Moohot appaaynu
12
1 oot innu maanyawwa hinep lek,
urrashshetap innu patmantar qafnu maalla,
hin innu qari haisot kodd dahenn,
juppot se innu pati maddaakattenno allikashan,
feelantaan innu tureesh kiyy duupattan qiman feellaa.
2 innu feelinnonno Yesus se amaanteshaynu hirenne kaysinninu tooyaan kida;
iyyat masmasunt se ittureesh deyintu tooy illo deesot masqalet qari toya tuffattan duupad illo sheedda Mooha qari miskitt qari lai.
3 semmaalla ikkim inn intashshinenne irraxateet inquurin tura,
Yesus se qarhittisama se sedep kiyyu,
juppampayya kapeeshsh iyy qari deyy duupad tooyaa.
4 juppot olle orrxadan amm sanu diik tiiqa qarin hepaittenemu;
5 korsa se Moohot qum meddooyyatep,
"meetoot,
jiiayta pold tuffatta diiyii;
helpaan iyyat hed tushiyyo irraxatet allquura diiyii.
6 poldat nam iyyat hoxsaanniyyu tushiyy;
nam iyyat meetayyep tooyiyonno dahenn jiixinin."
kidiyyu immashshass patisatten.
7 oot Moohot meddooyyap inn tooyiyyu maalla,
jiixilaayy duupadaa;
meet appatiy jiixisa diinniyyu ayno?
8 et meddaap jiixisama diittan koddo,
inn medda kaldaat male amm medda lemmaatemu.
9 settep lamm innu dahaynonn husslah qara lemmaan innu jiixinniyin qafin,
serkinnin.
illo kat kiyyatin kinnaattass appaaynu heka moontalletess ashshannin sed qareell acacama diinninna?
10 appadaannu hin iyaan dikkap iyyaa kinnaadess helpa qoji innu jiixiyyen;
Moohot lamm ikkimin miilumaayy qootanninnoss hin innu koddina maalla innu jiixinin.
11 jiixisamot dahenn,
helpaass nam dappusinnin male amm nam masmasusinniyyamu;
hekoddu male ukanna lamm orr se kolless andot qunda tsillotatin innaakot daannin.
korsaanne kokkila
12 semmaalla harkaann hin shikamoodenne lukkaann hin tashsh qimiyyaa.
13 hin hokkalliyy ikkim dinanninnan kodaa male,
seqareell shoopa tura lukkaannass paana pahiyaa.
14 nam heikk olle andotin kallaadaa;
oot namat miiluma male pold akka fotta diinniyyu maalla,
miiluman kallaattaassenno kokkaadaa.
15 inn ila nam shokkooh naf qara dikkuma Mooha qoja tura itooyadaa;
settep lamm hittin qunda haddawiy daliyyu otanshayn qall deeha illo orr lekenno oshshumusisa tura illushadaa.
16 nam arpalayt kodd shoke nam qum eesaw se damaan iyyat shokkoohin daminu maalla kid qartumayy kashadep,
iyy Mooha huura diinniyyu otashayn ila inkinnaann illushadaa.
17 ukanna lamm helpaan eesaw qoran qeeddatta fade ikkim dawuram heufutan;
iyat pooyitin qoran se akkata kokkaad fadad nafenno,
amm akatta hefottemu.
a juppot qara mitaata amm hefottemu.
18 utet siina se harkan qappawusamishshu,
qassannishshu kapin amm hepaittenemu;
por qayyaatepanno,
por poorinnatatepanno,
por kotaatepanno,
19 por nass kaasatepanno,
por lel se lelamiyyu dakaysamaanniyyotepanno amm hepaittenemu;
orr lel se dakay,
"sedeeshsh lel pil uqqar innu lelama diiyyu" kida dinkamatta qarann paen.
20 oot acac,
"horet naf et utet se qappatto,
dakan reepantu toitu"
kidiyyu iyyaa qari hursaad maalla,
amm haisa hefottenemu.
21 oot hin erkawusam iyaan nam huurinniyy kodden maalla,
muus naf,
"antu henhuur illo helshad" hekid.
22 inn lamm utet tsiyon,
sapara Mooha kiyyat qapu kapop dehaatten;
itanno yerusaalem se sapara moonttall koddit kida;
hitaymiyyaan kumaddan dihamiyy masmasuntin orqudiqapamiyy kapopanno hedehaatten.
23 maapar qartamma Mooha hin mahhaaddu moontall tsaafam kapop hedehaatten;
Mooha se heikk qari horat quurampayt koddenne tsillampayyaan haasutta dap kapopanno heddehaaten;
24 Yesus se kaka awshiyyaass otantishsh koddenne diik se,
diik apeel qara tawu ishaamiyyonne fidam kapopanno hedehaatten.
25 ikkim inn iyy se ishaamiyyu amm qeedanninhinnamu inkidini illushadaa;
et orr hin Moohot husslah qara nam kapin iyyaa leliyo dakaya hittiyy,
passatta diiyyan koddo,
innu kat etin iyy se moontallett innu leliyyu qeeddatta diinno,
ashshannin passannina?
26 essete nassaayy huss sesseyiyy;
ammann lamm,
"husslahateeh kodda male shokkohannin qar oorina moontanno sesseyyinnina" hekid lel.
27 lel hin,
"shokkohannin qar oorina" kidiyyu ikkim iyaan sesseyya diinniy qiminan kallaanninan,
iyyaan sesseyyiyy shoke uumam allisohanninanes kida.