Madzəba 28

1 Izak a tsaraka kataya ka, a zal a Zakup, a piser ahəm, dite a gwaɗar: « Kər ka, ka ta zla dəm gà mburma ana ɗa ika ahəɗ Kanan a tsa. 2 Kinehe ka, hitse, ka da aka ahəɗ Mezapitamiya, a bəra Betuwel daraməmə̀r yak, ki zle a riŋ daala ka, i liwiŋ gà dəm Laban damər mama yak i fata. 3 Mbulum ana ŋgat mala ndzəɗa, a za gà dukw tserdze ya, mi pisak ahəm, mə vəlak mawà ɓəza hinne. Dite ki ne a tsir gà slàla pampam hinne mbaŋa. 4 Mi pise a kurum ahəm nda gà ɓəza yak kamala ana a pise ahəm a Abəraham akahər ata ya. Ki dere a ka, ki ndzwim a ika ahəɗ aaha biy kurum tsa, Mbulum a vəl a Abəraham a. Kinehe ka, aka ne biy kurum.» 5 Dite i dəba ŋa ya, Izak a ge wusa a Zakup, Zakup a mah ba, a da a Mezapitamiya, a təv Laban kəla Betuwel ana gà Aram a ya. Laban tekeɗe, damər Rebeke, məmər gà Zakup nda Isuwa.

Isuwa a zla məkəs ŋgiɗ dəm Ismayila

6 I dəba ŋa ya, Isuwa a tsaraka meme na Izak a pise ahəm a Zakup, a ger wusa, dite a slər ŋgat aka ahəɗ Mezapitamiya, a gwaɗar, ma zla riŋ daala ka, i fata ya. I təv ana a de a ya ka, a piser ahəm, dite a gwaɗar: « Ka ta zla ɗa daala ka, i liwiŋ gà dəm gà Kananiya a tsidze.» 7 Ama a sər, Zakup a gəs ahəm aà gà tsir ŋgar nda mama ŋgar, a mah ba, a de a Mezapitamiya. 8 I fata ya, Isuwa a samata ka, gà məkəs ŋgar ana a ndzək gà dəm gà Kananiya a, a tsahən aà tsir ŋgar Izak tsa. 9 Tsam ka, a mah ba, a da a təv Ismayila kəla Abəraham, a zla Makalat damər Nayut ana dəm ŋa ya. Gà məkəs Isuwa ta gaw ba makər.

Mbulum a pàt aba a Zakup i sunwa ya i Betel

10 I dəba ŋa ya, Zakup a mah ba, a de a a Haran. 11 Aləka a ndze a təv duwa a riŋ ka, a həna i fata, aɗaba pat aka dəɗ, həvəɗ aka ge. I təv ana a hinne a ya ka, a zla kur ilik i təv ata ya, a tike aaka gər, kamala təv gər a. Dite a həna i fata. 12 Aləka ndaavəɗ ka, sunwa a da aaka, a ŋgat a medzibe səsal duwa mehìtsè ŋa dzèŋŋa ika ahəɗ, tsikw a ndisl aà mbulum. A ŋgat a gà gawla Mbulum hinne, tar riŋ ti tsele a ndàra a mbulum. Gà asiŋ ŋa tar riŋ ti terre a ndàra a bəɗ a.nnn 13 BATSAH kwa ŋa a riŋ mehìtsè ŋa ihər dzèŋŋa. A gwaɗa a Zakup: « Iye ka, Mbulum gà Abəraham nda Izak tsir yak ana ta gəsawa ahər ahəm a. Ahəɗ aaha kà həna aaka a faha ya ka, i vile a kurum a nda gà ɓəza yak, a ne a biy kurum. 14 Gwala yak a ta we a ba ka, hinne kamala hewiyeŋ ana i dula ya. A ta lìm a aka ahəɗ aaha fit dze, ti ndze a tsikw aka tseke pat ana a mbəzawara ya, dite tsikw aka tseke pat ana a dəɗawa aɗəm a, ku mege a ŋga. Gà slàla gà mburma ana ika gər ahəɗ a tserdze ti yehe a mipise ahəm ana i vəlak a, nda na i vəl a gà ɓəza yak a mbaŋa. 15 Sər dər ka, iye riŋ ihər i ndze a nda kər, i kesle a kər, ku mege a ŋga a təv ana ki de aɗəm a ya tserdze. I zle a kər aka ahəɗ ata, aɗaba i miyek a à kər a tsa, haa a təv ana Yàa ge dukw ana i tsikik a.»

16 Aləka Zakup a piɗeke ika mendze are ya ka, a gwa: « Mbulum Batsah ŋana a riŋ mandza ŋa i təv aaha kaɗəŋ ndzer, iye ka, Yàa sər a aba tsa.» 17 Magəɗa a ger hinne, a dzadzar slàɓslàɓslàɓ, a gwa: « Təv aaha ka, təv magəɗa. A ge a ka, ga Mbulum ɗa i faha.» I faha na biye hərmaga mada a təv Mbulum a.»

18 I mèkwède hedwe ka, Zakup a hitse, a zla kur ana a tike aaka gər ŋgar a, a hitse dər aà mbulum dzeŋ. Dite a dza aaka mal aka gər ŋa, na dite mburma ti sir a dər, təv aaha ka, tsəɗaŋŋa ya. 19 Akahər ata ka, tə zalawa a təv ata ka, Luz. Ama kinehe ka, tə zalar Betel, kamala megweɗe ya ka, ga Mbulum. 20 Zakup a mbaɗa, a gwaɗa a Mbulum: « Na ki ndze a nda iye, ki kesle a iye ika vatwa gà ana i de aɗəm a tserdze ya ka, lele, ki viliŋ a gà dukw mezime nda gà petek, 21 na kàa màra à iye a bəra tsir gà ya nda zayzay lele ka, taŋa ka, ki ne a Mbulum gà. 22 Kur aaha i hitse dər a ka, na dite mburma ti sir a dər, a ne a ga yak a. Dukw ana kàa viliŋ tserdze ya ka, i ɗemiŋa, i ndzèye a iba ya pampam təv kurwa, i vilek a iɗəm a təv ilik masakəŋa taf.»