Madzəba 29

Mendzena Zakup a ndze a bəra Laban a

1 Aləka i təv ana Zakup a de a ya ka, a da ndaka ahəɗ gà mburma ana ika tseke pat ana a mbəzawara ya. 2 A ndze a fata ka, a ŋgataha a sùwà duwa i kusak. Gà mayahaba gər gà təmaŋ a riŋ i fata, gà mahə̀nàyà ŋa təv makər, aɗaba gà ɓəzla makəva gà təmaŋ ata ta vəlawa yam a gà təmaŋ ka, i sùwà ata ya. Sùwà ata ka, batsah beliŋ mahə̀ndə̀kà ŋa dər ikəka tizlìts. 3 I təv ana tàa yaha gər a gà təmaŋ tserdze ya ka, ti dehe a, tì ta pèsle a ikəka beliŋ a, na dite ta vile a yam a gà təmaŋ a. Tàa saya aba ya ka, ta me a ka a à beliŋ ata asa. 4 Zakup a daha, a gwaɗa a tar: « Gà masla gà, kà dumara ana, i ŋga ya?» Ta gwaɗar aaka: « Mì dara ka, i Haran a.» 5 A tsam aà tar asa, a gwaɗa a tar: « Kà sərum Laban kəla Nahur a?» Ta gwaɗar: « Mì sər ŋgat.» 6 A gwaɗa a tar: « A riŋ ana, lele be ya?» Ta gwaɗar: « Haya, a riŋ zayzay lele, araha dəm ŋgar ŋa a riŋ ihər a dere a nda gà təmaŋ ŋgar ŋa ya.» 7 Zakup a gwaɗa a tar: « Naha kà yahum gər a gà təmaŋ ndaapat aaha ana, meme, wàla aka sle mivile a tar yam zukw tsiye? Naha ana, ŋgulum na ka vəlum aba yam a gà təmaŋ a, dite ki mbiɗwim a gər a makəva ŋa asa ya tsiye?» 8 Ta gwaɗar: « Vatwa riŋ tsa, say haa a təv ana gà təmaŋ tserdze tàa yahabara gər a dzekwiŋ. Na dite mìi ta pesle a beliŋ ika biye sùwà ya, mìi vile a yam a gà təmaŋ a.» 9 I təv ana Zakup a riŋ à fèfil a nda gà tar mba ya ka, Rasel aka slala nda gà təmaŋ tsir ŋgar, aɗaba ŋgat na a kə̀vawa tar a. 10 Aləka Zakup a ŋgat a Rasel dəm Laban, i damər mama ŋgar a ka, a sìrikaha aka biye sùwà ata, a daha, tuwaŋ a hə̀ndə̀k ikəka beliŋ a, a vəl yam a gà təmaŋ damər mama ŋgar ata. 11 Dite i dəba ŋa ya, a ge wusa a Rasel nda mendzìwìɗeba ahəm, a dza ba aà tuwa, aɗaba maŋgayaba ana i gəzləŋ ŋgar a. 12 A ɗif aba a Rasel, a gwaɗar: « Iye ka, mì ge wurba nda tsir yak, iye kəla Rebeke.» Rasel a tsaraka kataya tsara ka, a val a ma, a ta meɗife dərraha a tsir ŋgar. 13 Aləka Laban a tsaraka Zakup ka, kəla damər ŋgar ana dəm ŋa ya ka, a val aakaha aà vatwa aà melime nda ŋgat. A ndzeha tsara ka, a gəs aàba ŋgat. A ndzìwìɗer ahəm, dite tə da akaba a ma ŋgar kuɗa. Zakup tekeɗe, a tsik dukw ana a ge ba nda ŋgat a tserdze a Laban. 14 Laban a gwaɗar: « Kaɗəŋ ndzer, kər ka, maslàlàba gà.» Zakup a ndza i ma ŋgar kiye ilik.

Zakup a ge megemir a Laban, na dite a dzar gà dəm ŋgar a

15 Laban a gwaɗa a Zakup: « Ki giŋ a megemir taf masakəŋa ka, a ge a ba tsa na taŋa ya. Tsikiŋ dukw mayaba yak dzena, awara na kà waya ya?» 16 Ama Laban ka, gà dəm ŋgar a riŋ sula. Batsah ŋana ka, zləm ŋgar Leya. Masula ŋana ibam ka, zləm ŋgar Resel. 17 Ama Leya ka, are ŋgar ŋgwal a tsa, mbə̀zluwùwùɗɗa. Ama Rasel ka, ba ŋgar fit a tsahən hinne, yerrè tsìslslek.

18 Aɗaba taŋa Zakup a waya ka, Resel. A gwaɗa a Laban: « I gik a megemir mivè təsəla, aɗaba Rasel dəm yak ana masula ŋa ya.»

19 Laban a gwaɗar: « Ndəna i vile a a mburma taf masakəŋa ya ka, ŋgulum na i vilek a a kər ana wur ga ya. Ndza ɗa i ma gà, ki giŋ a megemir kamala taŋa ya.» 20 Zakup a ge megemir a Laban mivè təsəla, aɗaba Rasel dəm ŋgar ana masula ŋa ya. Mege megemir ata Zakup a ge mivè təsəla ya ka, a ne aà ŋgat kamala a ge ka, mehinne zaakwa pəra, aɗaba ana Rasel a tsahən ahər hinne ya.

21 Aləka i təv ana mivè ata a ndəv a ka, Zakup a gwaɗa a Laban: « Viliŋ daala ga, aɗaba mive ana kà tsikiŋ a ka, aka ndze aɗəm, i zle a ŋgat kuɗa.» 22 Laban a tsaraka kataya ka, a de ɗaf hinne, a zal dər a gà mburma ana i kwite ya tserdze. 23 Aləka i dəba ŋa ya, hawa a ge ka, a zla Leya dəm ŋgar ana batsah ŋa ya, a vəl a Zakup. Ama Zakup ka, aka sər dər tsa, a gwa ka, Rasel na ta viliŋ a. Aɗaba taŋa, a da a təv ŋgar, a daha, ta həna. 24 Dite Laban a zla ɓèle duwa zləm ŋa Dzilpa, a vəl a Leya, dite me ne mala meslire ŋgar. 25 Aləka ndidwe ŋa i mèkwède ka, Zakup a samata ka, Leya. A tsam aà Laban, a gwaɗar: « Aàla na ki ge aà iye kataya ya? I gik megemir ana, aɗaba Rasel tsiye? Dite aàla na kì ge aà iye nda wirwir a?»

26 Laban a gwaɗar aaka: « Fəla gà tsir mə̀r ka, dəm ŋa batsah ŋana na a de a zal a dzekwiŋ, na dite kə̀la ŋana a de a ya.» 27 A gwaɗar asa: « Ndəv à megìrve mandə̀ɗà a bəra ŋa i huɗ kwaskwa ilik a dzekwiŋ, na dite ka, i vilek a biy ŋgiɗ mbaŋa ya. Ama ki giŋ a megemir mivè təsəla, aɗaba ŋgat asa.»

28 Ama Zakup a gəs bazlam ata, a ndəv a megìrve mandə̀ɗà a bəra ata kwaskwa ilik a nda Leya. I dəba ŋa ya. Laban a zla Rasel dəm ŋgar ana kəla ŋa ya, a vəlar kuɗa. 29 Laban a zla ɓele duwa zləm ŋa Biliha asa, a vəl a Resel, dite me ne mala meslire ŋgar mbaŋa. 30 Zakup a da a təv Resel, ta həna mbaŋa, Ama a waya Rasel ka, hinne, a za dər Leya. A ge megemir a Laban mivè təsəla asa, aɗaba ŋgat.

Leya a wa gà ɓəza a Zakup

31 Aləka BATSAH kwa ŋa a samata Zakup a waya Leya tsəka, a vəlar vatwa i ŋgar aà mawà kəla. Ama Rasel ka, a we a kəla tsa. 32 Leya a ŋgat kəla, a war kəla asləka ŋa a Zakup. Aɗaba taŋa Leya a gwa: « Yàa ndze are tsehe a Mbulum BATSAH kwa ŋa. Kinehe ka, zal gà a weye a iye kuɗa.» Aɗaba taŋa, a zalar Ruben (kamala megweɗe ya ka, mendze are tsehe.) 33 I dəba ŋa ya, Leya a ŋgat kəla ka, a wa asləka ŋa asa, a gwa: « BATSAH kwa ŋa aka tsaraka mene are gà ana ti niŋ a ya. Aɗaba taŋa na a viliŋ kəla asa ya.» A zal a kəla ŋgar ata Simeyun (kamala megweɗe ya ka, metsereke.)

34 Aləka a ŋgat asa ka, a wa asləka ŋa. A gwa: « Kinehe ka, zal gà à gis a aba a iye lele, aɗaba ana Yàa war gà ɓəza makər a.» Aɗaba taŋa a zalar Levi (kamala megweɗe ya ka, magəsa aàba.)

35 I dəba ŋa ya asa, a ŋgat kəla, a wa ka, asləka ŋa asa mbaŋa. A gwa: « Kinehe ka, i zèmbeɗe a à Mbulum BATSAH kwa ŋa.» Aɗaba taŋa na a zalar Yuda ya (kamala megweɗe ya asa ka, mazàmbaɗà a Mbulum.) Dite i dəba ŋa ya ka, a miyak à mawà kəla tə̀ma.