8
1 8 Batsah yam ata a rah aka gər ahəɗ a ka, Nuhu ka məts gər a Mbulum tsa, a dzalawa aka tar gà gər nda gà dukw dala, nda gà dukw gənaw ana tserdze tar riŋ mandza ŋa i slə̀làh yam ata ya. Mbulum a vizler a himbiɗ aka gər ahəɗ a, na dite yam ata à nikiɗ a ikəka ya ya. 2 Yam ana i biye ya, nda gà biye ana aà mbulum a mà akaba təbə̀ts, yam ana i mbulum a ka, aka dza asa tsa. 3 I dəba ŋa ya, a ge mehinne dərməka nda dzik ə̀zlə̀m ka, yam a nikiɗ, a se ika gər ahəɗ a. 4 Nda kiye matəsəla ŋa aà mehinne kurwa gəra təsəla i huɗ kiye ata ya ka, slə̀làh yam ata ndisl a le aà gər kwite Ararat. 5 Yam tekeɗe, hiywe a nìkìɗiŋa, haa aà kiye makurwa ŋa. A pat malahalah ŋa i huɗ kiye ata ya ka, gà gər kwite ta ŋgataya ba kuɗa. 6 Aləka i dəba mehinne dzik faɗ a ka, Nuhu a hə̀ndə̀k i biye ana ndaka dala gər slə̀làh yam ata, a làmbaɗa i təv ana a ge sləlah yam aaha ya. A gəs ŋgatak, a pəl dərra a bəra ya. 7 gàak ata bìr a be, a sùwaya haa a təv ana yam a se ika gər ahəɗ a ya, aka mbəɗaha gər asa tsa. 8 I dəba ŋa ya, a pə̀lara à maadagwar a, aà mesèmete ka, wànà yam ata na, aka se ika ahəɗ a ya ya. 9 Ama ka, maadagwar ata aka ŋgat a təv ana a ndze aɗəm nda sik a tsa. A mbəɗaha gər a slə̀làh yam, aɗaba ana yam ika gər ahəɗ tserdze mbaŋa ya. I təv ana a mbəɗaha gər a ka, Nuhu a zlara ahər ŋgar a bəra ya, a gəs, a ma dərraha a slə̀làh yam. 10 Aləka a vava mehinne təsəla ka, a pəl dərra a bəra ya asa mbaŋa. 11 Maadagwar ata a màha a təv ŋgar ka, i hawa. A daha ka, nda gà slàmbah uliviye i bazlam. Kamala taŋa ya, a sər dər ka, yam aka se ika gər ahəɗ a kuɗa ya. 12 I dəba ŋa ya, a vava mehinne təsəla asa ka, a pə̀lara à maadagwar ata ya asa. Ama ka, aka ta mimbìɗeha gər a təv ŋgar asa tsa. 13 Mivè Nuhu a ge dərməka nda dzik ndilik gəra ilik, nda kiye melik ŋa, a pat malahalah ŋa i huɗ kiye ata ya ka, yam aka se ika gər ahəɗ a. Nuhu a hə̀ndə̀k i slə̀làh yam ata ndaka dala gər ŋa, dite a fə̀r dərra ikaba ya ka, ahəɗ aka siwe. 14 Aləka a ta megeha nda kiye ma sula ŋa, aà mehinne dzik səla gəra təsəla i huɗ kiye ata ya ka, gər ahəɗ makula ŋa fit kweleŋ. 15 I dəba ŋa ya, Mbulum a gwaɗa a Nuhu: 16 « Dumara i slə̀làh yam a, kurum nda məkəs yak, nda gà ɓəza yak, nda gà məkəs gà ɓəza yak 17 dite nda gà dukw dala ana kurum mandza ŋa dze ya, nda gà dukw ana zləma mesife iɗəm a tserdze, gà ɗiyeŋ nda gà dukw ana ti de a nda huɗ ika ahəɗ a tserdze, dumara iɗəm a, dite ka, tə daya ilik ilik tserdze, tə ləm aka gər ahəɗ, dite ta waya ba hinne ika gər ahəɗ asa mbaŋa.» 18 I təv ana Nuhu a ̀tsaraka bazlam ata Mbulum a tsiker a tsara ka, a dara i slə̀làh yam a kuɗa, tar nda gà ɓəza ŋgar, nda gà məkəs ŋgar, nda gà məkəs gà ɓəza ŋgar tserdze. 19 Dite nda gà dukw dala, nda gà dukw ana ti de a nda huɗ a, nda gà ɗiyeŋ, zləma gà dukw ana ika gər ahəɗ a tserdze, aà slàla aà slàla, tə dayara iɗəm a. Nuhu a vəl dukw masakəŋa a Mbulum 20 I dəba ŋa ya, Nuhu a zlazl təv ana ta bets a aɗəm a duwa a Mbulum aà meger dər kəkaaha ya. Dite a gasa gà dukw gənaw nda gà dukw dala ana ŋgwal ŋa lele ya, nda gà ɗiyeŋ ana ŋgwal ŋa lele biy mivile a Mbulum, a wisl tsiye tserdze. A bats a Mbulum, dite a wànà slu ŋa i təv ata a bats aɗəm gà dukw ata a Mbulum a. 21 Aləka dukw ata a zeha aà Əbay Mbulum huŋŋà lele ka, a dar a gər. A gwaɗaba i gəzləŋ ŋgar: « Dìydiy i ta vile a mezelme a gər ahəɗ agəra mburma asa tsa. Aɗaba taŋa, Yàa mbər mesire madzala gà gər mburma ka, ŋgwal ŋa tsa daga aà gər ana ŋgat kəla ŋa mba ya. I ta bets a gà mesife gà dukw fit kamala ana i bats a asa tsa. 22 Daga aà gər kinehe ya, kəla mivè meslige duwa, nda məpala ŋa i bəɗ a ka, à ndìv a ika gər ahəɗ a tsa. Kamala taŋa ya mbaŋa, gà kwise nda gà pat ana a wir a ya, gà ləpat nda viye, dite gà həpat nda həvəɗ tserdze, a ge a kataya.»