Madzəba 30

Gà ɓəzla meslire ata gà məkəs ŋaya ta wa gà ɓəza a Zakup

1 Aləka Rasel a samata, aka wa kəla a Zakup tə tsəka, a ner are a damər ŋgar Leya hinne. A gwaɗa a Zakup: « Viliŋ mawà ɓəza te, tsəka, a ge a ba tsa, i mìtiŋa.» 2 Zakup a tsaraka kataya ka, a ge matsəɓatsəɓ hinne aka gər Rasel. A gwaɗar: « Iye ya na Mbulum a? ŋgat na a dàn kər aà mawà kəla ya ya.» 3 Rasel a gwaɗar: « Araha, zla Biliha mala meslire gà aaha, me ne məkəs yak, ka hənum nda ŋgat, na dite iye tekeɗe, i ŋget a gà ɓəza i təv ŋgar a, ti ne a gà biy ga ya.» 4 A zla Biliha mala meslire ŋgar ata a vəl a Zakup, a ne dər məkəs ŋgar, ta həna. 5 I dəba ŋa ya, Biliha a ŋgat kəla kuɗa, a war kəla asləka ŋa a Zakup. 6 Rasel a gwa: « Mbulum aka giŋ ndzer ŋa, aka tsaraka meheme gà ana i hamar a, na dite a viliŋ kəla ya.» Aɗaba taŋa, a zalar Dan (kamala megweɗe ya ka, ndzer kaɗəŋ. 7 I dəba ŋa ya, Biliha mala meslire Rasel a ŋgat kəla, a wa kəla ata ka, asləka ŋa a Zakup masula ŋa asa. 8 Rasel a gwa: « Maa ge guvəl nda damər gà hinne, ama ka, i mba aà ŋgat.» A zal a kəla ata ka, Naftali (kamala megweɗe ya ka, guvəl.) 9 Aləka i təv ana Leya a samata aka miyak a mawà kəla təma ya ka, a zla mala meslire ŋgar Dzilpa, a vəl a Zakup, me ne məkəs ŋgar. 10 I dəba ŋa ya, Dzilpa mala meslire Leya ata a war kəla asləka ŋa a Zakup. 11 Leya a gwa: « Iye ka, Mbulum gà a riŋ.» Aɗaba taŋa, a zalar Gad (kamala megweɗe ka, Mbulum gà a riŋ.) 12 I dəba ŋa ya asa ka, Dzilpa mala meslire Leya a wa kəla a Zakup masula ŋa asa. 13 Leya a gwa: « Naha ka, maŋgayaba gà. Aɗaba gà ɓəza gà dəm tserdze ta gweɗiŋ ka, maŋgayaba ika gər yak.» A zal a kəla ata ka, Aser (kamala megweɗe ya ka, maŋgayaba.)

14 Akahər masasa daw ka, Ruben a da a dala. A daha ka, a ŋgat mawà dukw duwa kamala mbàwal a, i dala. A zlara a mama ŋgar Leya ya. Aɗaba dukw ata gà məkəs tàa zəm ka, a vile a ter a mawà ɓəza hinne. Rasel a ŋgat a dukw ata ka, a gwaɗa a Leya: « Viliŋ dukw ata kəla yak a zlara i dala ya te.» 15 Leya a gwaɗar aaka: « Taŋa ana a slek aà are tsiye na kàa zla aà iye zal gà ya ka, kà waya ki zle a dukw aaka kəla gà a ŋgatara i dala ya asa dzena, meme?»

16 Rasel a gwaɗar: « Haya lèle, hənum nda ŋgat ndaavəɗ aaha mbakum a, aɗaba dukw ata kəla yak a ŋgatara i dala ya ya.» I hawa Zakup à mère a i dala ya ka, Leya a ŋgəzlaha aka ŋgat. Tə lə̀ma tsara ka, a gwaɗar: « Say ki hinneme a nda iye mbakum, aɗaba Yàa vəl dukw mayaba gà agəra kər, i pəl nda dukw ana kəla gà a ŋgatara i dala ya ya.» Aɗaba taŋa Zakup a həna nda ŋgat ndaavəɗ ata. 17 Ama Mbulum a gəs meheme Leya ana a hamar a, na dite a ŋgat kəla ya. A wa kəla a Zakup miìzləm ŋa asa. 18 Aɗaba taŋa, a gwa: « Mbulum aka viliŋ dukw mayaba gà, agəra ana i vəl ɓele gà a zal gà ya.» A zal a kəla ata ka, Issakar (kamala megweɗe ya ka, dukw mayaba.) 19 I dəba ŋa ya, Leya a ŋgat kəla asa, a wa kəla a Zakup mendilik ŋa. 20 A gwa: « Mbulum aka viliŋ dukw ŋgwal ŋana masakəŋa biy taf. Ama kinehe ka, zal gà a ndzewe a i təv ga kuɗa, aɗaba ana Yàa war kəla mendilik ŋa ya.» A zal a kəla ata Zabulun (kamala megweɗe ya ka, Mbulum a viliŋ dukw taf.) 21 I dəba ŋa ya ka, a wa dəm ŋa, a zalar Dina.

22 Aləka i dəba ŋa ya, Mbulum a dzala gà gər aka Rasel. A gəs meheme ŋgar, na dite a vəlar vatwa aà mawà kəla ya. 23 A ŋgat kəla ka, a wa asləka ŋa. A gwa: « Mbulum aka zla aà iye mesewere are ya. BATSAH kwa ŋa aka sìkèhiŋ aaka à kəla asləka ŋa asa.» 24 A zalar Yasufa, kamala megweɗe ya ka, Mbulum mà sìkèhiŋ dər aaka asa.

Gà Laban nda Zakup ta ge aà ba wirwir

25 Aləka i dəba ana Rasel a wa Yasufa ya ka, Zakup a gwaɗa a Laban: « Viliŋ vatwa, i mbìɗ a gər a təv ga ana i dara iɗəm a ya, aka ahəɗ gà kuɗa. 26 Dziŋ gà məkəs gà nda gà ɓəza gà, aɗaba Yàa gek megemir hinne, aɗaba tar. Viliŋ vatwa, mìi diŋa, aɗaba kər kà sər megemir ana i gek a.»

27 Laban a gwaɗar aaka: « Viliŋ vatwa, dite i ŋgat ŋgwal ika miɗ yak a te. Aɗaba i dzala ka, i sər dər BATSAH kwa ŋa a pisiŋ ahəm i ŋgat duwa hinne ka, aɗaba kər.» 28 Laban a gwaɗar: « Tsikiŋ dukw mayaba yak, i vilekiŋa.»

29 Zakup a gwaɗar: « Kər kà sər dər, meme na i gek megemir a. Dite kà sər asa ka, meme na gà dukw gənaw yak tə ndza i ahər gà ya. 30 Aɗaba akahər ana i dara ya ka, gà dukw yak hinne tsa. Ama kinehe ka, tàa səkah aaka hinne.» A gwaɗar asa: « Mbulum BATSAH kwa ŋa aka pisak ahəm aka gà dukw yak tserdze. Ama kinehe ka, say i ge a megemir aɗaba ga gà kuɗa te.»

31 Laban a tsam aà ŋgat, a gwaɗar: « I vəlak dzena, dukùla?» Zakup a gwaɗar aaka: « Ka viliŋ duwa tsidze, dukw ana a sèsiŋ ka, i de a, i ta kiv a gà dukw yak asa, i kesle a tar lele. 32 Və̀ɗəna ka, i de a ndaka magər gà dukw gənaw tserdze. I gesere a iɗəm gà mewetse ŋana pampam i liwiŋ gà təmaŋ a fit dze. Kamala taŋa ya, gà mewetse ŋana i liwiŋ gà awak a tekeɗe, i ge a dər kataya tserdze mbaŋa. Taŋa na a ne a dukw mayaba gà ya. 33 Kamala taŋa ya na ndzer gà à pèt a ka, ndidwe na kàa dara aà məfə̀rà aà dukw mayaba à ya ya. Ama i liwiŋ gà awak ana mewetse ŋa kusuh kusuh, kige tsa gwizgwiz a nda gà i liwiŋ gà təmaŋ ana lìviŋ lìviŋ iɗəm tsəka, taŋa fit ki sireme a dər ikaba ya.»

34 Laban a gwaɗar: « Taŋa ka, lele, gema kamala ana kà tsik a.» 35 A pat ata ka, Laban a gasara iɗəm gà awak ana gà gùgùl ŋa, gà mewetse ŋa ya fit dze. Gà təmaŋ tekeɗe ibam, a pala iɗəm gà lìviŋ lìviŋ ŋana ya fit dze mbaŋa asa. Dite a dza ahər a gà ɓəza ŋgar. 36 Ta mah dər ba, tə da direŋ, ta ge aà vatwa mehinne makər na dite ti ndze aà ba nda Zakup asa tsiye. I dəba ŋa ya, Zakup a kə̀v ɗa gà asiŋ gà dukw Laban aaha.

37 Zakup a sàs zəva gà dizl gà dukw ŋgiɗ pampam makər, a kəɗ ihər dəba ya. Dite a wetseye gà zəva ata nda dukw ana a ndza herrè ya, gwelek gwelek gwelek. 38 Dite i dəba ŋa ya, a daha, a dza gà zəva ŋgar ata aka miɗ gà təmaŋ aaha nda gà awak a, aka biye yam. I təv ana gà təmaŋ ata nda gà awak a, tàa dara, ti se a yam a ka, tə tsaraka aka ba. 39 Tə tsalaya akaba i təv ana ta ŋgat a gà zəva ata ya tsam ka, i dəba ŋa ya, ta waya gà ɓəza ka, gà mewetseye ŋa pampam. 40 Aləka i zəva gà dizl gà dukw ŋgiɗ pampam makər a kəɗ ihər dəba ya. Dite a wetseye gà zəva ata nda dukw ana a ndza herrè ya, gwelek gwelek gwelek. Dite i dəba ŋa ya, Zakup a ndzək iba gà ɓəza gà təmaŋ ata nda gà awak a. (A mbəɗ à tar are ndàra a təv gà təmaŋ ana gà lìviŋ lìviŋ ŋa ya tserdze, a liwiŋ gà biy Laban.) Kamala taŋa ya na Zakup a ge megemir, dite a ŋgat aba gà dukw gənaw ŋgar, aka gaw akaba nda gà biy Laban asa tsiye. 41 Ku mege ndeɗime na i təv ana gà dukw gənaw gà ndzəɗa ŋana ti tsele akaba a ya ka, Zakup a dzawa a tar gà zəva ata aka miɗ na ti se a yam a. Kamala taŋa ya, ti tsele akaba a i təv gà zəva ata. 42 Ama gà dukw gənaw ana gàmagàlà ŋa tsiye ka, a dzayawa a tar gà zəva ata aka miɗ tsa. Kamala taŋa ya, gà na gà magala ŋa tsiye ka, ti ne gà biy Laban. Gà magala ŋana ibam, gà biy Zakup.

43 Wele aaha a ŋgat limana hinne, gà ɓele ŋgar gà məkəs ŋana nda gà asləka ŋa hinne, dite gà zlìgwèmè ŋgar nda gà hezweŋe ŋgar hinne mbaŋa asa.