Madzəba 17

Masasa ba a ne lambà dukw ana Mbulum a tsik i sida ya ya

1 Aləka i təv ana Abərama a ge mivè dzik tswiɗ gəra tswiɗ a ka, Əbay Mbulum a dara a təv ŋgar a, a gwaɗar: « Iye ka, Mbulum ana a sle aà duwa tserdze ya, zazam lele, dite ki ge dukw ana ŋgwal ŋa ya mbaŋa. 2 I gis a masla nda kər, i ta vilek a mawà ba hinne.» 3 Abərama a tsaraka kataya ka, luz a kal à gər a bəɗ aka miɗ ŋgar. Mbulum a gwaɗar asa: 4 « Araha na dukw ana i tsikik a i sida ya ya, i ndze a nda kər hiywe. Ki ne a ka, tsir gà mburma ana gà slàlà pampam hinne ya. 5 Ama aka miɗ mba ka, ti ta zelek a Abərama asa tsa, ti zelek a ka, Abəraham, aɗaba ana i ne a à kər a tsir gà slàlà pampam hinne ya.ll 6 Gwala yak a ta we a ba ka, hinne slàla gà mburma pampam ti ta wer a ba ya ka, i gwala yak a, dite gà Əbay ti ta der a ka, i gwala yak a mbaŋa asa. 7 Dukw ana i tsikik i sida ya ka, a kurum nda gà ɓəza gà ɓəza yak ana ti ta weye a tar ika miɗ mba ya tserdze. Dukw ata i tsik i sida ya ka, a ndze a aà biybiy, à mbìɗ a aba a tsa. Iye Mbulum yak ana i kesle kər a, dite iye Mbulum gà ɓəza yak ana ti ta weye a tar i dəba yak a mbaŋa.mm 8 I vilek a ahəɗ aaha, a kurum ana mandza ŋa ɗa iɗəm kamala gà slele ya, ahəɗ Kanan tserdze a ne a biy kurum aà biybiy nda gà ɓəza gà ɓəza yak ana ti ta weye a ɗa tar i dəba yak a ya. I ne a Mbulum tar.»nn 9 Mbulum a gwaɗa a Abəraham asa: « Kər ka gəs ahəm aà dukw gà ana i tsikik a i sida ya ya. Kurum nda gà ɓəza gà ɓəza yak ana ti ta weye a tar i dəba yak a tserdze. 10 Araha, na dukw ana ki ge a aɗaba masəra ba gà ana i tsikik i sida ya ya, gà ɓəza ana gà asləka ŋa ya tserdze ka, tə sasa ba.oo 11 Say ki seswim a ba kurum fit dze. Taŋa na a ne a lambà dukw ana i tsik i sida ya, gà mburma ti sir a dər ka, masəra ba ika magər kwa nda gà kurum a. 12 Kəla ana tàa wa ya tserdze bəla aka ge mehinne tsamakər ka, sasum ŋgat. Taŋa ka, i gà slàla kurum tserdze, ku mege kəla ana ta wa i gà i ma kurum a, ku mege ɓəle ana tə sə̀kəmara ika ahəɗ ŋgiɗ a, ar i gwala kurum tsiye tekeɗe, mà sàs ba. 13 Taŋa kəla ana ta wa i ga i ma kurum a, nda na tə səkəm nda siŋgwe ya fit, tə sasa ya ba. Lambà dukw ata aba kurum a, na a ɗif a à masəra ba gà ana i təv kurum, à ndìv a tsiye. 14 Ama wur ana a waya masasa ba ŋgar tsiye ka, gà mburma ta fə̀r ahər kamala ana ŋgat i gwala tar a tsa, aɗaba ana ŋgat aka nəs à masəra ba gà ana i tsik i sida ya ya.»

15 Aləka i dəba ŋa ya ka, Mbulum a gwaɗa a Abəraham: « Kinehe ka, ka ta zal a məkəs yak Sarayy asa tsa, say ki zeler a ka, Saray. 16 Aɗaba i ta ger a ŋgwal hinne, a ti ne a məmər gà slàla pampam hinne. Gà Əbay ti ta dere a ka, i gwala gà ɓəza ŋgar a.»

17 Abəraham a tsaraka kataya ka, luz a kal à gər a bəɗ aka miɗ ŋgar, a dza ba aà sawla, aɗaba a dzala i gər ŋgar ka, a gwa: « Meme na wur ana mivè ŋgar dərməka ka, a we a kəla asa ya? Dite meme na wur ana aka ve dzik tswiɗ ka, a we a kəla dze ya?» 18 I dəba ŋa ya, Abəraham a gwaɗa a Mbulum: « ŋgulum na Ismayila ma zəm ga gà ya tsiye?»

19 Mbulum a gwaɗar aaka: « Nda ndzer ŋa pàrsa iɗəm tsa, məkəs yak Saray a wekere a kəla ya, asləka ŋa, ki zeler a Izak. Dukw ana i tsik i sida ya ka, a ta ge a ba i təv tar nda gà ɓəza gà ɓəza ŋgar aà biybiy mbaŋa. 20 Aɗaba Ismayila ka, Yàa gəs meheme yak ana kà hemiŋa. I piser a ahəm. I ta viler a mawà ɓəza hinne. Gà Əbay ti ta dere a i liwiŋ gà ɓəza ŋgar a kurwa gəra sula. I ti ne a à ŋgat gà slàla gà bàba ŋa hinne. 21 Ama ku mege i ge dər kataya tekeɗe ka, Izak ana məkəs yak Saray a ta wekere a ndizìŋ kərga naha ya, na a ta ŋget a dukw ana i tsik i sida ya ya.»

22 I təv ana Mbulum a ndəv aba à mifefile ata ya ka, a miyak à Abəraham, a daba. 23 I dəba ŋa ya, Abəraham a zla gà kəla ŋgar Ismayila nda gà ɓele ana ta wa ya tar i ma ŋgar a tserdze,dite nda gà na a sakama tar nda siŋgwe ya, zləməŋa gà asləka ŋana i ga i ma ŋgar a tserdze, a sasaya tar a pat ata, kamala ana Mbulum a tsiker a. 24 Akahər ana Abəraham a sàs ba ya ka, mivè ŋgar aka ge dzik tswiɗ gəra tswiɗ. 25 Ismayila kəla ŋgar tekeɗe, mivè kurwa gəra makər mbaŋa. 26 Malahalah ŋa ata ka, gà Abəraham nda Ismayila kəla ŋgar na tə sàs ba a pat ŋa ata ya, 27 dite nda gà mburma ana i ga i ma ŋgar a, nda gà ɓele ana ta wa ya tar i ma ŋgar, nda gà na a sakamara tar ika ahəɗ ŋgiɗ a tserdze, tə sasaya ba a təv ilik ŋa nda gà ŋgat.