Madzəba 27

Izak a waya a pise a ahəm a kəla ŋgar ana maləkwara ŋa ya

1 Aləka i təv ana Izak a ge màndawal herem herem, a ŋgat a vatwa asa tsiye ka, a zal a Isuwa kəla ŋgar ana maləkwara ŋa ya. A gwaɗar: « Kəla gà.» Isuwa a gwaɗar aaka: « Waalaw.» 2 Izak a gwaɗar: « Araha iye ka, Yàa ge màndawal, i sər pat ana i mite a ya tsa. 3 Daha, ndzək gà dukw ahər yak gà gwazlah yak nda lìkiɗ yak ka, ka da dər a dala, kà kìɗiŋara gà dukw slu ana i dala ya. 4 Na kàa kə̀ɗara ka, ka diŋ ala ŋa, ma dzəm lele kamala ana i waya ya. Kàa de ka, dite ka zliŋara, i zimiŋa. Yàa zəm aba ya ka, i pisak a ahəm, na ələk i ta mite a ya.» 5 Rebeke ka, a riŋ a tsereke bazlam ata na i təv ana Izak à fèfil a a Isuwa ya. Isuwa ka, a mah ba, a da a dala a mayaha dukw slu ata. Aləka a kə̀ɗara a riŋ a zler a a ma ya. 6 Rebeke a tsaraka kataya ka, a fàfəl a kəla ŋgar Zakup. A gwaɗar: « Araha, i tsaraka aà tsir yak a ka, a fàfəl a Isuwa, a gwaɗar ka: 7 Daha, ta kìɗiŋara slu dukw dala ya, ka diŋara ala ŋa ya, ma dzəm lele, dite i zimiŋa, na Yàa zəm aba ya ka, i pise a ahəm ika miɗ Mbulum BATSAH kwa ŋa, na ələk i ta mite a ya.» 8 Ama kinehe ka, tsaraka dukw ana i tsikik a ya, kəla gà. 9 Daha a təv gà awak, ka yehiŋara iɗəm gà ɓəza gà awak ana slu ŋa a dzim a lele ya sula kwaŋ. I de a ala ŋa, ma dzəm lele aɗaba tsir yak, kamala ana a waya ya. 10 Na Yàa de ka, ka zlaraha a tsir yak, ma zəm, dite mi pisak dər ahəm na ələk a ta mite a ya.»

11 Zakup a gwaɗa a mama ŋgar: « Kər kà sər, Isuwa damər gà ka, madaskwa ŋa, ŋguz à ba ŋgar dàsùkwsùkwkwa, ama iye ka, ŋguz a riŋ à ba gà tə tsa, ndìrslèslikka ana, meme? 12 Bela aləka tsir gà à lìm aà iye a ka, a ne a i təv are ŋgar kamala ana i bana ŋgat a, i zle akabara a mezelme ŋgar aka gər gà ya ivaɗ, mi pisè ahəm tsa na taŋa ya.»

13 Ama mama ŋgar a gwaɗar: « ŋgulum mezelme ŋa ma dara aka gər gà ya kəla gà. Tsaraka bazlam gà, daha, yehiŋara awak a, kamala ana i tsikik a.»

14 Zakup a tsaraka kataya ka, a mah ba, a da a mayahara gà ɓəza awak ata ya, a da dərraha a mama ŋgar. Dite mama ŋgar ata a de ala ŋa, a dzəm lele, kamala ana tsir ŋgar a waya ya. 15 I dəba ŋa ya, a daha, a zlara petek Isuwa maləkwara ŋgar a. Petek ata ka, tsakala ŋa hinne, à sìkim a ba tsa. A zlara ka, i ga ŋgar a. A daha, a tike aka Zakup kəla ŋgar ana dìy kəla ŋa ya. 16 A zla bagwa gà ɓəza awak ata, a danar kìlèfìfe ŋana a ɗa ŋgar asa mbaŋa. 17 Dite i dəba ŋa ya, a ndzək nda ɗaf ana a de ya, a vəl ahər a Zakup kəla ŋgar.

Zakup a zla aà Isuwa mi pìsè ahəm ŋgar ana zləmana ta piser a ya

18 Zakup a zla slu ata, a da dər a təv tsir ŋgar, a daha, a gwaɗar: « Dede ga.» Izak a gwaɗar aaka: « Walaw kəla ga. Kər ana, weke, wànà Isuwa ibam a?» 19 Zakup a gwaɗa a dede ŋgar: « Naha ka, iye Isuwa kəla yak ana maləkwara ŋa ya, dukw ana kà tsik a ka, Yàa gikera kamala ana kà tsikiŋ a. Hitse, ka ndza tùŋ, kà papəɗ slu aaha i dak dərra i dala ya ya. Kàa papəɗ aba ya ka, dite ka pisiŋ ahəm kuɗa.» 20 Izak a tsam aà ŋgat, a gwaɗar: « Kəla gà, meme na kà ŋgatara bise kamala taŋa ya ya?» A gwaɗar aaka: « I ŋgat bise ka, aɗaba Mbulum Batsah yak ŋana a zlak iye ya.»

21 Izak a gwaɗar: « Sirikara a təv ga ya kwaŋ, kəla gà, i lìm a aà kəriŋa, wànà kər ana, Isuwa kəla gà ndzer kaɗəŋ a, tsəna ŋgat tsiye ya?» 22 Zakup a sìrìkaha a təv tsir ŋgar Izak. Izak a ləm ahər ka, a gwa: « Biye ɗa ŋa ka, biye ɗa Zakup. Ama ahər ŋa ka, biy Isuwa.» 23 Izak a sər dər ka, Zakup tsa, aɗaba ana ŋguz aà ahər ŋgar bàsùkwsùkwkwa kamala biy damər ŋgar Isuwa ya ya. Agəra taŋa na a dza ba aà mi pìsèr ahəm a. 24 Izak a tsam aà ŋgat asa, a gwaɗar: « Wànà kər ana, Isuwa kəla gà kaɗəŋ ndzer a?» A gwaɗar aaka: « Haya, iye ka, ŋgat ŋa.» 25 Izak a gwaɗar: « Sirikara à slu ata kà zlara i dala ya ya, i pèpìɗ a kəla gà, dite Yàa papəɗ aba ya ka, i pisak a ahəm kuɗa.» Dite Zakup a sìrìkaha à slu ata, a papəɗ aba ya ka, a daha, a tə̀far aakara meɗwìtsè mawà dukw ana makwàsà ŋa ya, a sa. 26 Dite tsir ŋgar Izak a gwaɗar kuɗa: « Sirikara a təv ga ya, kəla gà, kə̀ gəs aàba iye.» A sìrìkaha a təv ŋgar, a gəs aàba ŋgat. 27 Petek ŋgar ŋa a ze ahər ka, kamala biy Isuwa ya. A piser ahəm, a gwa: « Araha, kəla gà aaha a ze a ka, kamala guvah ana Mbulum Batsah ga ŋa a pise aaka ahəm a. 28 Mbulum mə vəlakara mə̀ràh à guvah yak i gər ŋa , dite dukw ana ki slege a ya ka, ma geba, na dite daw yak a ge a mbes mbès mbes nda gà meɗwìtsè mawà dukw yak ana makwàsà ŋa ya tekeɗe, à rèhek a dər hinne ya. 29 Gà slàla ana ika gər ahəɗ a tserdze ta gik a megemir, gà slàla pampam tserdze tekeɗe, tə dzak gurmits a bəɗ aka miɗ yak. Ne ka, Əbay aka gər gà damər yak, gà ɓəza mama yak tserdze, tə̀ dzak gurmits a bəɗ aka miɗ yak. Wur ana a vilek a mezelme ya ka, Mbulum a ta viler aɗəm a mezelme mbaŋa. Wur ana aka pisak ahəm a ka, a ŋget aɗəm a mipise ahəm i təv Mbulum a mbaŋa te.»

Bazlam ana Izak a tsik a Isuwa ya

30 Aləka Izak a ndəv aba à mipise ahəm a Dzabub a ka, Zakup a dara i təv ŋgar i ga ya. A dara iɗəm a tsara ka, Isuwa damər ŋgar aaha aka màra i mekwète ya. 31 ŋgat tekeɗe ka, a de ala slu dukw dala aaha madzə̀mà ŋa mbaŋa. A zla, a da dərraha a tsir ŋgar. A daha, a gwaɗar: « Dede gà, hitse aà mbulum, kà papəɗ slu ana i dekara ya. Kàa papəɗ aba ya ka, ka pisiŋ ahəm kuɗa.» 32 Izak a tsam ahər, a gwaɗar: « E’eh, kər ana, weke?» A gwaɗar aaka: « Iye ka, Isuwa kəla yak ana maləkwara ŋa ya.» 33 Izak a tsaraka kataya ka, magəɗa a ger, a dzadzar hinne. A gwa: « Weke na a de slu ka, dite a diŋ dərra dze ya? Araha ələk kà ta medera ka, Yàa papəɗ, Yàa mbər mipiser ahəm aka ŋgat aà bibybiy.»

34 Isuwa a tsaraka bazlam tsir ŋgar ana a tsiker kataya ya ka, a ge arəv, a wideye nda magala hinne. A gwaɗa a tsir ŋgar: « Kamkam dede ga, biy ga i ŋga ɗara, pisiŋ ahəm mbeete.» 35 Izak a gwaɗar aaka: « damər yak aka dara a faha ya nda akəl, aka zla aà kər mipise ahəm yak ana zləmana i pisak a ya.» 36 Isuwa a tsaraka kataya ka, a gwa: « Lele na tə zalar Zakup ya, tsəna aɗaba aka ge aà iye wirwir a kinehe ka, medzige sula dze. Malahalah ŋa ka, a zla aà iye zləm gà, biy batsah kəla ya, dite araha kinehe asa ka, aka zla aà iye mipise ahəm gà ana zləmana ta pisiŋ a ya mbaŋa.» A gwaɗa a dede ŋgar: « Wànà kàa ziŋaha à mipise ahəm ŋa biy ga ti tsiye?» 37 Izak a gwaɗa a Isuwa: « Araha Yàa mbər mene à ŋgat Əbay aka gər yak, dite Yàa dzar gà damər ŋgar ahər tserdze, ta ger a meslire, dite asa ka, Yàa piser ahəm aka gà dukw medile ŋgar nda gà meɗwìtsè mawà dukw ana makwàsà ŋa ya mbaŋa. I sle a à mimbìɗe a arah sula asa ya kəla gà?» 38 Isuwa a gwaɗa a dede ŋgar: « Dede ga, mipise ahəm ŋa ana, ilik pəra ya? Kamkam dede gà, pisiŋ mbeete.» I fata ya ka, Isuwa a dzàba aà tuwa.lll 39 Izak a gwaɗar aaka: « Araha kər ki ndze a ka, ika ahəɗ ana a ge a duwa tsa, hewiyeŋ ŋgèhŋgehihhe ya, mə̀rah tekeɗe, à dze a akara i mbulum a tsiye. 40 Ki ndze a aà bəra ka, nda masalama yak, ki ne a mala makə̀zalà mburma. Ki ger a megemir a damər yak. Ama kəla ka, aka təv ana kàa niw megemir ŋgar a ka, ki heɓe a à dizl ŋgar ana a tiyek aka ɗa ya.»mmm

Zakup a valaba

41 Daga aà gər ata ya ka, Isuwa a ge arəv aà Zakup hinne, aɗaba ana tsir ŋgar aka mbər mipiser ahəm a. A dzala i gər ŋgar ka, a gwa: « Biy tsa tsir gà à mite a bise. Na aka mət ka, i kiɗ a Zakup damər gà.»

42 Aɗaba taŋa, Rebeke a səraha aka dukw ana Isuwa maləkwara ŋgar a dzala ya. A slər mburma aka Zakup kəla ŋgar masula ŋana, aà madara a təv ŋgar a. Aləka a dara ka, a gwaɗar: « Araha ka, Isuwa damər yak riŋ ihər a yehe a vatwa aà makə̀ɗà kər, a pil a dukw ana kì ger a. 43 Kinehe ka, kəla gà, gəs ahəm gà, hitse, valaba a bəra Laban damər gà a kwite Haran. 44 Ndza riŋ i təv ŋgar i fata, haa a təv ana arəv aka maraha a damər yak zayyà, 45 dukw ana kì ger a ka, aka mətsar gər, a ge a matsəɓatsəɓ ŋa asa tsiye. Na bəla aka mətsar gər ka, i slirehe a mburma, ti yehere a kər i fata ya. Tsəna, aàmala na ki dzeywim a à iye a ya sula məma fit pat ŋa ilik a?» 46 Akahər ata ka, Rebeke a gwaɗa a Izak: « Iye ka, Yàa bàs gəzləŋ, aà gər gà məkəs Isuwa aaha a ndzək gà dəm gà Hittiya ka, hinne, Yàa yeba. Na Zakup tekeɗe, a zle a dəm gà Hittiya kamala ana Isuwa a zla ya ana, aàmala na i ndze aà bəra hinne asa ya. ŋgulum na i mət a tsiye?»