6
1 Aləka i dəba ŋa ya ka, gà mburma tə dza ba aà mawà ba ika gər ahəɗ hinne, gà dəm tar riŋ hinne asa mbaŋa. 2 Aləka gà ɓəza Mbulum tə samata gà dəm gà mburma aaha ka, tə tsahana aà tar hinne. Tsam ka, ta pala ya iɗəm gà biy ŋgiɗ a, tə ndzàkaya tar aà daala. 3 I dəba ŋa ya, Əbay Mbulum a samata dukw ana ta ge ya ka, a gwa: « A ge a ba tsa na Mezite Mesife gà a ndze a nda mburma aà biybiy ya, aɗaba ba ŋgar ka, manəsa ŋa, à mìtiŋa. Agəra taŋa mivè ŋgar à zè a mivè dərməka nda dzik səla asa tsa.» 4 Akahər ata i təv ana gà ɓəza Mbulum ata ta hənaya nda gà dəm gà mburma ya ka, tàa wa ya gà ɓəza. Gà ɓəza tar ata, ti neye gà zàbabul ŋa ika gər ahəɗ. Tar ti ne gà ɓəzla ndzəɗa hinne, gà mburma tə zləbawa à tar akahər ata. 5 Əbay Mbulum a samata, bakal gà mburma ana ta ge a ika gər ahəɗ a ka, hinne, madzala gà gər tar ana ti dzele a ya ibam, ŋgwala tsa kəla pat. 6 I dəba ŋa ya, Əbay Mbulum a samata dukw ana ta ge ya ka, a wur aà ŋgat i gəzləŋ hinne, a gwa: « Mege i sər ndeɗiŋa kataya ka, ana ka, i ge a mburma tsa.» 7 Aɗaba taŋa a gwa asa: « Gà mburma aaha i ge tar a ka, i dzeye à ter a ika gər ahəɗ a fetite, tar nda gà dukw dala ŋa dze, nda gà dukw ana ti de a nda huɗ a, nda gà ɗiyeŋ fit, aɗaba na mege i sər ndeɗiŋa ka, ana ka, i ge a tar tsa. 8 Ama Nuhu ilik i liwiŋ gà mburma ata ya ka, a ŋgat ŋgwal i təv Mbulum a. Nuhu a làmbaɗa batsah slə̀làh yamª 9 Araha, naha ka, bazlam gà ɓəza Nuhu ana a wa tar a. A wa gà ɓəza makər gà asləka ŋa, gà Sem nda gà Hamu, nda gà Yefetª. 10 Ama Nuhu ka, ŋgat mala ndzer ŋa, tə ndzawa nda Mbulum. ŋgat ilik i liwiŋ gà mburma ana akahər ata ya ka, ŋgwal ŋa lele. 11 Ama gər ahəɗ ka, aka nə̀s na Mbulum a fə̀r ahər a, gà mburma tserdze ta geye be a swalwa. 12 Aləka Mbulum a samata gər ahəɗ ka, aka nəs fit, aɗaba gà mburma tserdze na tàa nəs à vatwa tar a. 13 I dəba ŋa ya, Mbulum a samata dukw ata ka, a gwaɗa a Nuhu: « Iye ihər i sèmete a gər ahəɗ tserdze, agəra dukw swalwa tar ana ta geyebe a ya. Araha ka, i dzeye a à tar ika gər ahəɗ a kweleŋ fetite. 14 Ama kər ka, ndzək dizl dukw ana tə zalar sìrew a, kà lambaɗa dər slə̀làh ana kamala sàhər a. Dite ki ge aɗəm dzə̀ɓər a huɗ ŋa, kà bah nda dukw ana kamala atwa ya nda ga, dite nda bəra asa fit dze. 15 Araha na ki ge a megemir ŋa ya, ki ge a maa zubul ŋa ka, kapakà dərməka makər, dite zlàbàta ŋana ibam, kapakà dzik ə̀zləm, zubul ŋana ndàra a mbulum a tekeɗe, dzik makər. 16 Say ki tim a biye aka dala gər slə̀làh yam ata, kapakà ilik mbaŋa. Dite ka, ka təm ahər biye hərmaga a màgər ŋa ndaka tseke ŋgiɗ asa mbaŋa. Sas ika ba zubul ŋana a da ndàra a mbulum a biy ŋgiɗ ika gər biy ŋgiɗ, me ne ga makər. 17 Aɗaba araha ka, i slirra batsah yam aka gər ahəɗ a, me dzeye à gà dukw ana aà huɗ mbulum tserdze mesife iɗəm a. Gà dukw ana ika gər ahəɗ a ka, ku mege dukùla tserdze, a mete a fit. 18 Ama kər ka, i gəs masla nda kər i sida ya, ki ta pìts a a batsah slə̀làh yam ata, kurum nda gà ɓəza yak, nda gà məkəs yak nda gà məkəs gà ɓəza yak tserdze. 19 Dite nda gà dukw ana a riŋ nda gà mesife ya tserdze, ki ndzekehe a tar a təv yak a slə̀làh yam ata, zal ŋa ilik, məkəs ŋa ilik mbaŋa, sula sula tserdze, dite ka, ka matum tsa. 20 Ku mege gà ɗiyeŋ nda gà dukw gənaw, nda gà dukw dala, nda gà dukw ana ti de a nda huɗ a tserdze mbaŋa. Patsa aɗəm à tar a slə̀làh yam ata sula sula tserdze, na dite ta mete a tsiye. 21 Kà ndzək dər gà dukw mezime ŋgiɗ pampam ahər mbaŋa. Ki dze a riŋ a təv yak. Taŋa ka, a ne a dukw mezime kurum nda gà dukw ata tserdze ya. 22 Aləka i dəba ŋa ya, Nuhu a ge dər kamala ana Mbulum a tsiker a fit dzeª.