Mbulum a dzik à Abəraham
22
1 I dəba gà dukw ata tserdze ya ka, Mbulum a da a təv Abəraham, a daha, a dzik à ŋgat, a zalar, Abəraham. Abəraham a ŋgamar aaka, a gwaɗar: « Waalaw.» 2 Mbulum a gwaɗar: « Zla Izak kəla yak aaha mifèndèz ŋa ilik, kà waya ŋgat hinne ya, ka da dər aka ahəɗ Muriya. Kàa ndzwimaha a fata ka, ki kìɗiŋ a i dìyes ata i ɗifek dər a, dite ka wànà kamala dukw masakəŋana ta vilewiŋa.» 3 Kamala taŋa ya, Abəraham a hitse i mèkwède hedwe, a dza duwa aka hezweŋe, a ndzək tsalaka, dite a zla kəla ŋgar ata, a ndzək ahər gà gawla ŋgar sula. I dəba ŋa ya, a ta zla ikaba tsalaka ata a ta veke a dər kəla ŋgar ata ya. Dite ta mah ba, tə da a təv ana Mbulum a tsiker a. 4 Tə ndza aà vatwa mehinne makər ka, Abəraham a fə̀r ikaba ya, a ŋgataha a təv ata dìreŋ. 5 A gwaɗa a gà gawla ŋgar ata sula ya: « Ndzum a faha nda gà hezweŋe aaha. Ama mə̀r nda kəla gà ka, mìi tsele a faaka, mìi ti dze a gurmits a bəɗ a Mbulum, mìi zèmbeɗe a à ŋgat i fata, dite i dəba ŋa ya ka, mìi mbiɗere a gər a təv kurum a faha ya.» 6 Abəraham a ndzək tsalaka ata a ta wenere a dər duwa a Mbulum a, a dàn, a tiker aka gər a Izak. ŋgat nda ahər ŋgar ŋa a zla akwa, dite a zla ahər awis asa. Ta mah ba sula məma nda kəla ŋgar ata, tə da. 7 I təv ana ti de a ya ka, Izak a fàfəl a tsir ŋgar Abəraham, a gwaɗar: « Dede ga.» Abəraham a ŋgamar aaka: « Iye naha dəm gà.» Dite Izak a tsam ahər, a gwaɗar: « Naha gà akwa nda gà tsalaka aaha à ma ya dzena, təmaŋ ana i ŋga, na ki ta vekeme a dər a?» 8 Abəraham a gwaɗar aaka: « Dəm ga, Mbulum ŋa nda ahər ŋgar na a ta vileme a təmaŋ ana ki kìɗeme a, dite ki vekeme a ya.» I dəba ŋa ya, tə dza ba aà mede kuɗa. 9 Aləka ti ndzeha a təv ana Mbulum a tsik a Abəraham a ka, a daha, a zlazl təv ana ta bets aɗəm a duwa a Mbulum a i fata. A haɓa iba à tsalaka ya, a dza aka gər təv məbatsa dukw ata a Mbulum a, dite a gəs kəla ŋgar Izak a dzaw, a tike zlə̀làw aka gər tsalaka ata a dza aka gər təv ata ta bets aɗəm a duwa a Mbulum a. 10 Abəraham a daha, a zla awis ŋgar aaha, a zle a dər ɗa a kəla ŋgar. 11 Ama i fata ya tsara ka, gawla Mbulum a zalarra a Abəraham i gər ŋa i mbulum a: « Abəraham, Abəraham.» A ŋgamaraha waalaw. 12 Gawla Mbulum ata a gwaɗarra: « Mandza, kə̀ kəɗ kəla yak tsa, kə gàr duwa kwizikw tsidze. Kinehe ka, i sə̀r kàa niwiŋ à kəla yak aaha mifèndèz ŋa ilik a tsa, aɗaba ana kə̀ gəs ahəm aà Mbulum a.»13 I dəba ŋa ya, Abəraham a fə̀r ikaba ya ka, aka ŋgat a hàgwàlà təmaŋ aà dəba ŋgar hə̀ndə̀slsla, madànà ŋa i mbukum a i ga adak ata. Abəraham a daha, a gəs, dite a kəɗ a Mbulum avukw kəla ŋgar ana à kìɗer a zləmana ya. 14 Aɗaba a zal a təv ata ka, Mbulum a sle a aà məvəla duwa a wur ana duwa a sle ahər a ya. Daga aà gər taŋa ya haa kinehe tə zalawa a diyis ata ka, təv ana Mbulum a sle aà məvəla iɗəm duwa a gà na duwa a sle aà ter a ya.
15 I dəba ŋa ya, gawla Mbulum a zalarra a Abəraham a masula ŋa i gər ŋa ya, a gwaɗarra: 16 « Iye ihər i tsikik a i sida ya nda zləm gà ŋa, aɗaba ana kàa niwiŋ à kəla yak aaha ndzer ŋa mifèndèz ŋa ilik a tsa, 17 kàa giŋ ŋgwal ŋa, ama i pisak a ahəm, gà ɓəza yak ta we a ba hinne, kamala gà mawusawus ana aà gəza mbulum a, kige tsa kamala hewiyeŋ ana i dula ya. Gà ɓəza yak ka, ti ta mbèwe a aà gà ɓəzla mene are tar ana tserdze ya.ddd 18 Aɗaba gà mburma ana ika gər ahəɗ a tserdze ti ti yehe a mipise ahəm i təv ga ya kamala ana i vəl a gà ɓəza yak a, agər ana kər kə̀ gəs bazlam gà ya.»eee
19 I dəba ŋa ya ka, Abəraham a mbəɗ gər a təv gà ɓəzla meslire ŋgar aaha, tar tserdze ta mah ba, tə da a Beer-Seva, tə ndza i fata.
Gà ɓəza Nahur damər Abəraham
20 I dəba gà dukw ata tserdze ya ka, gà mburma tə daha, ti tsik a Abəraham, ta gwaɗar: « Milka ka wa gà ɓəza a damər yak Nahur mbaŋa. 21 Gà ɓəza ata ka, Us na maləkwara ŋgar a, dite Bus mimbe gər ŋgar nda gà Kemuyel ana a wa Aram a. 22 Dite gà Keset nda Hasu, nda gà Pildas, nda gà Yiɗlaf nda Betuwel.» 23 (Betuwel ana a wa Rebeke ya.) Gà ɓəza ata tsamakər a ka, Milka na a wa a Nahur damər Abəraham a. 24 Nahur ka, a ŋgat gà ɓəza ŋgiɗ faɗ asa. Ɓele ŋgar duwa tə zalar Remwa na a war a. Gà ɓəza ata ka, gà Tebah nda Gaham, nda gà Tahas nda gà Maakiya.