda dəm Zakup ya. Medzìbe dukw ŋgar ata a ge ya ka, biy mege tsa. 8 Hamur a fàfəl a gà ɓəza ata, a gwaɗa a tar: « Sehem kəla ga ka, a waya dəm kurum ata hinne. Kamkam, vəlumar te. 9 Kinehe ka, gawakwaba nda gà kurum, dzàyum a mə̀r gà dəm kurum, dite kà ndzakum gà biy mə̀r mbaŋa te. 10 Kurum ka, ndzum aba a təv ana a sàs a kurum a tserdze, Ka dzawum aba à gà dukw kurum lele. I sese a kurum a ahəɗ ana a ne a biy kurum a mbaŋa.» 11 I dəba ŋa ya, Sehem a gwaɗa a tsir ŋa, nda gà damər Dina tserdze: « Kamkam, vilwimiŋ vatwa, dite i ŋgat ŋgwal ŋa ndaka miɗ kurum te. Tsikwimiŋ dukw ana a sàs a kurum a fit, i vile a kurumiŋa. 12 Tsikwimiŋ dukw ana i vile a kurum a ya kinehe, i vile a kurum a kalkal kamala ana kàa tsikwim a. Vilwimiŋ dəm kurum aaha aà daala.

13 Gà ɓəza Zakup ta gwaɗar aaka, a gà Sehem nda tsir ŋgar nda wirwir, aɗaba ana ta gəs damər tar Dina ya. 14 Ta gwaɗa a tar: « Mì sle aà mivile damər mə̀r a wur ana masasa ŋa tsiye tsa. Taŋa ka, a ne dukw hwarwa na ika gər mə̀r a. 15 Mìi vile a kurum a tsa, say na kàa nwim kamala mə̀r a dzekwiŋ tsəka, a ge a ba tsa, say kurum gà asləka ŋana sasayum ba kurum tserdze. 16 Na dite ka, mìi dzeye a kurum a gà dəm mə̀r, dite mə̀r tekeɗe ka, mìi ndzek a gà dəm kurum, ki ndzekwe a a təv ilik ŋa, ki nekwe a gà gwala ŋa ilik a. 17 Ama na ki giswim a dukw ana mì tsik a kurum a, dite ki seseywim a ba tsa asa ka, mìi ne a à kurum a dəm mə̀r a, mìi diŋa.»

18 Gà Hamur nda kəla ŋgar Sehem tə tsaraka bazlam tar ata ka, a da a tar a gər hinne. 19 Ama wele ata ka, aka niw dukw ana ti tsiker a tsa, aɗaba ana a ŋgeye a ba agəra dəm Zakup ya. ŋgat ka, batsah ŋana ika miɗ gà mburma ana i ga i bəra tsir ŋgar a tserdze. 20 I fata ya tsara ka, gà Hamur nda kəla ŋgar Sehem tə da a təv mayahaba gər mburma ana ika biye hərmaga kwite ata ya. Tə daha, ti tsik a gà asləka ŋana i kwite tar a tserdze. Ta gwaɗa a tar: 21 « Gà mburma aaha tə dara i təv a ya ka, tàa gawba nda gà kwa, maa sər ba. Vəlakwa a tar vatwa, tə ndza ika ahəɗ kwa, tə dzawuwa à gà dukw tar ɗa i faha. Aɗaba ahəɗ kwa ka, hinne, a slekwe a aà mendze iɗəm nda gà tar tserdze. Ndzakayakwa gà dəm tar, dite kwa tekeɗe, ki dzèyekwe a ter a gà dəm kwa mbaŋa te. 22 Ama na ki ndzekwe a i təv ilik ŋa ka, ta gekwe a dukw ana a sàs a kwa ya, na dite ki nekwe a gà gwala ŋa ilik a, say kwa ana gà asləka ŋa ya tserdze ki sesekwe a ba kamala tar ana gà masasa ŋa ya. 23 Na kàa gekwa dər kataya ka, gà dukw gənaw tar ana ta kiv a ya, nda gà limana tar ana ta ŋgat pampam a tserdze a ne a biy kwa. Kinehe ka, say gekwa a tar dukw ana a sàs a tar a, na dite ki ndzekwe a i təv ilik ŋa ya.

24 I dəba ŋa ya, gà mburma ata gà mayahaba gər ŋa aà guva biye hərmaga kwite ata ya tserdze, tə tsaraka bazlam gà Hamur ata nda kəla ŋgar Sehem a ka, gà asləka ŋana i fata tserdze ya tə sasaya ba. 25 Ama i huɗ mehinne makər a ka, gà asləka ata tserdze mahənaya ŋa, gà ŋgwala tsa. I fata ya ka, gà Simeyun nda Levi ta mah ba, tə da, tə ndzək gà masalama tar, tə da a batsah kwite ata. Tə daha ka, ta bats dər gà mburma ana gà asləka ŋa i fata ya fit dze. 26 Ku gà Hamur nda kəla ŋgar Sehem tekeɗe, ta bats tar nda masalama ata mbaŋa. Na dite tə daha, ta màra à damər tar Dina i ga i bəra Sehem a, tə da dərra a ma ya ya. 27 Aləka i dəba ŋa ya, gà asiŋ gà ɓəza Zakup aaha tə da a kwite ata ta bats iɗəm mburma ya ya asa. Tə daha, ti yaha gà dukw ana iɗəm a, aɗaba ana ta gəs damər tar a. 28 Ta gasara iɗəm gà təmaŋ nda gà sla ya, nda gà hezweŋe ya, ndà gà dukw ana i huɗ kwite ata ya pampam, nda gà dukw ana i gà guvah a fit, ta pala ya, dite tə ndzakaya ba. 29 Tə da à dukw ata fit, dite ta gasara iɗəm gà ɓəza nda gà məkəs a, nda gà dukw ana i gà ga ya fit, tə ndzakaya.

30 Aləka i dəba ŋa ya ka, Zakup a gwaɗa a gà Simeyun nda Levi: « Kurum ka, kàa zlum aka ìyera mewìsè gər a. Kinehe gà mburma ana ika ahəɗ aaha ya, gà Kananiya, nda gà Perizziya tserdze ka, ti niŋ are. Dite iye riŋ ka, nda gà mburma ndaw tsa asa ana, meme? Dite aləka ka, ti yehebe a aà iye a gər, ti dzeye a à gà ga gà fit ana, meme?» 31 Gà Simeyun nda Levi ta gwaɗar aaka: « Mì waya na wura a a ne a damər mə̀r kamala məkəs ana muva ŋa ya tsa.»