11
1 Ga ana zubul ŋa mburma tə zlazl i Babila ya 11 Piŋŋe ka, gà mburma ana ika gər ahəɗ tserdze ya, mi fefile tar ka, ilik. Bazlam tar tekeɗe ibam ilik asa mbaŋa. 2 Aləka i təv ana gà mburma ata tə zazam vatwa ana ndaka tseke pat ana a mbəzawara ya ka, tàa le aà varavada fàtə̀ta ika ahəɗ Sineyar i fata. Tə daha, ta geye aaka ga tar a fata, tə ndza riŋ i fata. 3 Gà mburma ata ta gwaɗaba: « Kinehe ka, geyekwa bìrik, ki dwilekwe a nda akwa, na dite a mir a ya.» I dəba ŋa ya, tə dza ba aà mazlazla dər ga nda bìrik ata kamala ana tə zlazl nda kur a. Tə ndaɗa atwa ana ika ahəɗ a ndza lìviŋ lìviŋ a mbaŋa, ta bah dər ga ata. 4 Ta gwa asa: « Say zlazlakwa batsah kwite, dite kà zlazlakwa aɗəm ga zubul ŋa saləlà. Gər ŋa mendze tsikw aà mbulum na dite ki ɗekwe a zləm lele ya. Ndzakwa ka, i təv ilik ŋa, ka ta gwitsekwa à ba aka gər ahəɗ sweyèh sweyèh tsa.» 5 Aləka i dəba ŋa ya, Əbay Mbulum a tarəra a bəɗ a aà məfə̀rà aà gà kwite ata nda gà ga ata gà mburma tə zlazl zubul ŋa saləlà ya. 6 A ŋgatar ka, a gwa: « Gà mburma aaha ka, gwala tar ilik, ahəm tar ana ta fefil a ya tekeɗe ilik mbaŋa. Dukw ana tar ihər ta ge a ya ka, tə dzahərba kinehe mba, tàa ge aka ndəv tsa. Ama kinehe dukw ana tə dzala ya ka, ti yeher a tsa, ti sle a aà mege dukw tar. 7 Ama ka, dumara tarakwa a bəɗ, ka wisekwa à tar gà bazlam ana ta fèfileye a ba ya, na dite ti tserekeye akaba a asa tsiye. 8 Daga i fata ya ka, Əbay Mbulum a daha, a gwitseye à tar sweyèh sweyèh aka gər ahəɗ tserdze. Ta miyak à mazlazla dukw ata. 9 Aɗaba taŋa na tə zalar kwite Babila ya, kamala megweɗe ya ka, təv mewìsè gər. Aɗaba Əbay a daha a wise a tar à mifefile a gà mburma ana ika gər ahəɗ tserdze ya ka, i fata. I fata mbaŋa na a gwitseye à tar aka gər ahəɗ tserdze sweyèh sweyèh a. Gà bàba gà tsir Abərama 10 Naha ka, bazlam gà ɓəza Sem: I təv ana Sem a ge mivè dərməka ya ka, a wa Arpasada, a ndza ka, mivè sula na i dəba batsah yam ata arah aka gər ahəɗ a dzeye à gà dukw tserdze ya. 11 Sem a ndza i dəba ma wà Arpasada ana a wa ya ka, mivè dərməka ə̀zlə̀m, (500) aka wa ya gà asiŋ gà ɓəza ŋgiɗ gà asləka ŋa, nda gà dəm ŋana tserdze. 12 Aləka Arpasada a ge mivè dərməka makər nda gəra ə̀zləm ka, a wa Sala. 13 Mivè Arpasada i dəba ana a wa Sala ya ka, mivè dərməka faɗ nda makər, (403) Dite a wa gà ɓəza ŋgiɗ gà asləka ŋa nda gà dəm ŋa tserdze. 14 Sala a ge mivè dzik makər ka, a wa Eber. 15 Mivè Sala ana i dəba ma wà Eber a ka, mivè dərməka faɗ nda makər, (403). Aka wa gà asiŋ gà ɓəza ŋgiɗ gà asləka ŋa nda gà dəm ŋa tserdze. 16 Aləka Eber a ge mivè dzik makər gəra faɗ ka, a wa Pelek. 17 Mivè Eber ana i dəba ma wà Pelek a ka, mivè dərməka faɗ nda dzik makər, (430). Aka wa gà asiŋ gà ɓəza ŋgiɗ gà asləka ŋa nda gà dəm ŋa tserdze. 18 Aləka Pelek a ge mivè dzik makər ka, a wa Ragam. 19 Mivè Pelek i dəba mawà Ragam a ka, dərməka sula nda tswiɗ, (209). Aka wa gà ɓəza ŋgar mbaŋa, gà asləka ŋa, nda gà dəm ŋana tserdze. 20 I təv ana Ragam a ge mivè dzik makər gəra sula ya ka, a wa Sarukwa. 21 Mivè Ragam i dəba ana a wa Sarukwa ya ka, mivè dərməka sula nda təsəla, (207). Aka wa gà asiŋ gà ɓəza ŋgiɗ gà asləka ŋa nda gà dəm ŋana tserdze mbaŋa. 22 Aləka i təv ana Sarukwa a ge mivè dzik makər a ka, a wa Nahur. 23 Mivè Sarukwa i dəba ana a wa Nahur a ka, mivè dərməka sula, (200) Aka wa gà asiŋ gà ɓəza gà asləka ŋa nda gà dəm ŋana tserdze. 24 I təv ana Nahur a ge mivè dzik səla gəra tswiɗ a ka, a wa Terah. 25 Aləka mivè Nahur i dəba ana a wa Terah ya ka, mivè dərməka nda kurwa gəra tswiɗ, (119). Aka wa gà ɓəza ŋgiɗ gà asləka ŋa, nda gà dəm ŋana tserdze mbaŋa. 26 A ta mege Terah a ge mivè dzik təsəla ka, a wa gà Abərama nda Nahur, nda gà Haran. Gà ɓəza Terah 27 Naha bazlam gà ɓəza Terah: Terah ka, a wa gà Abərama nda Nahur, nda gà Haran, dite Haran ibam a wa Ludu mbaŋa. 28 Haran a mət ka, ika ahəɗ ana ta wa iɗəm ŋgat a, i batsah kwite ana tə zalar Ur, ika ahəɗ Kaldiya ya. 29 Aləka i dəba ŋa ya, gà Abərama nda Nahur tə ndzək məkəs. Zləm məkəs Abərama ka, Saray. Dite zləm məkəs Nahur ibam ka, Milika dəm Haran. ŋgat ka, tsir gà Milika nda Yiska. 30 Saray ka, kəla ŋgar a riŋ tsa, aɗaba a we a tsa. 31 I dəba ŋa ya, Terah a ndzək gà Abərama kəla ŋgar nda Ludu kəla ŋgar, nda gà Saray məkəs kəla ŋgar. Tar ata tserdze ya, tə hitsera daga i kwite ata tə zalar Ur ika ahəɗ Kaldiya ya, ti de a aka ahəɗ Kanan. Aləka ti ndze a kwite Haran ka, tə ndza a fata.[1] 32 Terah a ndza aà bəra ka, mivè dərməka sula nda əzləm (205). A mət ka, i Haran i fata. [1] Gà Øə̀zla Meslire 7:2