Gà Zakup nda Isuwa tə lə̀ma
33
1 Aləka i dəba ŋa ya, Zakup a samata ka, aka ŋgataha a gà Isuwa, tar riŋ ti dehe a nda gà mburma ŋgar hinne, ti sle dərməka faɗ. Tsam ka, a ndzaka ikaba gà ɓəza ŋgar a, gà Leya nda gà biy ŋgar, gà Rasel nda biy ŋgar, dite gà ɓəzla meslire tar aaha sula ya nda gà ɓəza tar mbaŋa. 2 A lah mehitse aà gà ɓəzla meslire aaha nda gà ɓəza tar a aka miɗ, dite a mbetereha à gà Leya nda gà ɓəza ŋgar aà dəba ya, gà Rasel nda Yasufa ibam, ta mbeha a gà Leya mbaŋa. 3 Ama Zakup ŋa ka, a ndza a tar aka miɗ. A dza gurmits a bəɗ medzige təsəla, na dite a sìrìkaha a təv Isuwa damər ŋgar tì lìm a ya. 4 Ama Isuwa ka, a mbàra aba ya tsəma tsara, tə lə̀ma akaba. Tsam ka, ə̀ŋgəts a gəs aàba Zakup i ɗa ya, ti ndzìwìɗ aba ahəm sula məma, dite tə dza ba aà tuwa. 5 Aləka i dəba ŋa ya, Isuwa a fə̀r ikaba ya ka, a ŋgat a gà məkəs aaha nda gà ɓəza tar a ka, a tsam aà Zakup, a gwaɗar: « Gà naha i təv yak ana, gà weke, damər ga?» Zakup a gwaɗar aaka: « Naha ka, gà ɓəza ana Əbay Mbulum a dzeɗiŋ a.» 6 Dite gà ɓəzla meslire aaha ti sìrìkaha a təv ŋgar, tə daha, tə dza gurmits a bəɗ aka miɗ ŋgar. 7 I dəba ŋa ya, gà Leya nda gà ɓəza ŋgar tekeɗe, ti sìrìkaha a təv ŋgar mbaŋa, tə daha, tə dza gurmits a bəɗ. Gà Rasel nda kəla ŋgar Yasufa ibam, ti sìrìkaha a təv ŋgar, tə daha, tə dza gurmits a bəɗ aka miɗ ŋgar asa mbaŋa. 8 Isuwa a samata kataya ka, a tsam aà Zakup asa, a gwaɗar: « Kà waya là na naha kà dara nda gà dukw aaha hinne ŋa aaha kà lə̀məma dər dze ya?» Zakup a gwaɗar aaka: « I ge dər kataya ka, dite i ŋgat ŋgwal ŋa ika miɗ yak batsah ga ŋa ya.» 9 Isuwa a tsaraka kataya ka, a gwaɗar: « damər gà, dukw gà ka, a riŋ hinne, kuɗa duwa a giŋ a tsa, mà à gà dukw yak.»10 Zakup a gwaɗar: « Awaŋ, kataya tsa, na Yàa ŋgat ŋgwal ŋa ika miɗ yak a kamala naha ya ka, kamkam gəs aà iye dukw taf aaha i vəlakara i ahər gà ya te. Aɗaba i fə̀r ka, kamala iye ika miɗ Mbulum agəra ana kà waya iye lele ya. 11 Kamkam damər gà, gəs aà iye dukw mipise ahəm aaha Mbulum a zlakara ya te, aɗaba Mbulum na a pisiŋ aaka ahəm a, kuɗa duwa a riŋ a giŋ a tsidze.» A hamar dər hinne na dite Isuwa a gəs ahər gà dukw ata ya. 12 Dite I dəba ŋa ya, Isuwa a gwaɗa a tar: « Hadzalakwa ba, kà tàkwa. Aɗaba iye seyiŋ ivaɗ na à leha kurum a aka miɗ a.»
13 Zakup a gwaɗar: « Batsah ga ŋa, kər kà sər gà ɓəza aaha ka, ndzəɗa tar a riŋ aà mede tsa, dite iye nda gà təmaŋ nda gà ɓəza gà sla ana, ti seye a awah mba ya asa mbaŋa. Na Yàa sle tar za aà mede i huɗ miveke ilik a kataya ka, gà dukw ana i kiv a ya fit, ta metiŋa.» 14 « Kamala taŋa ya», a gwaɗar, « batsah ga ŋa, kər ka, lah aka miɗ a ɓele yak ivaɗ. Iye ka, i dehe a zèyezèye nda metsehe gà kamala ana gà dukw gənaw gà aaha ika miɗ gà ti de a ya, dite kamala ana gà ɓəza gà ti de a ya mbaŋa, haa a ndzeha a təv yak a kwite Seyir.» 15 Isuwa a gwaɗar: « Say i miyek a à gà asiŋ gà mburma gà a təv yak.» Zakup a gwaɗar aaka: « Agəra là dze ya na ki miyekiŋ a à gà asiŋ gà mburma yak a? Iye ka, na Yàa ŋgat ŋgwal ŋa ika miɗ yak kamala taŋa ya tsam ka, biy gà ide.»
16 A pat ata ka, Isuwa a mbəɗ gər aka vatwa ŋgar ana a da dərra ya, a daha a kwite Seyir. 17 Ama Zakup ka, ŋgat a mah ba, a da a təv duwa tə zalar Sukkut. A ndzeha a fata ka, a ge ga mehinne ŋgar, dite a geye gà mekiriwe gà ga, aɗaba gà dukw gənaw ŋgar mbaŋa. Aɗaba taŋa na a zal a təv ata ka, Sukkut a, kamala megweɗe ya ka, mekiriwe ga.
18 Mimè Zakup ata a màra i Mezapitamiya a ka, a ndze a kwite Sehem zay lele aka ahəɗ Kanan. A ndzeha a fata ka, a ndza aà guva kwite ata. 19 Dite a səkəm guvah duwa aà gà ɓəza Hamur ana ŋgat tsir Sehem a. A səkəm ka, nda kur siŋgwe dərməka, na dite a hitse aɗəm à mekiriwe ga petek ŋgar a fata ya.ooo 20 Dite a zlazl təv ana ta bets aaka a duwa a Mbulum masakəŋa ya mbaŋa. A zal a təv ata ka, Mbulum fəla gà Isərayel ana tə zazamawa ya.