7
1 Gà Nuhu nda gà mburma ana i ma ŋgar a tə tsala a slə̀làh yam 7 Aləka i təv ana Nuhu a ndəv à megemir ata ya ka, Əbay Mbulum a gwaɗar: « Ndzək gà mburma ana i ma yak a tserdze, ka tsalum a slə̀làh yam. Aɗaba i fə̀r aà kər ka, kər mala ndzer ŋa na i liwiŋ gà mburma ana kinehe ya tserdze. 2 Ndzək gà dukw dala ana gà ŋgwal ŋa lele, dite ka, a wisl tsa na biy mivile a Mbulum a ya, gà asləka ŋa təsəla, gà məkəs ŋa ibam, təsəla mbaŋa. Dite gà asiŋ gà dukw dala ana gà ŋgwal ŋa tsa, a wisl a ka, zla asləka ŋa ilik, məkəs ŋa ibam, ilik mbaŋa. 3 Gà ɗiyeŋ tekeɗe ka, zla asləka ŋa ilik, məkəs ŋa ibam, ilik mbaŋa, dite hwife tar a zeha a ika gər ahəɗ a. 4 Aɗaba a zeha kinehe ka, mehinne təsəla na i dzer a batsah yam ana a ndele a tsa aka gər ahəɗ a ya. A dze a ka, ndaapat dite ndaavəɗ asa, miveke dzik faɗ. I dzeye a à gà dukw ana i ge tserdze ya fit ika gər ahəɗ a.» 5 Nuhu a ge kalkal kamala ana Əbay Mbulum a tsiker tserdze ya. Batsah yam ana a rah aka gər ahəɗ fèɗèɗè, a dzeye à mburma ya 6 I təv ana batsah yam ata a dzara aka gər ahəɗ a ya ka, Nuhu aka ndza aà bəra mivè dərməka ndilik. 7 Tar nda gà ɓəza ŋgar, nda gà məkəs ŋgar, dite nda gà məkəs gà ɓəza ŋgar tserdze tə tsala a slə̀làh yam, na dite ta beye aà batsah yam ata a dzeye à mburma ya.[1] 8 I dəba ŋa ya, gà dukw dala ana gà ŋgwal ŋa lele, biy mivile a Mbulum a, nda gà na gà ŋgwal ŋa tsa a wisl a, dite gà ɗiyeŋ nda gà dukw ana ti de a nda huɗ a tserdze, 9 sula sula asləka ŋa ilik, məkəs ŋa ilik, tə da a təv Nuhu a slə̀làh yam kamala ana Əbay Mbulum a tsiker a. 10 Aləka i təv ana mehinne təsəla ata a da iɗəm a ka, batsah yam ata a dzara aka gər ahəɗ a kuɗa. 11 Aka na Nuhu a ge mivè dərməka ndilik a ka, aà kiye ma sula ŋana, mehinne kurwa gəra təsəla tsam ka, yam ana batsah ŋa i huɗ biye ya, a hə̀ndə̀k ba tuwaŋ, dite na i mbulum a ndele a tsidze ya tekeɗe, a dzara aka gər ahəɗ a mbaŋa asa.[2] 12 Ndàapat, ndaavəɗ mehinne dzìɗ faɗ ar aà mendze. 13 A pat ana yam ata a dza ba aà mendze ya ka, gà Nuhu nda gà ɓəza ŋgar, gà Sem nda Hamu, nda gà Yefet, nda gà məkəs ŋgar, dite nda gà məkəs gà ɓəza ŋgar tserdze tə tsala a slə̀làh yam. 14 Tar nda gà medzibe gà dukw dala ŋgiɗ pampam, dite nda gà dukw gənaw ana i ma ya pampam asa, nda gà medzibe gà dukw ana ti de a nda huɗ a, nda gà medzibe gà ɗiyeŋ ŋgiɗ pampam ku mege ɗiyeŋ awara na a riŋ nda gà gwezleviyek a tserdze. 15 Mewe gà dukw ana mesife iɗəm a sula sula tserdze, asləka ŋa ilik, məkəs ŋa ilik, tə da a təv Nuhu a slə̀làh yam, 16 kamala ana Mbulum a tsik a. Aləka i təv ana tə da aɗəm a ka, Əbay Mbulum a hə̀ndə̀k aɗəm. 17 Dite i dəba ŋa ya, batsah yam ata a rah aka gər ahəɗ fèɗìɗe, a dzeye à mburma ya, a dara aka gər ahəɗ a kuɗa, a dza mehinne dzik faɗ. Aləka i təv ana yam ata à sìkèh a ya ka, a zla slə̀làh ata aà mbulum ika ahəɗ a. 18 Yam ata a səkah aka gər ahəɗ hinne. Slə̀làh ata a da ka, à sìweye a pəlŋgar pəlŋgar pəlŋgar nda ka gər yam. 19 Yam a tsəl ndàra a gəza mbulum kwitsikw hinne. Gà gər kwite ana aà huɗ mbulum a tserdze ta patsa aɗəm. 20 Yam a tsala aka gər ŋa peɗik peɗik zubul ŋa, ndàra a mbulum ka, gwètitik kurwa gəra ə̀zləm. 21 Gà dukw ana ti sìweye a ika gər ahəɗ tserdze, gà ɗiyeŋ nda gà dukw dala ŋgiɗ, nda gà ɓəza gà dukw ana ti de a ika ahəɗ nda huɗ a, nda gà mburma fit dze, ta mata aɗəm. 22 Mewe dukw ana a sife a nda hìter, mandza ŋa ika gər ahəɗ a, fit a mata. 23 Gà mesife gà dukw ana ika gər ahəɗ a fit, ti dzeye. Gà mburma nda gà dukw dala, nda gà mesiwiɗ, nda gà ɗiyeŋ, taŋa fit a dzeye ika gər ahəɗ a. Say Nuhu ilik na a zeha ya, dite nda gà dukw ana tar riŋ mandza ŋa nda gà ŋgat i slə̀làh yam a. 24 Batsah yam ata a tsəl a gəza mbulum peɗik peɗik ka, a ndza mehinne dərməka nda dzik ə̀zləm. Ma dara i sləlah yam a [1] Mata 24:38-39; Luka 17:27 [2] 2 Piyer 3:6