Madzəba 19

Bakal gà Suduma nda Gumura tserdze

1 Aləka i hawa ŋa ata tsara ka, gà gawla Mbulum ata sula ya, ti ndze a kwite Suduma. Tə daha ka, Ludu a riŋ mandza ŋa aà guva biye hərmaga kwite Suduma. A fə̀r ikaba ya ka, aka ŋgataha a gà gawla Mbulum ata. A hitse, a daha a təv tar. A daha, a dza gurmits a bəɗ aka miɗ tar. 2 A gwaɗa a tar: « Kamkam gà wele, ka dum à gà ɓele kurum a tsa, dumara, ta hənum a ma gà, tə̀ tə̀f a kurum yam, ka barayum gà sik kurum. Dite i mèkwède hedwe ka, ki mèhwim a ba, ki dwim a dukw kurum.» Ta gwaɗar: « Awaŋ, mìi hinne a aka varavada pəra.» 3 Ama Ludu a hama a tar hinne, na dite tə da a ma ŋgar a. Ti ndzeha a ma ŋgar ka, a tə̀f a tar yam, tə sa. I dəba ŋa ya, a de a tar ɗaf, tə zəm asa mbaŋa. 4 I təv ana tàa dza ba aà mehinne zukw tsiye ka, gà mburma ata i kwite Suduma ya, tə daha tserdze, gà gawla gà mburma nda gà màndawal ŋana, tits ti lawara ga ŋgar. 5 Tə zalaha a Ludu a ga, ta gwaɗar: « Gà mburma ana tə dara a ma yak kinehe ndaavəɗ aaha ya ana, tar i ŋga? Gasara tar a təv mə̀r a faha ya, mìi hinne a nda gà tar kamala ana mì hənawa nda gà məkəs a.» 6 Ludu a tsaraka kataya ka, a dara a təv tar a bəra ya, a hitse aà guva biye hərmaga, tits a màra aɗəm à dukw mahəndəka ŋa ga ya nda dəba ya. 7 A dara, a gwaɗa a tar: « Gà masla gà, kamkam kurum ki gwim a tar duwa tsidze, aɗaba tar ka, gà mbəlakw gà.» 8 Araha gà ɓəza gà dəm i ma gà sula, tàa da a zal zukw tsa. I gese a a kurumara, ki gwim dukw ana a sàs a kurum a nda tar, tsəka, gà mburma aaha ka, ki gwim a tar duwa tsa, gà mbəlakw gà.» 9 Ama tə tsaraka bazlam Ludu ata a tsik a tar kataya ya ka, ta gwaɗar: « Da i faha ya, wànà kər slele taf masakəŋa ka dara a faha ya ka, a sàsak mege aà mə̀r seriye ana, meme dze ya? Yawwa, kinehe ka, mìi gik a dukw ana ŋgwala tsiye, à zè a biy gà mburma aaha kuɗa na kataya ya.» Tsam ka, tsisl ta gəs Ludu, ti sìrikaha aà guva biye hərmaga, ti nis a à dukw mahə̀ndə̀kà a ga ata. 10 Ama gà gawla Mbulum ata sula ya, tə dzakara gà ahər tar a bəra ya, ta kə̀zalaha aà tar Ludu ya, kùm ti yàha a ga a təv tar, tits ta mà aɗəm à dukw mahə̀ndə̀kà a ga. 11 I dəba ŋa ya, ta geye guluf à gà mburma ata ɗa i bəra ya fit, ta ŋgat a vatwa asa tsa, tàm tàm tàm ti yaba aà mayaha biye hərmaga.

Mbulum a ndzəkara ga Ludu i kwite Suduma ya

12 Gà gawla Mbulum ata sula ya ta gwaɗa a Ludu: « Na bəla gà mburma yak ɗa i faha, ku mege malpa yak, ku mege gà ɓəza yak gà asləka ŋa, ku gà dəm ŋa tserdze, ku mege weke na wura yak a riŋ i huɗ kə̀sà aaha ka, ndzək tar i faha ya. 13 Mì dara ka, mìi dzeye a à təv aaha. Aɗaba Mbulum aka tsaraka dukw bakal gà mburma aaha i kwite Suduma ta ge ya ka, hinne. Agəra taŋa na a slərra mə̀r aà medzeye à kwite aaha ya ya.» 14 Ludu a tsaraka kataya ka, a da a ta metsike a gà makasl gà dəm ŋgar. A gwaɗa a tar: « Màhakwaba, kà tàkwa i faha ya, aɗaba Mbulum a waya medzeye à kwite aaha.» Ama gà makasl gà dəm ŋgar aaha tə tsaraka kataya ka, tə dzala, ta gwa: « Wele aaha a ge ana dukw sawla là na naha ya.»

15 Aləka mbulum a dəv i mèkwède ŋana tsara ka, gà gawla Mbulum aaha ta gwaɗa a Ludu: « Mah ba i faha ya tsəma, zla məkəs yak nda gà dəm yak aaha sula ya, ka dum tsara, na dite ki dzeywim a a seriye bakal gà mburma ana ɗa i kwite aaha ya tsiye.» 16 Aləka Ludu a məts aà duwa, a de a bise tsəka, gà gawla Mbulum ata tə daha, ta gasa tar i ahər a nda gà məkəs ŋgar a, nda gà dəm ŋgar ata sula ya, aɗaba ti ndze are tsehe a Mbulum hinne. Tə ndzəkara tar i huɗ kə̀sà ata ya, tə da à tar aà guva kə̀sà. Tə daha, tə dza tar a fata.uu

17 I təv ana tə ndzəkara aba tar a fata ya ka, gawla Mbulum ŋgiɗ ilik a gwaɗa a tar: « Tə̀zum, na dite ki beywim a ya. Ka ta mùmara à are a ndàra a dəba ya tsa, Ka ta hitswim ika vatwa ɓav tsa asa. Tə̀zum a dìyes, na dite ki dzeywim a tsiye.»

18 Ama Ludu a tsaraka kataya ka, a gwaɗar aaka: « Awaŋ Batsah ga ŋa. 19 Kamkam, i ndzek are tsehe te tsiye, araha kàa giŋ ŋgwal ŋa hinne ya, kàa be à mesife gà ka, i sle a aà mivele a a dìyes tsa, aɗaba bəla ələk i ti ndze a a fata ka, medzeye aka le aà iye ana, meme? 20 Kə ŋgataha a kə̀sà aaha kəla ŋa ya tsiye, ar ka, bise ya? Viliŋ vatwa i vele a a fata, na dite i be a ya.»

21 Gawla Mbulum ata a gwaɗar: « Lele, Yàa gəs bazlam yak ata. I dzeye a à kə̀sà ata tsa. 22 Tə̀zum a fata tsəma, aɗaba i sle a aà mege duwa tsa na kàa ndzwim a fata zukw tsiye.» Aɗaba taŋa na tə zal a kə̀sà ata Dzuwer a, kamala megweɗe ya ka, kəla ŋa.

Mbulum a dzeye à gà kwite Suduma nda Gumura

23 I təv ana pat à mbizera ya ka, Ludu aka ndze a kə̀sà Dzuwer kuɗa. 24 I fata ya tsara ka, Mbulum a dzawara à zlir akwa ana kamala kur a, i gəza mbulum a, ŋgazay ŋgazay aka gà kwite Suduma nda Gumura ya. 25 A wànà gà kə̀sà ata nda gà kə̀sà ana ta mbereha ya fit akaba nda gà mburma tar ana mandza ŋa iɗəm a, dite nda gà dukw ana tə sləlaya ika ahəɗ a fit leyèh leyèh. 26 I təv ana ti de a mba ya ka, Mbulum a gwaɗa a gà Ludu: « Ka ta mumara à are a dəba ya tsa.» Ama məkəs Ludu a màra à are a dəba ya aha ŋana tsam ka, aka ne sluwəl kamala mandwaŋa kur a swaŋŋà.ww

27 I mèkwède ŋana hedwe ka, Abəraham a wile, a da a təv ana a hitse aka miɗ BATSAH kwa ŋa akahər ata ya. 28 A fə̀raha a bəɗ aka gà kwite Suduma nda Gumura, nda gà kə̀sà ana ta mbereha ya fit dze. A samata, gà hədzək ana iɗəm a ka, tìtìktìkka kamala hədzək ana a dere a i batsah akwa ya. 29 I təv ana Mbulum a dzeye à gà kwite ata i tùlwah a fit ka, a dzala gà gər aka Abəraham, aɗaba taŋa a be à Ludu nda zayzay lele. Ama a dzeye à gà kwite ata Ludu a ndzawa iɗəm a.

Gà Ludu nda gà dəm ŋgar ana sula ya

30 I dəba ŋa ya ka, magəɗa a ge a Ludu, aà mendze i kwite Dzuwer. Aɗaba taŋa a ndzək gà dəm ŋgar ata sula ya, tə tsala a gər kwite. Tə ta mendze a sləlak. 31 A pat duwa, dəm ŋgar malə̀kwara ŋana a gwaɗa a damər ŋgar a kə̀la ŋana: « Araha tsir ma ka, màndawal ŋa, dite waala zal riŋ i faha na tì dzik a ma aà daala, na dite ki weme a gà ɓəza kamala gà məkəs ana ta weye a gà ɓəza ika ahəɗ tserdze ya tsa ana, meme? 32 ŋgulum dara, ka vəlama guzum a tsir ma hinne, aka kwaya dər ka, ki hinnekwe a nda gà ŋgat, na dite ki ŋgeteme a mawà gà ɓəza i təv tsir ma ya ya.»

33 Aləka hawa a ge ka, tə daha, ta vəlar guzum hinne, a kwaya dər. Dite dəm ŋgar malə̀kwara ŋana ata a daha, a hənaha a təv ŋgar. Ama tsir ŋgar a sər ka, ndeɗime na a həna a təv ŋgar, kige tsa ndeɗime na a hitse i təv ŋgar a ka, a sər tsa. 34 I mèkwède ŋana ka, dəm ŋgar a malə̀kwara ŋa aaha, a gwaɗa a damər ŋgar kə̀la ŋana: « Ndavana ka, mə̀r maa həna nda tsir mà. Ama ndaavəɗ aaha vəɗəna ya ka, vəlamar guzum hinne, makwaya dər asa. Dite ka, ki hinwime a nda kər mbaŋa te, dite ki ŋgeteme a mawà gà ɓəza i təv tsir ma ya.»

35 Aləka həvəɗ a ge asa ka, tə daha, ta vəl guzum a tsir tar hinne, a kwaya dər asa. Dite dəm ŋgar a kəla ŋa ata a daha, a hənaha a təv ŋgar. Ama tsir tar ata ka, aka sər ndeɗime na dəm ata a hənaha a təv ŋgar a, kige tsa, ndeɗime na a hitse i təv ŋgar a ka, a sər ɓav tsa asa mbaŋa.

36 Aləka i dəba ŋa ya, gà dəm Ludu ata ta ŋgataya kəla kuɗa. 37 Aləka a ndze aka kiye dəm aaha batsah ŋa ya ka, a wa kəla ŋgar asləka ŋa. A zalar Muwab. ŋgat a ne tsir gà Muwab ana ika magər kwa haa kinehe ya. 38 I dəba ŋa ya, dəm kə̀la ŋana tekeɗe, a wa kəla asləka ŋa mbaŋa. A zalar Ben-Ami. ŋgat a ne tsir gà Amuni ana ika magər kwa haa kinehe ya mbaŋa.