Madzəba 18

Mbulum a tsik bazlam mawà Izak a Saray i sida ya

1 Mbulum a dara, a pàt aba a Abəraham aà huɗ dizl ɗaf ata batsah ŋa, tə zalar dizl ɗaf Mamre, ŋgat riŋ mandza ŋa ika hərmage i mekiriwe ga petek ŋgar ata aka təv ana pat a zlara ahər a mbulum a ya. 2 A fə̀r ikaba ya ka, aka ŋgataha a gà mburma makər, gà mehìtsè ŋa dzìrìkka. Meŋgete ana a ŋgat a taraha tsara ya ka, a hitse, a mbàha aba aà melime nda gà tar. A daha tsara ka, a kirik a bəɗ aka miɗ tar.pp 3 A gwaɗa a tar: « Gà wele aaha, kamkam ka dum aà ɓele kurum a tsa, i ge a kurum a gər, taŋa na megemir gà ya.» 4 Dumara, ti yaha a kurumara yam a zaakwa, aà məbara gà sik kurum a, kà sìfìkwim ba aà huɗ sìsiye a faha, mə̀ mà a kurum dər zayyà. 5 I yehe a kurumara a dukw mezime ya zaakwa. Mə vəl a kurum ndzəɗa, dite ki dwim a kuɗa, na mege kà wayum a. Wànà kà dumara nda təv ɓele kurum a ana, aà mege kurum gər tsiye? Tə tsaraka kataya tsara ka, ta gwaɗar aaka: « Haya, ge kamala ana kà tsik a.» 6 Tsam ka, Abəraham a mba aba tsara, a da a ga a təv Saray. A daha, a gwaɗar: « Daha tsəma, ndzək gùfa ana məmbaɗa ŋa lele ya tasà makər, ka de ɗaf ŋa.» 7 I dəba ŋa ya, Abəraham a mba aba tsəma, a da a təv gà sla. A daha, a gəsara kəla sla ana magəla ŋa dàɓaslɓaslsla lele, slu ŋa a dzim a ya, a da dərra, a təv mala meslire ŋgar a. Mala meslire ŋgar ata a mba ahər aba tsəma, a kəɗ, dite a vaka. 8 I dəba ŋa ya asa, Abəraham a da, a zlara awah sla ana sùpəlaya iɗəm, a dzim a lele ya, a daha a dza a tar a bəɗ aka miɗ tar a fata. ŋgat ŋa a hitse a təv tar aà huɗ sìsiye i fata, tə zəm. 9 I təv ana tə zəm aba ya ka, tə tsam aà Abəraham, ta gwaɗar: « Məkəs yak Saray ana, i ŋga?» A gwaɗa a tar aaka: « Araha, ŋgat a riŋ i ga.»

10 Mbəlakw ŋgiɗ ilik a gwaɗar: « I ta mere a ndiziŋ kərga naha ya ka, məkəs yak Saray aka wa kəla asləka ŋa.» Ama Saray ka, ŋgat a riŋ à dze a zləm tseŋgikkè aà guva biye hərmaga aà dəba mbəlakw ata.qq 11 Ama gà Abəraham nda məkəs ŋgar Saray ka, tar gà màndawal ŋa, tàa ndza aà bəra hinne. Məbara ba gà məkəs ana ta barawa ya tekeɗe, a riŋ i təv Saray asa tsa. 12 Aɗaba taŋa na Saray a sawla i gəzləŋ ŋgar, a gwa: « Araha kinehe ka, Yàa ge màndawal, dite mala ga gà tekeɗe ka, aka ge màndawal ana, meme na mìi ge a dukw maŋgayaba ata asa ya?»rr

13 Gawla Mbulum ata a tsam aà Abəraham, a gwaɗar: « Aàmala na Saray a sawla, a gwa ka, Yàa ge màndawal ana, i we a kəla asa ya ya? 14 Wànà duwa a riŋ na mawùràba ŋa i təv ndzəɗa Mbulum ya? Iye ihər i tsikik a asa, i ta mère a a təv yak a ndizìŋ kərga naha ya ka, məkəs yak Saray aka wa kəla asləka ŋa.»ss

15 Sara a ge magəɗa, aɗaba ana a gəs bazlam ata tsiye, a gwa: « Awaŋ, Yàa sawla tsa.» Gawla Mbulum ata a gwaɗar: « Awaŋ, kàa sawla ndzer.»

Abəraham a hama a Mbulum aɗaba gà mburma ana i kwite Suduma ya

16 Aləka i dəba ŋa ya, gà mbəlakw ata makər a, ta mah ba, ti de a ka, Abəraham a laka tar aà vatwa. Ti ndze a təv ana ta ŋgetehe a a kwite Suduma ya ka, ta hitse. 17 BATSAH kwa ŋa a tsik i gər ŋgar ka, a gwa: « Dukw ana i ta ge a ya ka, i sle a aà mekèhe aà Abəraham a tsa. 18 Aɗaba gà ɓəza ŋgar ka, ti ti ne a gà slàla gà bàba ŋa, dite gà ndzəɗa ŋa asa, gà slàla gà mburma ana ika gər ahəɗ a tserdze ya, ti ta ŋget a mipise ahəm ka, i təv ŋgar a.tt 19 I zla ŋgat ka, aɗaba makwara gà ɓəza ŋgar, nda gà mburma ana i ma ŋgar a tserdze, ta ge metsehe, tə zazam vatwa gà, dite ta ge dukw ana ŋgwal ŋa nda ndzer ŋa lele ya, a gà mburma ŋgiɗ mbaŋa. Na tàa ge dər kataya ka, i ge a dukw ana i tsik a Abəraham i sida ya.»

20 Dite i dəba ŋa ya asa, BATSAH kwa ŋa a tsik a Abəraham bazlam medzeye à gà kwite Sùduma nda Gumura, a gwaɗar: « Bakal gà mburma ana i fata ya ka, a beha hinne. 21 Aɗaba taŋa na i gwa, i de a a fata, i ti sèmete a dukw ana ta ge ya ya. Na bəla tàa ge bakal ŋa ka, kamala na gà mburma ti tsikewa ya ka, i sir a mbaŋa.»

22 I dəba ŋa ya, gà asiŋ gà mbəlakw ŋgiɗ sula ta mah ba, tə da a kwite Suduma. Ama Abəraham ka, aka da aà tar a tsa, ŋgat riŋ hiywe mehìtsè ŋa ika miɗ BATSAH kwa ŋa. 23 Dite asa ka, Abəraham a sìrìkeha a təv BATSAH kwa ŋa, a gwaɗar: « Wànà ki dzeye a à gà mburma ana ta gewa dukw ana ŋgwal ŋa tsiye, nda gà mburma ana gà ŋgwal ŋa gà tsəɗaŋŋa ya fit a? 24 Ama na bəla gà mburma ana gà ŋgwal ŋa gà tsəɗaŋŋa ya tar riŋ i kwite ata ti sle a dzik ə̀zləm ana ki dzeye a à ter a mbaŋa ya? Wànà ki miyek a à kwite ata aɗaba gà mburma ata i fata gà ŋgwal ŋa gà tsəɗaŋŋa, ti sle a dzik ə̀zləm a tsiye? 25 Aɗaba a ge a ba tsa na ki ge a medzibe dukw ata, ki bets akaba a gà wele ana a gewa dukw ana ŋgwal ŋa tsiye, nda na ŋgwal ŋa ya ya, kige a ter a seriye kalkal a. Aɗaba i sər ka, kər na mala mege seriye ana a ta sese a ikaba seriye a gà mburma ana ɗa ika gər ahəɗ a mba nda kalkal ŋa ya?»

26 I dəba ŋa ya, BATSAH kwa ŋa a gwaɗar aaka: « Na Yàa le aà gà ŋgwal gà mburma ana gà tsəɗaŋŋa ya dzik ə̀zləm i kwite Suduma ka, i dzeye a dər tsa, i miyek a à kwite ata fit aɗaba tar.» 27 Abəraham a gwaɗar asa: « Kamkam Batsah gà ŋa, piliŋ à bakal gà, aɗaba iye ka, mala tsapa, dite iye asa ka, mburma tsa, ahəɗ masakəŋa taf. 28 Kamkam na bəla mburma iɗəm tsa ə̀zləm na i liwiŋ gà mburma ata dzik ə̀zləm a ana meme, wànà ki dzeye a à kwite ata pəra gà mburma ata tar iɗəm tsa ə̀zləm a ya?» Mbulum a gwaɗar aaka asa: « I dzeye a à kwite ata tsa na Yàa le aɗəm aà gà ŋgwal gà mburma ana gà tsəɗaŋŋa ya dzik faɗ gəra ə̀zləm a.»

29 Abəraham a ger kamkam asa, a gwaɗar: « Na bəla gà mburma ata gà tsəɗaŋŋa ya ka, tar riŋ i fata ka, dzik faɗ pəra ana, meme?» Mbulum a gwaɗar aaka asa: « I dzeye a à kwite aɗaba gà mburma ata dzik faɗ a tsa.»

30 Abəraham a gwaɗar: « Kamkam Batsah gà ŋa, i fèfilek a asa, ma ta tsə̀ɓak tsa. Na bəla gà mburma ata tar riŋ iɗəm ka, dzik makər pəra ana, meme?» Mbulum a gwaɗar aaka: « I ge ter a duwa ilik tsidze na Yàa le aɗəm aà gà ŋgwal gà mburma dzik makər a.»

31 Abəraham a səkah à mifefile asa, a gwaɗar: « Kamkam Batsah gà ŋa, na bəla gà mburma dzik səla pəra na tar riŋ iɗəm ana, meme?» A gwaɗar aaka: « Awaŋ, i dzeye a à kwite aɗaba gà mburma ata dzik səla ya tsa.»

32 Abəraham a gwaɗar asa: « Kamkam Batsah gà ŋa, ma ta tsə̀ɓak tsa, a sèsiŋ mifèfilek ka, bazlam ilik pəra. Na bəla gà mburma riŋ iɗəm ka, kurwa pəra ana, meme?» BATSAH kwa ŋa a gwaɗar aaka asa mbaŋa: « I dzeye a à kwite aɗaba gà mburma ata tar riŋ iɗəm kurwa ya tsa.»

33 I təv ana Abəraham a ndəv à bazlam ata ya ka, BATSAH kwa ŋa a mah ba i təv ŋgar a, a daba. Abəraham ibam, a mbəɗ gər a ma a təv ŋgar ana a dara iɗəm a mbaŋa.