32
1 I dəba ŋa ya, Zakup a mbaɗa nda Mbulum ana Izak tsir ŋgar a gəsawa ahər ahəm a.
Zakup a hadzal ba aà melime nda Isuwa damər ŋgar
2 Aləka i dəba ŋa ya, Zakup a mah ba, a dəɗ aka vatwa. I təv ana a de ya ka, tə lə̀ma nda gà gawla Mbulum. 3 A ŋgat a tar ka, a gwa: « Naha ka, təv mege guvəl Mbulum.» A zal a təv ata ka, Mahanayim. 4 Zakup a slər gà ɓəzla meslire ŋgar aka miɗ a təv damər ŋgar Isuwa a kwite Seyir, aka ahəɗ Edum. 5 A gwaɗa a tar: « Araha na dukw ana ki gweɗwim a a Isuwa batsah ga ŋa ya, ki gweɗwimer a ka, ɓele yak Zakup a gwɗak ka, Yàa ndza i bəra Laban hinne, haa kinehe iye mandza ŋa i fata. 6 Yàa ŋgat duwa hinne, gà sla nda gà hezweŋe, nda gà təmaŋ, nda gà ɓəzla meslire ga hinne, gà asləka ŋa, nda gà məkəs ŋana mbaŋa. I sləraha gà mburma ka, aɗaba i ɗifek aba a kər batsah ga ŋa, dite ka, ki giŋ ŋgwal ŋa ika miɗ yak te.» 7 Aləka gà ɓəzla meslire aaha ta màra a təv Zakup ya ka, ta gwaɗar: « Maa ndze a təv Isuwa damər yak, ŋgat ŋa a riŋ ti dere a nda gà mburma ya, ti sle a dərməka faɗ, aà melime nda kər.» 8 Zakup a tsaraka kataya ka, magəɗa a ger hinne, nda medzedzere, dite a ndzək ikaba gà mburma ŋgar a, nda gà təmaŋ a, nda gà sla ya, nda gà zlìgwèmè ya, a ndzək ikaba ya medzige sula. 9 A dzala ka, a gwa: « Na bəla Isuwa aka bats tseke ŋgiɗ ilik ka, tseke aaha a zehiŋa, a beyiŋa.» 10 Zakup a hama a Mbulum, a gwa: « Mbulum Batsah tsir gà Abəraham, nda Izak tsir gà ana ta gəsawa ahər ahəm a, kər Mbulum Batsah ga ŋa, ku gweɗiŋ ka, mbəɗ gər aka ahəɗ yak, a təv gà damər yak ka, i ndze a nda kər ana, meme, kamkam te. 11 Aɗaba i sle a aà maŋgata ŋgwal yak ana ndzer ŋa tserdze, kà pètiŋ dər a iye mala magəsa ahəm yak a tsa. I tsəlara i dulwa Yurdan a ka, nda gà zəva gà ya ilik pəra ana, meme, kamkam, aɗaba kinehe mede gà na i de a ya ka, vatwa sula. 12 Kamkam mbil iye i ahər Isuwa damər gà ya te. Aɗaba magəɗa ŋgar a riŋ a ka, hinne, aka dara ka, ma ta dzeye à iye tsè te, ku mege gà məkəs gà nda gà ɓəza gà tekeɗe ya. 13 Aɗaba kər ku gweɗiŋ ka, i ndze a nda kər ndzer, i kesle a kər, dite i vilek a mawà gà ɓəza hinne, kamala hewiyeŋ ana i dula ya, a ɗeme a ba tsa, aɗaba ana hinne ya.»
14 I dəba ŋa ya, Zakup a həna riŋ i fata ndaavəɗ ŋa ata. Ama i huɗ gà dukw ŋgar ana a ŋgat a ahər ŋgar tserdze ya ka, a ndzək iɗəm a, a dza aba ya, aɗaba damər ŋgar Isuwa. 15 A ndzək gà awak dərməka sula, gà vugul ŋana dzik səla. Gà təmaŋ dərməka sula asa, gà hàgwàlà ŋana dzik səla mbaŋa. 16 Dite gà zlìgwèmè ibam, gà mawur ŋana dzik makər nda gà ɓəza ŋa dze, gà sla dzik faɗ, gà mbuluv sla ŋana kurwa, gà hezweŋe tekeɗe ka, gà məmər ŋana dzik səla, gà mbuluv sla ŋana kurwa. 17 I dəba ŋa ya, a dzàɗ ahər a gà ɓəzla meslire ŋgar. A gwaɗa a tar: « Lèhwimiŋ dər aka miɗ, ka ndzakum ikaba ya palàm pampam.»
18 A tsik a malahalah ŋana, a gwaɗar: « Na kàa lùmum nda Isuwa damər gà, aka tsam aà kər duwa, a gwaɗak, kər ana weke, kige tsa, ki de a ana, a ŋga, dite naha ika miɗ yak ana, gà dukw weke ka, 19 say ki gweɗere a, ‘naha ka, gà dukw ɓele yak masakəŋa, aà madzàɗak a kər damər ŋgar Isuwa batsah ŋgar ŋa. « Dite ki gweɗere a asa ka: ‘ŋgat ŋa nda gər ŋgar ŋa a riŋ a dere a i dəba mə̀r a.««
20 A tsik a gà ma sula ŋana, nda gà mə makər ŋana tekeɗe kataya mbaŋa. Dite zləm a a gà mburma ana ta kiv a gà dukw ata tserdze ya ka, kataya. 21 A gwaɗa a tar asa: « Kamala ana ki tswim a a Isuwa ya, batsah ga ŋa, na kàa lùmum nda gà ŋgat a, gwaɗumar ka. ‘Zakup ɓele ya, ŋgat ŋa nda gər ŋgar ŋa riŋ a dere a i dəba mə̀r a.« « Ama Zakup a dzala i gər ŋgar ka, à mèreh a aba a damər ŋgar nda gà dukw ata masakəŋa a lah dər aka miɗ ŋgar a. Dite bəla aləka aka ndze aka miɗ ŋgar tsìm ka, biy tsa a weye a iye. 22 Aləka dukw ata a lah dər aka miɗ a ka, ŋgat ŋa a həna i ma pat ata.
Gà Zakup ta paza ba nda wele duwa a sər ŋgat tsa
23 Ndaavəɗ ŋa ata ka, gà Zakup ta mah ba nda gà məkəs ŋgar aaha sula ya, nda gà ɓəzla meslire gà məkəs ŋgar aaha sula, nda gà ɓəza ŋgar aaha kurwa gəra ilik a. Tə tsala i dula duwa tə zalar Yabbuk. 24 I dəba ŋa ya, a tsala iɗəm à gà mburma ŋgar ata ya ka, a daha, a tsala iɗəm à gà dukw ana i ga i ma ŋgar a tserdze mbaŋa. 25 Aləka Zakup a zeha i fata à gər ŋgar ka, wur duwa a daha, ta pazaba hinne, haa mbulum kàa medìve. 26 Wele ata a fə̀r, a mba aà Zakup tsəka, a lakayar a təv mezìve ana piɗ aà gus ana atasl a ndàbara i pùrpura. Tsam ka, ndzəɗa Zakup a riŋ aà mazəma ba asa tsa. Zakup tisl a gəs ŋgat. 27 A gwaɗa a Zakup: « Pəl à iye, aɗaba mbulum akaa medìve.» Ama Zakup a gwaɗar aaka: « I pìl a à kər a tsa, say pisiŋ ahəm dzekwiŋ.» 28 A wiz aà Zakup, a gwaɗar: « Zləm yak dzena, weke?» A gwaɗar: « Zləm gà Zakup.» 29 A gwaɗa a Zakup asa: « Aka miɗ mba ka, zləm yak Zakup asa tsa. Ama zləm yak ka, Isərayel, aɗaba kàa zəmum ba nda Mbulum, dite nda gà mburma, ama kà mba aà tar.»
30 I dəba ŋa ya, Zakup a tsam ahər, a gwaɗar: « ƒifiŋ à zləm yak te.» A gwaɗar: « Aàmala na ki wiz a zləm gà dze ya.» I fata ya ka, a pise ahəm a Zakup kuɗa.
31 I dəba ŋa ya ka, Zakup a gwa: « Yàa ŋgat are Mbulum ika miɗ gà, ku mege meme tekeɗe ka, mesife gà aka mbəl.» Aɗaba taŋa na a zal a təv ata Paniyel a. 32 A ta mede i təv ata tə zalar Paniyel a ka, pat akaa mimbìzera, a riŋ a de a ka, nda gà metsìlgeɗe gus ŋgar ata a wur ahəriŋa. 33 Aɗaba taŋa na gà Isərayel ta papəɗawa mile ana i gus duwa ya tsa haa kinehe agəra ana tə lak a Zakup aka gus a.