Mbulum a ɗif à masərà ba ŋgar a Abərama i sida ya
15
1 Aləka i dəba gà dukw ata tserdze ya ka, Əbay Mbulum a dara a təv Abərama a. A gwaɗar: « Ki ge magəɗa tsa Abərama, iye ihər i kesle a kər, na dite duwa a gik a tsiye, aɗaba i ta vilek a dukw mayaba yak ka, batsah ŋa hinne.» 2 I dəba ŋa ya, Abərama a tsaraka kataya ka, a gwaɗar: « Mbulum Batsah ga ŋa, meme na i sir a dər ka, ki ta viliŋ a gà dukw ata ya? Aɗaba iye kinehe ka, màndawal ŋa, kwits kəla gà duwa a riŋ tsa. Araha, Eliyezer kəla gà Damas aaha ŋgat ɓele gà ya, na a ti zim a limana ga gà ya.» 3 Aɗaba Abərama a dzala ka, a gwa: « Araha, Mbulum aka viliŋ kəla ana ta wa i ma gà ya tsəka, ŋgat na a ti zim a ga gà ya.» 4 I dəba ŋa ya, Əbay Mbulum a dara a təv Abərama ya asa, a gwaɗar: « Awaŋ, ŋgat tsa na a ti zim a limana ga yak a. Ama kəla ana ki we a ya na a ta zim a ya.» 5 Əbay Mbulum a da à ŋgat a bəra, a daha, a gwaɗar: « Fə̀r aà gəza mbulum kwaŋ, ɗama gà mawusawus ana tar riŋ ihər a, wura a sle a aà maɗàmà ŋa tsa. Kamala taŋa ya na gà ɓəza yak a ta ge a ya mbaŋa.»ff 6 Ama Abərama a tsaraka bazlam ata Əbay Mbulum a tsiker a ka, a gəs. Aɗaba taŋa na Mbulum tekeɗe ka, a ne à ŋgat kamala mala ndzer ŋa ya ya.gg 7 I dəba ŋa ya, Mbulum a gwaɗa a Abərama asa: « Iye ka, Mbulum ana a zlara kər i kwite Ur ana ika ahəɗ Kaldiya ya, i vilek a ahəɗ aaha, a ne a biy yak.» 8 Abərama a gwaɗar: « Mbulum Batsah ga ŋa, meme na i sir a dər ka, a ne a biy ga ya?» 9 Mbulum a gwaɗar aaka: « Kinehe ka, yaha dəm sla ana mivè makər a, nda dəm awak ana mivè makər a, nda gà hàgwàlà təmaŋ ana mivè makər a mbaŋa asa, dite huɗgum ilik nda maadagwar ilik mbaŋa.» 10 Abərama a tsaraka kataya ka, a yaharra gà dukw ata ya fit dze, a sàs ikaba slu ŋa ya parak kalkal. Ama gà huɗgum aaha nda maadagwar a ka, aka sàs ikaba ya tsa. 11 Zàmma tsəka, gà kwatsamba tə daha, tə ndzaya aka slu ata a bəɗ, ti zimiŋa. Ama Abərama a daha, a dəgəz ikəka tar a.12 Aləka i təv ana pat aka à medìɗe ya ka, Abərama a dəɗ aka mendze are ɓìler, luvuŋ tìtìktìkka, tsam ka, magəɗa luvuŋ ata a ger hinne. 13 Mbulum a daha, a gwaɗar: « Kinehe ka, sər dər ndzer, gà ɓəza yak ti ta ndze a i slele ika ahəɗ ŋgiɗ, ti ta ge a megemir a gà mburma ana ika ahəɗ ata ya. Gà mburma ata i fata ya tì sèwère a ter a are hinne mivè dərməka faɗ. 14 Ama i ta ge a seriye aka gər gà mburma ata ti ta sèwère ter a are ya. I dəba ŋa ya, ti ta mère a i fata ya ka, nda gà limana hinneii. 15 Ama kər ki ta mite a ka, zayzay lele, kamala gà bàba gà tsir yak a mbaŋa. Gà mburma ti le a kər ka, nda gà akwəl i gər herrè. 16 Na a ta mère a a faha ya ka, gà ɓəza yak ana ta weye a tar ika miɗ gà məfaɗ ŋa ya, aɗaba kinehe ka, gà Amuriya tàa rah à mege dukw bakal tar ana ta ge a ya zukw tsa.»
17 Aləka pat a dəɗ ka, batsah luvuŋ ana tìtìktìkka ya a ge, tsam ka, mesigire duwa avir iɗəm arah akwa a wene a ikəka ŋgar ŋgar ŋgar, zlàtar a dəv ba aà guvùkw, a da ndaka magər gà slu ata wùlàzlə̀zlzlà. 18 A pat ata na Əbay Mbulum a ɗif à masəra ba ŋgar a Abərama a, a gwaɗar: « I ta vile a ahəɗ aaha ka, a gà ɓəza yak, a ne a biy tar, daga ara aà dula Ezipt ya, tsikw aà batsah dula ana tə zalar dula Efrat a. 19 Ahəɗ aaha ka, biy gà Keniya nda gà Kenidziya, nda gà Kaduniya, 20 dite nda gà Hittiya, nda gà Perizziya nda gà Refaya, 21 dite asa nda gà Amuriya, nda gà Kananiya, nda gà Girgasiya, nda gà Yebusiya. Kinehe ka, gà mburma ata tserdze ya, tar mandza ŋa iɗəm tə̀ma. Ama aka miɗ mba ka, ti ndze a iɗəm asa tsa. Aɗaba gà ɓəza yak ti ta dwiŋ a iɗəm tar a.»