Bazlam gà Hagar nda kəla ŋgar Ismayila
16
1 I dəba ŋa ya ka, Saray məkəs Abərama aka war kəla tsa. Ama ɓele ŋgar a riŋ dəm ŋa, dəm gà Ezipt. Zləm ŋgar Hagar. 2 Aləka Saray a fə̀r aka wa kəla tsəka, a gwaɗa a Abərama : « Araha, Mbulum aka viliŋ kəla tsa, ka ne aà iye ìdil ŋa. Ama ka, ŋgulum hənum nda ɓele gà aaha, biy tsa ki ŋget a kəla i təv ŋgar a.» Abərama a tsaraka kataya ka, a gəs bazlam Saray ata. 3 Akahər ata ka, Abərama aka ndza ika ahəɗ Kanan mivè kurwa. Kamala taŋa ya, Saray a zla ɓele ŋgar aaha dəm gà Ezipt, zləm ŋgar Hagar a, a vəl a zal ŋgar Abərama, dite me ne daala ŋgar. 4 I dəba ŋa ya, gà Abərama ta həna nda Hagar ka, a ŋgat kəla. Aləka i təv ana Hagar a samata, aka ŋgat kəla ya ka, a sawla aà Saray mala ga ŋgar aaha. 5 Aɗaba taŋa dukw ata a tsəɓ a Saray hinne, a gwaɗa a Abərama : « I ŋgat mesewere are aaha ka, agəra kər. Aɗaba Yàa vəlak ɓele gà, ma həna à gəzləŋ yak, ama kinehe a fə̀r aka ŋgat kəla ka, a sewle a aà iye ana, meme? Mbulum me ge a ma seriye dukw ana ndzer ŋa ika magər ma nda kər a.» 6 Abərama a tsaraka kataya ka, a gwaɗa a Saray: « Araha, ɓele yak naha, gəs a ahər yak, dite ka tàtəkar kamala ana kà waya ya.» Tsam ka, Saray a pala ahəm a Hagar hinne. Hagar ibam, ndzìslìf a valaba ihər a dala ya. 7 I dəba ŋa ya, gawla Mbulum a daha, a le aà Hagar aà guva biye yam ika vatwa ana a da ndara a kwite Sura ya. 8 Gawla Mbulum ata a gwaɗar: « Hagar ɓele Saray, ka dara a faha ya ana, i ŋga ya? Ki de a ana, a ŋga?» A gwaɗar aaka: « Iye ihər i vele a ka, aà Sarayy mala ga gà ya.» 9 Gawla Mbulum ata a gwaɗar: « Mbəɗ gər a ma a təv mala ga yak, kàa daha ka, hənar à gər a bəɗ aka miɗ ŋgar.» 10 I dəba ŋa ya, gawla Mbulum ata a gwaɗar asa: « I ta vilek a mawà ɓəza hinne, wura a sle a aà maɗàmà ŋa tsa, aɗaba ana hinne ya.» 11 I dəba ŋa ya, a gwaɗar asa mbaŋa: « Kinehe ka, kəla ana i hitwis yak, ki we a ya ka, asləka ŋa, ki ɗer a zləm ŋa ka, Ismayila, kamala megweɗe ya ka, Mbulum aka tsaraka tuwa mesewere are yak ana kà tuwa ya. 12 Kəla yak ata a ti tserekewa a zləm tsa, kamala hezweŋe ana ta gìzl a ka, a tsaraka tsiye. A ti ne a are a gà mburma tserdze, dite ku mege weke tekeɗe, a ti ner a are mbaŋa. A ti ndzewe a i təv gà damər tsa, a ti ndze a ka, ndaka tseke pat ana a mbəzawara ya.13 I dəba ŋa ya, Hagar a dzala a təv Mbulum ana a fàfəlar a ka, a gwaɗar: « Kər ka ne ka, Mbulum ana a ŋgetiŋ a ya.» Agəra ana a gwa ka: « Iye tekeɗe na Yàa ŋgat a wele ana a ŋgetiŋ tsiye ya?» 14 Aɗaba taŋa, na tə zalawa a biye yam ata ka, biye yam ana Mbulum a ŋgetiŋ iɗəm a ya. biye yam ata ka, ika magər gà kwite Kades nda Baret.