13
1 Mede ana gàa Abərama tə da aba nda Ludu ya 13 Kamala taŋa ya, Abərama a hitsera ika ahəɗ Ezipt ya, a da aka ahəɗ ana a dara iɗəm akahər ata ndaka tseke Kanan a. Tar nda gà məkəs ŋgar, nda gà dukw ŋgar, dite nda gà Ludu tserdze mbaŋa. 2 Ama Abərama ka, mala limana hinne, gà sla ŋgar riŋ nda gà təmaŋ, nda gà zlìgwèmè ŋgar, nda gà kur siŋgwe ŋgar hinne. 3 I huɗ mesìweye ŋgar ana a dawa ya ka, a hitsewara daga ika tseke ŋgiɗ a dawa a Betel, a təv ga petek ŋgar ana a kirew akahər ata ika màgər gà Betel nda Ay ya. 4 A dawa ka, a təv ga ana a zlazl akahər ata aà məbatsa aɗəm duwa a Mbulum a mbaŋa. A daha ka, a zàmbaɗa à Mbulum a fata. 5 Ludu ana tə sùwayawa nda Abərama məma ya tekeɗe ka, ŋgat mala limana, gà təmaŋ ŋgar nda gà sla ŋgar, nda gà mburma ana i ga i ma ŋgar a tserdze, tar riŋ mbaŋa. 6 Ahəɗ ata ka, a sle a tar tsa, na ti ndze a i təv ilik ŋa ya, aɗaba gà dukw gənaw tar ka, hinne, kwizir a sle ter a tsa. 7 Agəra taŋa na maàga a hitse ika màgər gà ɓəzla makəva gà dukw tar a. Akahər ata ka, gà Kananiya nda gà Perizziya tar riŋ ika ahəɗ ata mbaŋa. 8 Aɗaba taŋa, Abərama a gwaɗa a Ludu: « A ge a ba tsa na maàga a hitse a ika màgər ma, kige tsa ika màgər gà ɓəzla makəva gà dukw ma ya, aɗaba kwa ka, nda gà damər. 9 Fə̀r ikaba ya kwaŋ, ahəɗ aaha ika miɗ ma fit a dzena, biy ma tsiye? ŋgulum ka, tə gama ba ikaba ya. Na aka sàsak mede ndaka tseke ahər gula ka, iye i de a ndaka tseke ahər mezime. Kige tsa na bəla kà waya mede ndaka tseke ahər mezime ka, iye i de a ndaka tseke ahər gula.» 10 I dəba ŋa ya, Ludu a zla gər aà mbulum, a fə̀r ikaba ya ə̀ba ə̀ba ə̀ba ka, aka ŋgataha a ŋgwal ahəɗ duwa aà dulwa Yurdan. Təv ata ka, yam iɗəm lele, kwizir iɗəm hinne mbaŋa. A fə̀raha i təv ata ŋgat iɗəm a haa Dzuwer, aɗaba təv ata a ne ka, kamala də̀gə̀nats Mbulum ana a ge akahər ata ya, ŋgwal ŋa lele, kamala ahəɗ Ezipt ya mbaŋa. - Akahər ata ka, Əbay Mbulum aka dzeye à gà kwite Suduma nda Gumura zukw tsa. - 11 Ludu a samata ahəɗ ata aà guva dulwa Yurdan a lele ka, a daha, a ndza ndaka tseke are pat ana a mbəzawara ya, a zla təv ata fit aà ba ŋgar, kamala taŋa ya, gà Ludu nda Abərama tə da aba ya. 12 Abərama ŋgat a ndza ika ahəɗ Kanan. Ludu ata mendze ba aka kwite ata ŋgwal ŋa lele ya. A daha, a hitse aà mekiriwe ga petek ŋgar i fata, kətsah aà guva kwite Suduma ya. 13 Ama gà mburma ata i kwite Suduma ya ka, gà ŋgwala tsidze, ti ne gà ɓəzla mene are a Mbulum. 14 Aləka i təv ana gà Ludu tə da aba ya nda Abərama ya ka, Əbay Mbulum a gwaɗa a Abərama: « Zla gər aà mbulum, kà fə̀raha ikaba ya, daga i faha ya ndaka tseke ŋgiɗ, ndaka tseke ŋgiɗ tserdze kwaŋ.» 15 Aɗaba ahəɗ aaha kər ihər ki ŋgeter a fit dze ya ka, i vilek a a kər, nda gà ɓəza yak, a ne a biy kurum aà biybiy.[1] 16 I vilek a mawà ɓəza hinne, kamala hewiyeŋ ana i dula ya. Na wura aka sle aà maɗàmà hewiyeŋ ana i dula ya ka, a sle a aà maɗàmà gà ɓəza yak mbaŋa. 17 Kinehe ka, hitse, sùwaya ika ahəɗ aaha, kà samata meme na zubul ŋa ya, nda zlàbàta ŋana tserdze ya. Aɗaba i vilekiŋa.» 18 Akahər ata na Abərama a hitse aà mekiriwe ga petek ŋgar a, dite a da a ndza aà huɗ batsah dizl ɗaf duwa tə zalar dizl ɗaf Mamre, kətsah aà guva kwite Hevrun a ya. A zlazl təv ana ta bets aɗəm a duwa a Mbulum a a fata. [1] Gà Øə̀zla Meslire 7:5; Galatiya 3:16