Madzəba 26

Gà Izak tə ndza i kwite Gerar

1 Aləka i dəba ŋa ya ka, may a ge ika ahəɗ ata asa, kamala ana akahər gà Abəraham a riŋ i bəra ya ya. Ama Izak a mah ba, a da a təv Abimelek Əbay gà Filistiya a Gerar. 2 I fata ka, BATSAH kwa ŋa a dara a təv ŋgar a, a gwaɗar: « Ka da à tar aka ahəɗ Ezipt tsa. Ndza ka, ika ahəɗ ana i ɗifek a dər a. 3 Ndza ika ahəɗ ata i kesle a kər, dite i pisak a ahəm. Aɗaba i ta vile a ahəɗ aaha fit dze ka, a kurum nda gà ɓəza yak. Mimbeɗe ana i mbaɗa a Abəraham tsir yak a ka, a de a aka miɗ aka miɗ. 4 I vilek a mawà ɓəza hinne, kamala gà mawusawus ana aà gəza mbulum a. I vile a ahəɗ aaha fit a gà ɓəza yak. Gà slàla gà mburma ana ika gər ahəɗ a tserdze ya ka, ti ta yehe a mipise ahəm ata i pise a kurum a nda gà ɓəza yak a.iii 5 Aɗaba Abəraham ka, aka tsaraka dukw ana i tsiker a, dite aka gəs aà iye ahəm nda gà məpala ahəm gà na i tsiker a tserdze.» 6 Kamala taŋa ya na Izak a ndza i Gerar a. 7 I təv ana ŋgat mandza ŋa i fata ya ka, gà asləka mburma ana i kwite ata ya ta fər aà daala ŋgar Rebeke ka, tə daha a təv ŋgar, tə tsam ahər bazlam məkəs ŋgar a. I fata ya, a gwaɗa a tar: « Naha ka, damər gà.» Aɗaba magəɗa a ger aà megweɗe ka, məkəs gà ya. A dzala ka, a gwa: « Bəla ti ta kiɗ a iye, agəra Rebeke, aɗaba ana a tsahən hinne ya.» 8 Aləka tə ndza i fata zaakwa ka, Abimelek Əbay gà Filistiya ata a fə̀raha ndaka biye mendiwek. Mifìre ata a fə̀raha ya ka, aka ŋgataha a gà Izak ana ta ge màhaw nda məkəs ŋgar Rebeke ya. 9 Tsam ka, a zalaha a Izak. A gwaɗaraha: « Naha ana, məkəs yak tsaka ya? Dite aàla na ki gweɗiŋ ka, damər yak a?» Izak a gwaɗar aakaha: « Magəɗa a giŋ ka, i gwa ka, ti ta kiɗ a iye.» 10 Abimelek a gwaɗar asa: « Aàla ana ki ge a à iye kataya dze ya? A zeha ka, hinne tsa na gà mburma gà ta hinne a nda gà məkəs yak zləmana ya. Dite taŋa kər tekeɗe, ki zlere a zləmana ka, bakal ana aka gər mə̀r a ya.» 11 Dite i dəba ŋa ya, a gwaɗa a gà mburma ŋgar tserdze: « Wur ana aka ləm aà gà wele aaha nda məkəs ŋgar a ka, à mìtiŋa.»

Gà Filistiya ta ge are aka Izak

12 Aləka i dəba ŋa ya ka, Izak a slige guvah ika ahəɗ ata. Ama viye ata ka, aka ŋgat gà dukw hinne, aɗaba BATSAH kwa ŋa aka piser aaka ahəm. 13 A səkah, a ne Əbay batsah ŋa hinne. 14 Gà təmaŋ ŋgar a riŋ, nda gà sla ŋgar, nda gà mburma i ma ŋgar ka, hinne. Aɗaba taŋa na gà Filistiya ti ner are ya. 15 Gà biye yam ana akahər ata gà ɓəzla megemir tsir ŋgar Abəraham ti leye ya ka, gà Filistiya tə ndasaya aɗəm ahəɗ fèɗìɗe hinne.

16 I dəba ŋa ya, Əbay Abimelek a gwaɗa a Izak: « Da i təv mə̀r a, aɗaba kər ka, kà za dər mə̀r nda ndzəɗa hinne.» 17 Izak a tsaraka kataya ka, a mah ba i fata ya, a da, a ta mege aba ga ŋgar aka dàlàbə̀rà a tùlwah Gerar. A ndza ba i fata. 18 Ama Izak a daha, a leyebe a dər gà biye yam ana ti leye akahər ana tsir ŋgar Abəraham a riŋ mba gà Filistiya tə ndasaya aɗəm i dəba məməta ŋgar a ya. A ɗeye zləm a gà biye yam ata ka, nda zləm ana tsir ŋgar a ɗeyewa a tar a.

19 Gà ɓəzla meslire Izak tekeɗe, ti leye gà biye yam i tiluh ata mbaŋa, ta ŋgataya gà biye yam i fata hinne. 20 I dəba ŋa ya asa ka, gà ɓəzla makəva gà dukw ana i Gerar i fata ya, ta palaya ba ahəm nda gà ɓəzla makəva gà dukw Izak. Ta gwaɗa a tar: « Biye yam aaha ka, biye yam məpala ba ahəm, aɗaba ana ta pala ba aaka ahəm nda gà mburma ata ya. 21 Dite i dəba ŋa ya, ti le biye yam ŋgiɗ asa tekeɗe, tàa palaya ba aaka ahəm asa mbaŋa. A zal a biye yam ata i ŋgar ka, yam guvəl. 22 A hitse i fata ya, a ta mele biye yam ŋgiɗ asa. Ama taŋa ka, tàa ge aaka maàga asa tsa. A zal a biye yam ata ka, biye yam zlàbàta ŋa, aɗaba a gwa: « Kinehe ka, Mbulum aka səkah à kwa aka ndəv, ki sìkèhekwe a ika ahəɗ hinne kuɗa.»

Gà Filistiya tə samata, Mbulum a pise ahəm a Izak

23 I dəba ŋa ya ka, Izak a mah ba i fata ya, a da a kwite Beer-Seva. 24 Ndaavəɗ ŋa ata ka, Mbulum a dara a təv ŋgar a, a patar aba. A gwaɗar: « Iye ka, Mbulum ana Abəraham tsir yak a zazamawa ya. Magəɗa me gik tsa, aɗaba iye riŋ i zlèk a kər. I pisak a ahəm, i vilek a mawà ɓəza hinne, aɗaba ana Abəraham a zazam iye, a gəs aà iye ahəm a.»

25 Izak a tsaraka kataya ka, a zlazl təv ana ta bets aɗəm a duwa a Mbulum a, dite a hama iɗəm a Mbulum. A kiriw ga petek ŋgar i fata mbaŋa. Gà ɓəzla meslire ŋgar ti le biye yam ŋgiɗ i fata asa.

26 A pat duwa ka, gà Abimelek tə daha i Gerar a. Tə daha a təv Izak. Tə daha ka, nda Akusat masla ŋgar ana a zlàkawa i təv sèriyà ya, nda gà Pihul Əbay gà sliwdze ŋgar. 27 Izak a ŋgat a tar ka, a tsam aà tar, a gwaɗa a tar: « Agəra là na kà dumara a təv ga ya ya? Aɗaba akahər ata ka, kà nwemiŋ are, kàa dalawumara iye i təv kurum ana, meme?»

28 Ta gwaɗar aaka: « Aɗaba mì samata ka, Mbulum a riŋ à zlèk a kər ndzer. Aɗaba taŋa, mə̀r tekeɗe, mì gwa ka: ‘Masəra ba me ge ika magər kwa nda gà kər. A sàs a mə̀r ka, tsik a mə̀r dukw ana i sida ya. 29 Ki ge a mə̀r dukw ana ŋgwal ŋa tsiye tsa, kamala ana maa gik duwa tsa, mì gik ka, dukw ana ŋgwal ŋa ya ɗekɗek ivaɗ, mə̀r miyak à kər ka, nda zay lele mbaŋa. Aɗaba mì samata ka, mipise ahəm Mbulum a riŋ i təv yak hinne.»

30 Aləka Izak a tsaraka kataya ka, a de a tar ɗaf, tə zəm, dite tə sa aaka yam. 31 Ndidwe ŋana i mèkwède ka, ta hitse aà mbulum, ta mbaɗaya ba ika magər tar. I dəba ŋa ya ka, ta mah ba, Izak a laka tar, tə daya aba ya nda zay lele.

32 A pat ata ka, gà ɓəzla meslire Izak tə daha a təv ŋgar, ti tsiker bazlam biye yam ana ti le ya. Ta gwaɗar: « Maa leye yam kuɗa.» 33 Izak a zal a biye yam ata ka, Seba. Aɗaba taŋa na tə zalawa a kwite ka, Beer-Seva haa kinehe ya.

Isuwa a ndzək gà məkəs ŋgar ka, gà dəm gà Hittiya

34-35 I təv ana Isuwa a ge mivè dzik faɗ a ka, a zla Yehudit, dəm Beri gà Hittiya. Dite a zla Basmat tekeɗe, dəm Elun gà Hittiya mbaŋa. Ama gà məkəs ata ka, dukw tar ana ta ge a ya ka, a vəl matsəɓatsəɓ a gəzləŋ a gà Izak nda Rebeke hinne.