Madzəba 14

1 Abərama a be à Ludu 14 Akahər ata ka, Amrafəl ŋgat a kwara gà Sineyar, nda gà Ariyukw ŋgat ka, Əbay gà Ilasar, Kedurlayumer Əbay gà Elam, dite Tidal ka, ŋgat Əbay gà Gweyim. 2 Tar ata tserdze ya ta ge guvəl nda gà Əbay ana ə̀zləm a. Gà Əbay ata ə̀zləm a ka, gà Bera biy gà Suduma, Birsa gà Gamura, Sineyab gà Admah, Sembər gà Dzebuyim, Əbay gà Bela ka, gà Dzumar. 3 Gà Əbay ata ə̀zləm a ka, ti yahaba gər, tə da aka tùlwàh Sidim ana tə zalawar kinehe duluv slùwəl a. 4 Tar ata ə̀zləm a ka, tə zazamawa Kedurlamer nda magəsa ahəm lele, mivè kurwa gəra sula. Ama i huɗ mivè kurwa gəra faɗ ŋana ya ka, ta hitse aà ŋgat kuɗa. 5 I huɗ mivè kurwa gəra faɗ ata ya ka, gà Kedurlamer nda gà Əbay ana tə ndzawa i təv ŋgar a, tə daha, ta gazla gà Refaya ana i Asterut-Karneyim a, nda gà Susi ana ika ahəɗ Hama ya nda gà Elmi ana ika tùlwàh Kiriyeteyim a, 6 dite nda gà Huri ana i gər kwite Seyir a, tə dalawa tar haa tsikw a Elparan aà guva kusak. 7 I dəba ŋa ya, ta mbəɗara gər a En-Mispat ana tə zalar Kades a. Tə daha, ta gazla gà Amelek ana ika ahəɗ tar a tserdze, ta mba aà tar, haa tsikw aà gà Amuriya ana i Hasasun-Tamar a mbaŋa. 8 Dite gà Əbay gà Suduma nda Gumura, nda gà Admah nda gà Dzebuyim, dite nda gà Bela ana tə zalar Dziwer a tserdze, ta hadzal ba tar aà guvəl aka tùlwàh Sidim. 9 Tə daha, ta ge guvəl nda gà Kedurlamer ana ŋgat gà Elam a, nda Tidal ana ŋgat Əbay gà Gweyim a, nda Amrafəl ana ŋgat a kwara gà Sineyar, nda Ariyukw ana ŋgat Əbay gà Ilasar a. Gà Əbay ata ə̀zləm a, ta ge guvəl nda gà faɗ ŋana. 10 Ama tùlwàh Sidim ka, biye riŋ iɗəm maràhà ŋa nda dukuməŋa kamala atwa ya. I huɗ guvəl ana ta ge ya ka, gà Əbay Suduma nda Gumura tə təz nda taŋa, tə daha, tə dzawa aɗəm a biye ata. Gà asiŋ ŋa tə təz a gà gər kwite. 11 Gà Əbay faɗ ata tə daha, tə ndzàka gà limana gà Suduma aaha nda Gumura ya, nda gà dukw mezime tar ana gà ŋgwal ŋa ya fit, tə daba dər. 12 Tə daha, tə ndzək gà Ludu damər Abərama ana ŋgat mandza ŋa riŋ i kwite Suduma ya mbaŋa. Tə ndzək ŋgat nda gà dukw ŋgar ana aà ŋgat a fit, tə da dər. 13 I dəba ŋa ya, wele ana a be à tar a ilik a, a da, a ta meɗife dər a Abərama kəla gà Yahuda ata. A daha ka, ŋgat mandza ŋa aà huɗ batsah dizl ɗaf ata tə zalar dizl ɗaf Mamre gà Amuriya. Ama Mamre ka, ŋgat damər gà Eskul nda Aner ana tar nda gà masla nda gà Abərama a. 14 I təv ana Abərama a ̀tsaraka, ta gwa la, tàa gəs damər yak, tàa da dər a ka, a daha, a ndzək gà gawla ŋgar ana ti slewa aà mege guvəl, ta waya tar i ga i ma ŋgar a tserdze, mburma dərməka makər nda kurwa gəra tsamakər (318). Tə daha, tə zazam gà ɓəzla guvəl ata tsikw aà kwite Dan. 15 A daha, a ndzək iba gà mburma ŋgar a, a dzaya màŋgùɓà təv sula, dite aà malàwàrà tar ndaavəɗ, nda gà gawla ŋgar. Tə daha, ta gazla tar, haa tə zazam tar tsikw a Huba aka tseke yam Damas. 16 Tə daha, tə ndzakara aà tar gà dukw tar a fit. A mara à Ludu damər ŋgar a mbaŋa, nda gà dukw ŋgar a tserdze, nda gà asiŋ gà məkəs gà mèsle ŋgiɗ ana ta gasa tar tserdze ya mbaŋa. Melikisedek a pise ahəm a Abərama 17 Aləka i təv ana gà Abərama ta mba aà gà Kedurlamer nda gà asiŋ gà Əbay ana makər tar mandza ŋa i təv ŋgar a ka, a mbəɗara gər a. I təv ana à mbìɗera a gər a, ar aà vatwa mba ya ka, Əbay gà Suduma a daha, aà melime nda ŋgat aka tùlwàh Sawe ana gà mburma tə zalar tùlwàh gà Əbay a. 18 I dəba ŋa ya ka, Melikisedek Əbay Salima a daha, a zlaha gà ɗaf nda dukw ana ti ɗwitsewa ka, dite a kwese a ya. ŋgat ka, mala mandəva kuɗa a Mbulum ana batsah ŋa ika gər gà mburma tserdze ya. 19 A daha, a piser ahəm, a gwaɗar: « Mbulum ana ŋgat batsah ŋa ika gər gà dukw tserdze ya, ma pisak ahəm. 20 Gà mburma tə zàmbaɗa à Mbulum ana ŋgat a kwere a dukw tserdze ya, aɗaba ana a dzak gà ɓəzla mene are yak ahər, kà mba aà tar a.» I dəba bazlam ŋgar ata ya tsara ka, Abərama a daha, a ndzək iba gà dukw ana a ndzəkara à gà ɓəzla guvəl a ya, a dzaya iba ya təv kurwa, a zla iɗəm a ilik, a vəl a Melikisedek.[1] 21 Ama Əbay Suduma a daha, a gwaɗa a Abərama : « Dziŋ gà mburma gà, tə da a ma, limana ata ka, ma dzak.» 22 Abərama a gwaɗar aaka: « I zle a ahər a mbulum, i mbeɗe a ika miɗ Mbulum ana ŋgat a kwere a gà dukw tserdze ya. 23 A sèsiŋ dukw yak kwizikw tsidze, ku mege slewize ana kwizikw aà liɓir tsapa yak a tekeɗe ka, a sèsiŋ tsa. Aɗaba ki ta gweɗe a ka, iye na a ge Əbay à Abərama ya. 24 Ama a sèsiŋ na i zle a dukw yak ilik a tsidze. Say dukw ana gà gawla gà tə zəm a, nda gà dukw mayaba gà mburma ana mì da akaba dze ya, gà Aner nda Eskul, nda gà Mamre ka, tar tə zlaba biy tar dukw tar.» [1] Ibəranikwa 7:1-10