Madzəba 21

Mawa Izak?

1 I dəba ŋa ya, Mbulum a dara a təv Saray ya, a piser ahəm, a ger kamala ana a tsiker a. 2 Dite ka, Saray a ŋgat kəla. A ndze tits a təv ana Mbulum a tsiker a ka, a war kəla a Abəraham asləka ŋa. Akahər ana ta wa kəla ata ya ka, mivè Abəraham aka ge dərməka, aka ge màndawal herem herem kweleŋ.xx 3 Abəraham a ɗe zləm a kəla ata Saray a war a, a zalar Izak. 4 I təv ana Izak a ge mehinne tsamakər a ka, Abəraham a sàs ŋgat kamala ana Mbulum a tsiker a.yy 5-6 I dəba ŋa ya, Saray a gwa: « Mbulum aka viliŋ maŋgayaba hinne, ku mege weke a tsereke a ka, a ŋgeye a ba nda iye.» 7 A gwa asa: « Wura aka tsik a Abəraham ilik ka, Saray a ta vile a awah a kəla tsa. Aɗaba kinehe ku mege iye màndawal ŋa herem herem tekeɗe ka, Yàa war kəla asləka ŋa.» 8 I dəba ŋa ya asa, Izak a gəl ba, a miyak à masà awah. A pat ata ka, Abəraham a de ɗaf hinne, ta ŋgaya dər ba, aɗaba kəla ata.

Abəraham a dalawa gà Hagar nda kəla ŋgar Ismayila

9 A pat duwa Ismayila kəla ana Hagar dəm gà Ezipt a wa a Abəraham a, a riŋ à yèhe a ahəm aà Izak kəla Saray, a sawla aà ŋgat. Saray a ŋgatar kataya ka, a tsahən ahər tsa. 10 A da a təv Abəraham, a daha, a gwaɗar: « Dalawa kəla ɓele aaha. Aɗaba i waya tsa na gà kəla ɓele ti zim a ga yak nda Izak kəla gà məma ya.»zz

11 Abəraham a tsaraka kataya ka, a tsəɓar hinne, aɗaba ana Ismayila tekeɗe ka, kəla ŋgar mbaŋa ya. 12 Ama Mbulum a gwaɗa a Abəraham: « Mà tsə̀ɓak aɗaba kəla ɓele aaha kamala taŋa ya tsa. Ge ka, dukw ana Saray a tsikik a tserdze, aɗaba ti ta zel a gwala yak ka, nda təv Izak tsəka, nda ahər Ismayila tsa. 13 Ama kəla ɓele aaha ŋgat tekeɗe, i ti ne a à ŋgat slàla batsah ŋa. Aɗaba ŋgat ka, kəla yak mbaŋa.»

14 Aɗaba taŋa, i mèkwède hedwe ka, Abəraham a hitse, a ndzək dukw mezime, a zla duwa kwiye, a tə̀f aɗəm yam. A vəl a Hagar. A tike dər aka dzegwim ŋgar. Dite a zla kəla ŋgar aaha, a vəlar mbaŋa asa, a dalawa tar. Hagar a mah ba, a da a kusak, a dzeye riŋ i dala i kusak i kwite duwa tə zalar Beer-Seva. 15 Aləka i təv ana yam a ndəv aà tar i kiywa kwiye ata kamala duwa ya ka, a tike aba kəla ŋgar a ga bagwar a. 16 Dite ŋgat ŋa a da i fata ya kətsah a zlawak zaakwa, izaɗ meye simir ide. A daha, a ndza a bəɗ ɗegìrgìr nda təv kəla ŋgar ata. Aɗaba a dzala ka, a gwa: « A sèsiŋ na i ŋget a a məməta kəla gà ya tsa.» I təv ana a ndza a bəɗ, à fìre ahəraha ya ka, kəla ata a dza ba aà tuwa.

17 Aləka Mbulum a tsaraka tuwa kəla ata ka, a slərra gawla ŋgar a, a zalarra a Hagar i gəza mbulum a, a gwa: « Labara là, Hagar? kige magəɗa tsa, aɗaba Mbulum aka tsaraka tuwa kəla yak ana a tiwe a i fata ya. 18 Hitse, daha, zla kəla yak akahər humbut, aɗaba i ti ne a à ŋgat slàla batsah ŋa.»

19 Mbulum a hə̀ndə̀kar are a Hagar, na dite a ŋgataha a biye yam a. A hitse, a daha, a zla duwa kwiye ŋgar ata a təfara aɗəm yam a, a daha, a vəl a kəla ŋgar, a sa. 20-21 I dəba ŋa ya, Mbulum a pise ahəm a kəla ata, a gəl ba, a ndzawa i dala i kusak i kwite duwa tə zalar Paran. ŋgat a ne mala mekwète ana lele, simir ŋgar à me a a bəɗ taf masakəŋa tsiye. Aləka i təv ana a ge gawla ya ka, mama ŋgar Hagar a zlarra daala ika ahəɗ Ezipt ya.

Gà Abəraham nda Abimelek tə sər ba

22 Akahər ata gà Abimelek nda Pikul Əbay gà sliwdze ŋgar, tə da a təv Abəraham, tə daha, ta gwaɗar: « Kər ka, Mbulum a riŋ a pisak a ahəm i təv gà dukw ana ki ge a tserdze ya. 23 Ama kinehe ka, tsikiŋ i sida ya nda zləm Mbulum, na dite ki sle aà mibene a iye asa tsa, ku mege gà ɓəza gà, ku gà ɓəza gà ɓəza gà tekeɗe ya. Kamala ana iye i gik ndzer a ka, kər tekeɗe, giŋ ŋgwal ŋa kamala taŋa ya ika ahəɗ aaha kər mandza ŋa ɗa iɗəm a te.»

24 Abəraham a gwaɗar: « Haya, Yàa tsikik i sida ya, kamala ana kà tsik a.» 25 I dəba ŋa ya, Abəraham a tsik a Abimelek bazlam sùwà ana gà ɓəzla meslire ŋgar tə zla aà ŋgat a ya. 26 Abimelek a gwaɗar: « I sər wur ana a ge kamala taŋa ya tsa. Aàla na kà tsikiŋ piŋŋe tsiye? Iye ka, Yàa tsaraka dukw ata ilik tsa, say mbakum.»

27 Dite Abəraham a ndzək gà təmaŋ nda gà sla, a dzàɗar a Abimelek. Tar sula məma ta dàn masəra ba tar i sida ya. 28 Abəraham a ndzək gà təmaŋ təsəla, a dza tar təv tar pam. 29 Abimelek a tsam aà Abəraham, a gwaɗar: « Naha dzena, ki ge a dər là na nda gà təmaŋ aaha təsəla, kà hitse aà tar təv tar pam a?» 30 Abəraham a gwaɗar aaka: « Gà ɓəza gà təmaŋ aaha təsəla ya ka, i dzàɗak a kər, gəs aà iye ya, na dite ka, mburma ti sir a dər, iye na a le sùwà aaha ya ya.» 31 Aɗaba taŋa na tə zalawa a təv ata ka, Beer-Seva ya, kamala megweɗe ya ka, masəra ba. Agəra ana tar sula məma ta gəs ba aà masəra ba i sida ya ka, i fata ya. 32 Kamala taŋa ya, dukw ana ti tsik aba i sida ya ka, i kwite Beer-Seva. I dəba ŋa ya, gà Abimelek nda Pikul Əbay gà sliwdze ŋgar, ta hitse, ta mbəɗ gər aka ahəɗ gà Filistiya. 33 Dite i dəba ŋa ya, Abəraham a dzəv dizl mbəlar a kwite Beer-Seva a fata, a təv ana ŋgat mandza ŋa iɗəm a. A zàmbaɗa à Mbulum ana ŋgat à mite a tsidze ya, i fata nda meheme. 34 Abəraham aka ndza ika ahəɗ gà Filistiya i fata ka, mehinne diŋ dze.