Madzəba 25

Gà ɓəza Abəraham ana Ketura a war a

1 I dəba ŋa ya ka, Abəraham a zla məkəs ŋgiɗ pam, zləm ŋgar Ketura. 2 ŋgat a war gà ɓəza a Abəraham ka, gà Simiran, nda Yuksan, nda gà Medan nda gà Madiyan, nda gà Yisbak, nda gà Suhak. 3 Yuksan a wa gà Seba nda Dedan. Gà ɓəza Dedan ka, gà gwala gà Asuri nda gà Letusi, nda gà Lewmi. 4 Gà ɓəza Madiyan ka, gà gwala gà Efa nda gà Efer, nda gà Hanukw, nda gà Abida, nda gà Elda. Gà taŋa tserdze ya ka, gà ɓəza Ketura. 5 Ama na a zəm gà dukw Abəraham ana tserdze ya ka, Izak. 6 Gà ɓəza məkəs ŋgiɗ ka, a dzaya a tar gà dukw ŋgiɗ pampam. Ama i təv ana Abəraham a riŋ nda are mba ya ka, aka mbər medelewe gà asiŋ gà ɓəza ŋgar ŋgiɗ aaha ndàra aka tseke pat ana à mbəzawara ya dìreŋ aà kəla ŋgar Izak a.

Məməta Abəraham ana a mət a

7 Ama Abəraham aka ndza aà bəra ka, mivè dərməka nda dzik təsəla gəra ə̀zləm (175). 8 Aka ge màndawal herem herem, na dite a mət a, kamala gà tsir ŋgar ana ta mata ya. 9 Gà ɓəza ŋgar gà Izak nda Ismayila ti le ŋgat a sləlak Makəpala, a guvah Efruna kəla Dzuhar gà Hittiya, bise nda təv ana tə zalar Mamre ya, ndaka tseke pat ana a mbəzawara ya. 10 Guvah ata ka, Abəraham ŋa na a səkəm aà gà Hittiya. A fata na ti le aɗəm gà Abəraham nda məkəs ŋgar Saray ya.

11 Ama i dəba Abəraham ana a mət a ka, Mbulum a pise ahəm a kəla ŋgar Izak. Izak ka, a ta mendze bise aka biye yam ana tə zalar biye yam Mbulum ana a riŋ nda gà mesife a ŋgetiŋ a ya.

Gà ɓəza Ismayila

12 Araha, naha ka, bazlam gà ɓəza Ismayila kəla Abəraham ana Hagar dəm gà Ezipt, ɓele Saray ata a war a. 13 Naha ka, zləm gà ɓəza Ismayila ata, aka mimbe aka mimbe. Taŋa Nebayut ka, Malkwara kəla Ismayila, dite gà Kedar nda Adibel, nda gà Mipsam, 14 nda gà Misema dite na gà Duma, nda gà Massa, 15 nda gà Hadat, nda gà Tema, nda gà Yetur, nda gà Nafis, nda gà Keduma. 16 Gà tar ata tserdze ya ka, gà ɓəza Ismayila. Taŋa gà zləm tar tekeɗe ka, kamala gà kwite tar ana tə ndzawa iɗəm a mbaŋa, nda gà kwite tar a tserdze. Tar ata kurwa gəra sula ya, ku weke nda slàla ŋgar.

17 Ama mendze Ismayila ana a ndza aà bəra ya ka, mivè dərməka nda dzik makər gəra təsəla (137), dite a mət ka, kamala gà tsir ŋgar ana ta mata ya. 18 Gà ɓəza ŋgar ka, ti ta mendze aka magər gà kwite Hawila nda kwite Sura, aka ahəɗ Ezipt ndaka tseke pat ana à mbizere a ya, ndàra aka vatwa Asur. Tə ndza i fata diriŋ aà gà damər tar a tserdze.

Mewe gà Isuwa nda Zakup ana ta wa ya

19 Araha na bazlam gà ɓəza Izak kəla Abəraham a: 20 I təv ana Izak a ge mive dzik faɗ a ka, a zla daala. Zləm dəm ata ka, Rebeke, dəm Betuwel gà Aram. A ndzawa ka, i Mezapitamiya. Dite Rebeke tekeɗe ka, damər Laban. 21 Ama Izak a hama a BATSAH kwa ŋa, aɗaba məkəs ŋgar, agəra na aka war kəla tsiye. BATSAH kwa ŋa a gəs meheme ŋgar ata, na dite məkəs ŋgar Rebeke a ŋgat kəla ya. 22 Aləka a ŋgat kəla ata ka, gà mawusa, ta ge a maàga i hitwis. Rebeke a gwa: « Na kataya ana, aàmala na dukw aaha a tehiŋ za a gər a?» A daha, a tsam aà BATSAH kwa ŋa. BATSAH kwa ŋa a gwaɗar: 23 « Gà slàla sula na i hitwis yak a. Gà slàla ŋa ata ka, ti teretser a ba daga i hitwis yak a. Aɗaba gwala ŋgiɗ ilik a zè a biy ŋgiɗ nda ndzəɗa batsah ŋana, a ger a megemir a kə̀la ŋana.»ggg

24 I təv ana mawà kəla ŋgar a ndze aɗəm a ka, gà mawusa na i hitwis ŋgar a kaɗəŋ. 25 Malahalah ŋana a dara i hitwis a ka, a ndza wuzak wuzak, ba ŋgar fit dze ka, madwaskwa ŋa bàsùksùkkwa, kamala petek ana ŋguz ihər hinne ya. Aɗaba taŋa na tə zalar Isuwa ya. 26 I dəba ŋa ya, damər ŋa a dara i hitwis a ka, ahər ŋgar tislsle magəsa ŋa à dìdìgil sik Isuwa. Agəra taŋa na tə zalar Zakup ya. Akahər ana ta wa gà ɓəza ata ya ka, Izak aka ge mivè dzik ndilik.

Isuwa a kal à zləm ŋgar aba biy batsah kəla ya a damər ŋgar kə̀la ŋana

27 Aləka gà ɓəza ata ta gala ba ka, Isuwa a ne mala mekwète ana ŋgwal ŋa lele ya. A sùwayawa ka, i dala i kusak. Ama Zakup ka, a ndzawa i ma. 28 Izak ka, a waya Isuwa, aɗaba ana slu dukw dala a dzəm aà ŋgat ka, hinne ya. Ama Rebeke ka, a waya Zakup.

29 A pat duwa Zakup a de a dukw mezime, aləka a de dukw mezime ata ka, Isuwa aka màra i dala ya, may a wir ahər a hinne.hhh 30 A gwaɗa a Zakup: « Kamkam, viliŋ dukw mezime yak aaha nduzzwa ŋa ya, i zim a te, aɗaba may a wir aà iye a ka, hinne.» (Aɗaba taŋa na tə zalar gwala Edum a.)

31 Zakup a gwaɗar: « Say keliŋ à zləm yak ana biy batsah kəla ya dzekwiŋ.»

32 Isuwa a gwaɗar: « Araha, Yàa à mimìte ana, dukùla na a giŋ a ŋgulum i zləm ana biy batsah kəla ya?»

33 Zakup a gwaɗar asa: « Say ki mbeɗiŋ a i sida ya dzekwiŋ, na dite i vilek a ya.» Isuwa a mbaɗar, a kalar à zləm ŋgar ana biy batsah kəla ya, a damər ŋgar Zakup. 34 I dəba ŋa ya, Zakup a ndzək gà ɗaf ata nda ayer ata a de muɓulùh ŋa ya, a vəl a Isuwa. A zəm, dite a sa aaka yam, i dəba ŋa ya, a mah ba, a daba kuɗa. Kamala taŋa ya na Isuwa a fə̀r aà zləm ŋgar ana biy batsah kəla ya ka, kamala dukw masakəŋa taf a.