Madzəba 20

Bazlam aka gər gà Abəraham nda Abimelek

1 I dəba ŋa ya, Abəraham a hitse i fata ya, a da aka ahəɗ ana ndaka tseke gular a. A daha, a ndza aka magər gà kwite Kades nda Sura. Akahər ana a ndza i Gerar zaakwa tə̀ma ya ka, 2 a gwaɗawa aà Saray məkəs ŋgar: « Naha ka, damər gà.» Ama Əbay duwa a riŋ i fata, zləm ŋgar Abimelek, a tsaraka kataya ka, a slər mburma, aà mazlarra Saray a ma ŋgar a aà daala. 3 Ama i dəba ŋa ya, Mbulum a da a təv Abimelek ndaavəɗ i sunwa ya, a gwaɗar: « Ki mìtiŋa, aɗaba daala aaha kà zla ya ka, məkəs mburma.» 4 Ama Abimelek ka, aka sìrìk aà məkəs ata zukw tsa. Aɗaba taŋa a gwaɗa a Mbulum Əbay gà: « Wànà a sàsak medzeye à gà mburma ana bakal tar riŋ tsiye ya? 5 Aɗaba Abəraham na a gweɗiŋ, məkəs aaha ka, damər gà ya. Məkəs ŋgar tekeɗe ka, a gwa, damər gà mbaŋa. Gəzləŋ ga ka, tsəɗaŋŋa, bakal gà a riŋ tsa.» 6 I dəba ŋa ŋa ya, Mbulum a gwaɗa a Abimelek i sunwa ya asa: « Iye tekeɗe, i sər ka, kàa ge bakal tsa, gəzləŋ yak ka, tsəɗaŋŋa. Aɗaba taŋa na, i pala ahəm, Yàa vəlak vatwa aà mahə̀nà nda məkəs aaha tsiye. 7 Kinehe ka, màraha à məkəs Abəraham dukw ŋgar, aɗaba ŋgat ka, mala məma à guma gà. Kàa màr dərraha ka, a heme a a Mbulum, aɗaba kər, na dite ki mite a asa tsiye. Ama kəla ka, na kàa màraha à məkəs ŋgar tsəka, ki metwim a nda gà mburma ana i ma yak a, nda gà dukw yak fit kweleŋ.» 8 I mèkwède ŋana hedwe ka, Abimelek a daha, a zal a gà ɓəzla meslire ŋgar. A tsik a tar gà bazlam ata tserdze. Gà mburma ata tə tsaraka kataya ka, ta ge magəɗa hinne. 9 I dəba ŋa ya, Əbay ata a zalaha a Abəraham, a gwaɗar: « Aàla na ki ge aà iye kataya dzeye? Wànà dukùla na a da à kər a bakal a? Na dite ka zla aka iye ara batsah bakal aka mekwere gà ya ya? Ki giŋ naha ka, dukw ana biy metsike tsiye.» 10 Abimelek a fàfəl a Abəraham asa, a gwaɗar: « Ka dzala là dzeye, na ki kige aà iye kamala taŋa ya ya?»

11 I dəba ŋa ya, Abəraham a gwaɗar aaka: « Aɗaba i dzala ka, i gwa, ɗa i kwite aaha ka, wura a riŋ na a ge a magəɗa a Mbulum tsiye. Ti ta kiɗ a iye, agəra məkəs gà, dite ti zlebiŋa. 12 I tsik kataya ka, damər gà kaɗəŋ ndzer, aɗaba tsir mə̀r ka, ilik. Ama kəla ka, məmər ŋgar ka, pam. Aɗaba taŋa, ŋgat a ne məkəs gà. 13 Akahər ana Mbulum a gweɗiŋ: Miyak à gà tsir yak, ka da a təv ŋgiɗ pampam a ka, i gwaɗa a Saray məkəs gà: Ku mege ki tème a nda wara tserdze, təv ana kàa tama aɗəm a, ki gweɗe a aà iye a ka, damər gà, na dite ta kiɗ a iye tsiye.»

14 Ama Abimelek a ndzək gà təmaŋ nda gà sla, nda gà ɓele ana gà asləka ŋa ya, nda gà na gà dəm ŋa ya, a dza a Abəraham. Dite a màr à məkəs ŋgar Saray mbaŋa. 15 I dəba ŋa ya asa, Abimelek a gwaɗa a Abəraham: « Samata ahəɗ aaha ika miɗ yak ki ŋgeter a tserdze ya, na a kwere a ka, iye. Ndza ba ka, lele kamala ana kà waya ya.» 16 Dite a gwaɗa a Saray mbaŋa: « Araha, Yàa dza kur siŋgwe a damər yak dəbuw, na dite gà mburma ana mandza ŋa i təv yak a ti sir a dər ka, bazlam riŋ asa tsiye. Kamala taŋa ya, ki ndze a ika miɗ gà mburma tserdze ka, tsəɗaŋŋa, ku weke a sir a ka, bakal riŋ tsa.» 17-18 Akahər ata ka, Əbay Mbulum aka dàn gà məkəs Abimelek aà mawà kəla ya, aɗaba Saray. Agəra taŋa na, Abəraham a hama a Mbulum, dite mə mbəl à gà Abimelek nda gà məkəs ŋgar, nda gà ɓele ŋgar ana gà dəm ŋa ya tserdze, na dite ta we a kəla asa ya.