9
1 Masə̀ràba ana Mbulum a gəs nda Nuhu i sida ya 9 I dəba ŋa ya, Mbulum a pise ahəm a gà Nuhu nda gà ɓəza ŋgar, a gwaɗa a tar: « Wum ba hinne, na dite gà ɓəza kurum ta we a ba, tì rèh a aka gər ahəɗ a. 2 Gà dukw tserdze, gà dukw dala nda gà ɗiyeŋ zləma gà dukw ana tì sìweye a ika gər ahəɗ a, ku mege gà kilif fit dze, taŋa ka, i vəl a kurum ahər a kurum. 3 Gà dukw ata tserdze ya ka, ti ne a dukw mezime kurum. I vəl a kurum taŋa ka, kamala ana akahər ata i vəl a kurum ala slàmbah dukw ana dzìn ŋa ya ya. 4 Say dukw ana ta muruɗ mimwirɗe məmbəz aka dara iɗəm a tsiye dzekwiŋ, taŋa ka, ka ta papəɗum tsa. Aɗaba məmbəz ka, a mbe aka mesife. 5 Aɗaba wur ana aka kəɗ mburma ya ka, i ti tètìker aɗəm a mbaŋa te. Ku mege dukw dala, ku mege mburma, na aka kəɗ mburma ka, i tètìker a mbaŋa. 6 Wura aka kəɗ mburma ka, mburma à kiɗ a ŋgat mbaŋa te asa. Aɗaba Mbulum a ge mburma ka, aà mendzikiɗe ba ŋgar. 7 Aɗaba taŋa na i gwaɗa a kurum, wum ba hinne, na dite gà ɓəza kurum tì rèh a aka gər ahəɗ a.» 8 Mbulum a fàfəl a gà Nuhu nda gà ɓəza ŋgar, 9 a gwaɗa a tar: « Araha, naha ka, masla ana i gəs nda kurum i sida ya, a kurum nda gà ɓəza kurum ana ta weye a tar i dəba kurum a ya. 10 Dite nda gà dukw ana mesife iɗəm tserdze ya, gà ɗiyeŋ nda gà dukw dala, nda gà dukw ana ika ahəɗ a tserdze, zləma gà dukw ana kà dum akabara i slə̀làh yam a ya. 11 Taŋa ka, masəra ba gà ana nda gà kurum i tsik a kurum a i sida ya ya, aɗaba duwa ilik ma ta dzeye nda batsah yam kamala taŋa ya asa tsa. Batsah yam a ti dere a aà medzeye à gər ahəɗ a asa tsa. 12 Mbulum a səkah aaka à bazlam ata asa, a gwa: « Araha, lambà dukw ana i tsik i sida ya ika màgər kwa nda gà kurum, nda gà dukw ana tserdze nda gà mesife iɗəm a, ha aà biybiy. 13 I tike a màkə̀làh gà a màgər hulɓùkw, na dite ti sir a dər taŋa ka, lambà dukw ana i tsik i sida ya, ika màgər mə̀r nda gər ahəɗ a. 14 Ku mege ndeɗime na Yàa sləraha hulɓukw aka gər ahəɗ ka, màkə̀làh à pèter a iɗəm a. 15 I fata ya ka, dukw ana i tsik i sida ya ika màgər kwa nda gà kurum, nda gà dukw dala tserdze ya ka, a ta miŋere a a gər a, batsah yam ata a rah aka ahəɗ, a dzeye à gà dukw tserdze ya ka, ma ta dza kataya asa tsa. 16 Màkə̀làh a hitse a màgər hulɓukw. I fir a ahəriŋa, na dite ka, i dzele a gà gər aka dukw ana i tsik i sida ya, à ndìv a tsa ika màgər kwa nda gà dukw dala ana tserdze i liwiŋ gà dukw gà ana i geye tar aka gər ahəɗ a.» 17 I dəba ŋa ya, Mbulum a gwaɗa a Nuhu: « Taŋa ka, lambà dukw ana i tsik i sida ya ika màgər kwa nda gà dukw ana mesife iɗəm tserdze ika gər ahəɗ a.» Ga Nuhu nda gà ɓəza ŋgar 18 Nuhu ana tə dara i batsah slə̀làh yam ata ya ka, gà Sem nda Hamu ana a wa Kanan a, nda gà Yefet. 19 Tar ata makər a ka, gà ɓəza Nuhu. Gà mburma ana mandza ŋa ika ahəɗ tserdze ya, tə dara ka, i tar a. 20 Nuhu ka, mala mifìte. I təv ana a dza ba aà mifìte ya ka, a dzava dizl dukw ata tə zalar hàndaza ya a guvah ŋgar. Dukw ata ka, gà mburma ta ŋgile a mawà ŋa, ti ɗwitsiŋa, na dite a kwese a ya. 21 A pat duwa Nuhu a sa meɗwìtsè mawà dukw ata ka, a kwaya à ŋgat, mahə̀nà ŋa dər i ga i ma ŋgar sàgùrɗùmma petek ikaba tsa. 22 Aləka Hamu wele ana a wa Kanan a, a daha, a fə̀r aà tsir ŋgar kataya ka, a dara a bəra ya, a ɗif dər a gà damər ŋgar aaha sula ya. 23 Gà Sem nda Yefet tə daha ka, tə zla petek, ti tike gə̀zàv nda dəba. Tə daha gìrìv ti yaha aka tsir tar aaha mahə̀nà ŋa sàgùrɗùmma ya, ta kaha dər ŋgat. Tə da dər aakaha ka, ta mbəɗ a are tar aka tseke ŋgiɗ, aɗaba ta waya məfə̀r ahər sàgùrɗùmma kataya tsa. 24 Aləka Nuha a piɗeke, mekweye ŋgar ata a da ikəka ya ka, a sər aà dukw ana kudər kəla ŋgar aaha a ge nda ŋgat a. 25 A gwa: « Kanan ka, Yàa vəlar mezelme, ŋgat mene ɓele gà damər ŋgar.» 26 Dite a gwa asa mbaŋa: « Əbay Mbulum mi pise ahəm a Sem. Kanan me ne ɓele ŋgar.» 27 Mbulum masəkahar à limana a Yefet, mə vəl təv mendze a gà ɓəza ŋgar, tə ndza i ga ilik ŋa nda gà Sem. Ama Kanan ka, mene ɓele mbaŋa asa.»[1] 28 A ta megeha i dəba batsah yam ata a rah aka gər ahəɗ a dzeye à gà dukw fit dze ya ka, Nuhu ka ndza mivè dərməka makər nda dzik ə̀zləm. 29 Kamala megweɗe ya, mendze Nuhu ana a ndza aà bəra fit dze ya ka, mivè dərməka tswiɗ nda dzik ə̀zləm (950), na dite a mət a. [1] Taŋa gà ɓəza Sem ka, ti ta we a gà mburma gà Isərayel mba. Tar na ti ta mekwere a gà asiŋ gà gwala ŋgiɗ tserdze ya