Abəraham a səkəm təv dive Saray
23
1 Sara aka ndza aà bəra ka, mivè dərməka nda dzik səla gəra təsəla (127), na dite a mət a. 2 A mət ka, i Kiriyat-Arba ana tə zalar Hevrun ika ahəɗ Kanan a. I təv ana a mət a ka, a tsəɓ a Abəraham, a tuwa hinne. 3 I dəba ŋa ya, a hitse, a miyak à məməta məkəs ŋgar ata tə̀ma. A da a təv gà Hittiya aà mewize aà tar təv mele dive ŋa. A gwaɗa a tar: 4 « Iye i faha ka, i slele, Yàa ndza hinne tsa na i təv kurum a. Ama ka, kamkam, vilwimiŋ təv melè dive ŋa i təv kurum i faha, na dite i le aɗəm a məkəs gà aaha a mət a ya.»fff 5 Gà Hittiya ta gwaɗar aaka a Abəraham: 6 « Dede, tsaraka kwaŋ. Kər ka, Əbay batsah ŋana i liwiŋ mə̀r a, daha, yaha ŋgwal dive ana lele, a za dər gà dive tserdze ya. Dite ka le aɗəm məməta məkəs yak, wura a pelek a ahəm aà melè dive tsa.» 7 I dəba ŋa ya asa, Abəraham a hitse aà mbulum, dite a həna à gər a bəɗ a gà Hittiya, a gà mburma ana ika ahəɗ ata ya, 8 a gwaɗa a tar: « Na kà wayum i le məməta gà a faha ka, kamkam wizwimiŋ təv aà Efrun, kəla Dzuhar, 9 mi viliŋ biye ana sləlak Makəpala ya. Biye ata ka, ar aà guva guvah ŋgar. Mekeliŋ dər, i viler a siŋgwe ŋgar kalkal lele, na dite a ne a təv melè dive gà ana i lewa aɗəm a məməta gà ɗa ika magər kurum a.»10 Akahər ana Abəraham riŋ a tsik a ter a ya ka, Efrun a riŋ mandza ŋa i liwiŋ gà asiŋ gà Hittiya ana mayahaba gər ŋa ika dàlàbə̀rà aà guva biye hərmaga kwite ata ya. A gwaɗa a Abəraham ika miɗ gà asiŋ gà Hittiya ana tar riŋ i fata ya tserdze. 11 A gwaɗar: « Awaŋ dede, i vilek a guvah ata ka, taf masakəŋa, nda biye ŋa ata riŋ i sləlak a fit dze. I vilek a ka, ika miɗ gà mburma ana i gwala gà ya tserdze, na dite ki le aɗəm a məməta yak a.»
12 Abəraham a həna aà gər a bəɗ aka miɗ gà mburma ata ika ahəɗ ata ya asa. 13 A fàfəl a Efrun ika miɗ tar tserdze, a gwaɗar: « Kamkam i vilek a siŋgwe guvah yak, gəs aà iye ya dzekwiŋ, na dite i le aɗəm a məməta məkəs gà ya.» 14 Efrun a gwaɗar aaka a Abəraham: 15 « Dede, tsaraka kwaŋ, aɗaba guvah aaha tsakala ŋa ka, kur siŋgwe dərməka faɗ, ama duwa a riŋ i siŋgwe ka, hinne tsa, zlaba, ka le aɗəm məməta yak pəra.»
16 Kamala taŋa ya, Abəraham a da a ma, a daha, a ndzəkara siŋgwe ata ya, a ɗama a Efrun dərməka faɗ kamala ana a tsahən aà gà ɓəzla sida ana a tsik a tar tserdze ya. 17 Kamala taŋa ya, Abəraham a səkəm guvah aà Efrun a ya i Makə̀pala i təv ana tə zalar Mamre ika tseke pat ana a mbəzawara ya. A səkəm guvah ata sləlak iɗəm a, akaba nda gà dizl ɗaf ana iɗəm a fit dze, 18 a ne biy ŋgar ika miɗ gà asiŋ gà Hittiya ata mayahaba gər ŋa ika dàlàbə̀ra aà guva biye hərmaga kwite ata ya tserdze.