12
1 Mezele ana Mbulum a zal a Abərama ya 12 I dəba ŋa ya, Əbay Mbulum a gwaɗa a Abərama: « Hitse ika ahəɗ yak a, miyak à gà gwala yak, nda gà mburma ana i ga i bəra tsir yak a tserdze. Da aka ahəɗ ana i ɗifek a dər a.[1] 2 I ti ne a à kər a ka, gwala gà mburma ana hinne ya, i ta pisak a ahəm, zləm yak a ti ne a ka, batsah ŋa, ki ti ne a ŋgwal ŋa i təv gà misle ŋgiɗ, agəra mi pìsè ahəm ana i pisak a ahəm a. 3 Gà ana ta gek a dukw ana ŋgwal ŋa ya ka, i ta pise a ter a ahəm mbaŋa. Gà ana ta vilek a mezelme ya ka, iye i ta vile a ter aɗəm a mezelme mbaŋa asa. Gà slàla gà mburma ana ika gər ahəɗ tserdze ya, ta ŋget a mipise ahəm ka, aɗaba kər.»[2] 4 I dəba ŋa ya ka, Abərama a mah ba, a da kamala ana Əbay Mbulum a tsiker a. Ludu ibam, a zazam ŋgat. Taŋa ka, Abərama aka ge mivè dzik təsəla gəra əzləm na akahər ata a dara i kwite Haran a ya. 5 Tə da nda Saray məkəs ŋgar, nda gà Ludu kəla damər ŋgar, dite nda gà limana tar, nda gà kàzlàŋà tar, nda gà mburma tar tserdze, kamala megweɗe ya ka, gà dukw tar ana ta ŋgat i kwite Haran a fit dze. Tə dara i fata ya ka, ti de a aka ahəɗ Kanan. Ama ka, tàa ndze a fata dukw ŋgar. 6 I dəba ŋa ya, Abərama a sùwaya ika ahəɗ ata tserdze, haa a ndze a təv duwa tsəɗaŋŋa i Sehem, aà huɗ dizl ɗaf duwa batsah ŋa tə zalar Mure. - Akahər ata ka, gà Kananiya tar riŋ ika ahəɗ ata. - 7 I fata ka, Əbay Mbulum a pàt aba a Abərama, a gwaɗar: « I ta vile a ahəɗ aaha ka, a gà ɓəza yak.» I fata ya asa ka, Abərama a zlazl təv məbatsa dukw ana ta bets aɗəm a a Mbulum a.[3] 8 I dəba ŋa ya, Abərama a hitse i fata ya, a da a gər kwite ndaka tseke are pat ana a mbəzawara, kətsah aà kwite Betel ya ya. A daha, a hitse aà mekiriwe gà ga petek tar a fata, aka màgər gà Betel nda kwite Ay, ndaka tseke pat ana a mbəzawara ya. A zlazl təv məbatsa duwa a Mbulum i fata, dite a zal a Əbay Mbulum nda meheme. 9 I dəba ŋa ya, a mah ba i fata ya, a da, a zazam vatwa ŋgar ndaka ahəɗ ana ndaka tseke gular a. Abərama a da aka ahəɗ Ezipt 10 Akahər ata ka, may a dza ba aà mege ika ahəɗ ata, dukw mezime a riŋ lele tsa. Aɗaba taŋa na gà Abərama ta mah ba, tə da aka ahəɗ Ezipt aà mendze riŋ i fata zaakwa ya. 11 I təv ana tàa mendze aka ahəɗ Ezipt ya ka, Abərama a gwaɗa a məkəs ŋgar Saray: « Araha, kər ka, ka tsahən hinne. 12 Aləka gà mburma gà Ezipt ta ŋgeteke a ka, ta gweɗe a, kər ka, məkəs gà, ti dere a, ta kiɗ a iye, kər ka, ta miyek a à kər nda gà mesife. 13 Aɗaba taŋa, ŋgulum ki gweɗe a, iye ka, damər yak, na dite i ndze a nda mesife zayzay lele aɗaba kər a.» 14 Aləka i təv ana gà Abərama ti ndze aka ahəɗ Ezipt ya ka, gà mburma ana i fata ya, ta ŋgat a məkəs aaha kaɗəŋ ka, a tsahən aà tar hinne. 15 Tsam ka, gà mburma ana i ga i bəra i Əbay Firawna ya, ta ŋgatar ka, tə daha, ti tsik a Firawna, tə zàmbaɗa à məkəs ata hinne ika miɗ ŋgar, dite tə zalaraha a ma ŋgar. 16 ŋgat a ge ŋgwal a Abərama agəra məkəs ata. A dza gà dukw a Abərama hinne, gà sla nda gà hezweŋe, nda gà ɓele ana gà asləka ŋa ya, nda gà ɓele ana gà dəm ŋa ya, nda gà zlìgwèmè tserdze. 17 Ama ka, Əbay Mbulum a slər dukw məməta ana mawùràba ŋa ya, a ga a bəra Əbay Firawna, aɗaba Saray məkəs Abərama ata a zla ya. 18 I dəba ŋa ya, Əbay Firawna a zalaha a Abərama, a gwaɗar: « Aàla na kì ge à iye kataya ya? « Aàmala dze ya na kə gəs meɗiŋ dər ka, məkəs yak tsiye. 19 Dite aàmala na kə gweɗiŋ ka, damər yak a, araha Yàa mbər mezle, aka ne məkəs gà ya? Kinehe ka, məkəs yak naha dukw yak, zlaba, ka dum.» 20 I dəba ŋa ya, Firawna a gwaɗa a gà mburma ŋgar, lakum ŋgat, tə da nda məkəs ŋgar ika ahəɗ ga ya, nda gà dukw ŋgar tserdze. [1] Gà ɓəzla Meslire 7:2-3; Ibəranikwa 11:8 [2] Galatiya 3:8 [3] Gà Øə̀zla Meslire 7:5; Galatiya 3:16