erkamaan Mooha masmasusinniyy
13
1 helpa mitt ankasanne insharap hoxsunt olli qafnaadaa.
2 keessummum orqeeddatta immashshipatisatta diiyyaa;
orr sedep keessumma qeeddanniyy karatiddu ufunaatta male hitaymiyya moohaatenno qeeddaden.
3 afa iyyaa olle hidan ila kishshanep orr hidam qaapadaa;
afa iyyaa olle rakkot ila kishshanep kinnaadaa illo orr se rakkot ila kiyyu qaapadaa.
4 orqeeddot nam heikketess iserkisam koddu;
oot Moohot arpalayyaanne iyyaan nyaauriy qari horat quuriyyu maalla,
aatanne appa orr amaanen male orqeedda ooshumusisa diiyyenii.
5 hoxsunt kodashsheti qara sekaadaa;
iyaan inn qaftan inn kayenii;
Moohot,
"amm all hed kashinhinamu;
amm all hed diinninhinamu" hekid.
6 semmaalla iyyin ieskisaann:
"poldat an qarqaarina,
amm huurinhinamu,
namat maana ani kodina?"
henkidin.
7 sinkiyyaan turaqatta lel Mooha inni lel qaapadaa;
kallashaddonne qunda erkamaaddu immashiorsattan amaanteshaddu kanni aanaa.
8 Yesus kristoos halanno awwenno haka parparatess iyyeeh;
amm oohaminamu.
9 kollilaan haw kiyy keessumma koddin poojama diiyyaa;
mutsuraannu qiminan,
dikkuma moohaatenn male amm tampet dama lushattanemu;
orr tampet dama lushad amm akkan uila heakkadenemu.
10 innu por laaqqa uqqari dehasaatin qafna.
orr tunkaan se talla erkanniyyu lamm damaan por uqqari laaqqa dehasa qara kiyy damot amm iyyaa hedaassamemu.
11 suuka suukamma (kadayt qeesawwa) oot juppotatess diik horetat qapannin por se miilot miilt kidamiyyop dehaannin;
soha horet sett lamm paataalle alliqeeddin doohinnin.
12 settep lamm Yesus diikayyin siip miilisaass harrat saparaanett patan rakkot qeeddad.
13 innonno paat sed qalle sohannaa iyy kapop annaa illo deesoshayy iyy olle qootannaa.
14 innu saparaan deyinin lushannin male,
amm are husslah qara saparaan ulla kallaannina henqafnamu.
15 semmaalla Yesus kristoos kapin laaqqa aypila lashmin Mooha dehannaa;
laaqqaanetenno qundda hibba hin oot mahhaayyeti maanyet koddiyy kida.
16 iyaan dikk erkasaanne iyaan inn qaftan ollin qootatta immashipatisatta diiyyaa;
laaqqaan Mooha masmasusinniyy hinep kiyy kida.
17 sinkiyyaanni acacamaa;
hayyotumaaddun peadaa;
oot iyyaa inkaasawusama qapan maalla,
oot nafseshaynetess kokkaannin erkannin;
semmaalla ikkim erkamooddu dappetin kodda male masmasuntin erkasa fottinaness iyyaa acacama.
hin inkinnekul amm iyaa dikk inni koddintamu.
18 Mooha innu dinkamaa;
qaap miil qafnaattaaynu henxufn;
paana heikketin qaap dikkin kallaattassin hadannin.
19 sed qareell ikkimin shakar kidinu inn kapop mitaatinnu qimiyyaa Mooha dinkamaa henkidin inn dinkamannin.
dinkam kaysila
20 Mooha andot,
iyy poldaaynu Yesus se diik kaka parparatin shinkayt helemma se kaan kodd toxt ila sohashiyy,
21 ikkim heka hasaayy erkannintan,
iyaan dikk dahennin kaysila qarin innin paiyyu;
Yesus kristoos kapin iyaan iyy masmasusinniyy innu qallin erkayyu;
Yesus kristoosess haka parparat serka koddenii;
ameen.
22 kafoot,
hitaym hin antu inni tsaaf ihummax kodd maalla ikkim lelaawu se antu innin korsiyyu duupattan lushannintanessin inn dinkamannin.
23 kafittaannu tsimotoos man hidanate sohattaayy ikkim ufunaanintanessin fadin;
et iyyat shakar kidu arep deyo,
iyy ollenn inn kapop anninna,
inn akkinna.
24 sinkiyyaannanne miilampayya dahenness paanussaawu lelaa;
kristaana huss tsaaliya paanussa inn qara lelin.
25 dikkuma Mooha dahetaynin inn olle kinnaadenii.
ameen.