amaantet
11
1 amaantet kidot iyaan op irraxatetin lushanniyyan "shaakket koddinan" kida qeeddatta,
iyaan indan akkaatta diinniyyanno qum iyaan akkaanniyyatep dihatta kida.
2 orr olu aypisamen,
amaantet minann kida.
3 husslah lel moohaatin uumamaayy innu ishshaakinkinnu amaantetann kida.
sedenn hin akkaanniyy dahenn hin akkaatta diinniyy ila uumamaaddu henxufn.
4 apeel laaqqaan qayeel Mooha dehayy qara taw Mooha dehayy amaantetann kida.
helpaan Moohot laaqqa apeel masmasuntin qeeddade,
apeel amaanaayyenn tsillampayt koddaayy illelant.
apeel et toyu nafenno amaanteshiyy hak ammannetess ishaamimin.
5 henook toya male moontallep qeeddam amaantetann kida.
oot Moohot iyy qeeddad maalla,
amm heakkaademu.
moontallep qeeddamaayy tureeshsh lamm Mooha masmasusisaayy helelam.
6 amaantet male amm Mooha masmasusisa fottiyyanemu.
nam por moohaatep dehaanniyyu Moohot kiyyataayyenne orr se iyy fadiyyossenno iyy heriy daanniyyu koddaayy amaana fadusinnin.
7 sanu oot iyyaan indan akkaatta diinniyat helpaan Moohot ikkim nooh dikkisanninu illele,
noohet Mooha huran orr manayy dinisaass koonka soorum amaantetann kida.
amaantet nooh minann husslah qari horat quurant;
noohenno tsillumaan amaantetin akkaanniyy tay.
8 helpaan aprihaam ikkim sohanninu por se tayima iddaassaminop anninu hembame,
ikkim aylop anninu ufunaatta diiyyu nafenno iyyat anta acacam amaantetann kida.
9 isaaqenne yayqoop hin iyy olle taymampayya lel irraxatet sett kodd olle huss irraxateshaddu qalli patayyaap koddan tunkaan kela kallaad amaantetann kida.
10 iyyat sedepanno kod,
saparaan sheeht qint qap Moohot ulli qaapad illo sorum lushattaann kida.
11 et aprihaam kerdu saaranno medda haaya fotta diittu nafenno,
aprihaamet Mooha hin irraxatet idday iamaanam koddaayy qeeddad maalla,
iirrot amaantetatenn meeda haaya fotten.
12 semmaalla aprihaam shokkooh se nam toyep kiyyu ila hotta qum hiska moontatenne shahatt pakatetatep dihama diinniyyu akkaad.
13 orr hin dahenn amaantetaddu luushaden illo raawen;
irraxatet se iyyaa daassantenno amm heakaddenemu.
hekoddu male por sekaashsh tooyen illo afa akkadenep masmasuntin qeeddaden.
husslah qarass keessumaanne patayya koddaaddu ishshaaken.
14 orr amm are huss henqafnamu kidiyyu iyyaan hussaddu fadiyy koddaaddu akkinnin.
15 huss se iyyaa uqqalle sohaden qaapanniyyan kid,
ullop mitaata fottaayyen makess.
16 ammann lamm huss moontalle kiyyu sed qareelli tawu darrayyin;
oot Moohot sapara iyyaa dikkiyy maalla et,
"moohaaynu" kidiyyan iyy hembiyyane amm iyyat iyyaan deesawiyyamu.
17 helpaan aprihaam ekkawusame amaantetann isaaq laaqqa dehayy;
aprihaam hin lel irraxatet qeeddad,
meetaayy shokkooh laaqqa dehasaass dikkisad;
18 settenno se Moohot,
"hotaatt isaaqenn hembamina" ikid kida.
19 Moohot iyy toxt ila sohashshisa irrot qapu koddaayy aprihaam amaan maalla,
afa isaaq toxt ila sohadep lakkiyya akkad.
20 isaaq iyaan ittureesh koddina qaapattaann amaantetin yayqoopenne eesaw qor.
21 helpaan yayqoop toxt dehaade,
iyyat medda yoosef mashshmashshaddu qor illo halittaayy qari dinaxasattan Mooha shomad amaantetann kida.
22 yoosefenno toxt dehaade,
oot kiptse sohatta medda israaeletat immashshi oorsad illo oot lafshayyeti maana koda ikkim iyyaa fadusinnishshu acac amaantetann kida.
23 helpaan muus dalade lemmaayy sommumaayy tooyaann acac Daam naha male leha halpatt deken amaantetann kida.
24 muuset kamm kanna imm inant ferioonet kidama hembama hittiy amaantetann kida.
25 semmaalla iyyat masmasunt se juppot ila deyishshu kapeesh siip Mooha olle rakkot qeeddatta pahisad.
26 oot iyyat heriy se iyyat ittureesh qeeddanninonno tooy maalla,
shorokum kipts kapeeshsh oot kristoos minin deesawot ikkaan koddaayy qaapad.
27 iyyat miir Daam naf naha male huss kiptsete sohad illo Mooha se indan akkaatta diinniyyu afa akkep qaapayin kokkaad amaantetann kida.
28 ikkim hitaymishsh hin meeddaan qart kodd ikasa acacam,
qartamma israaelet inraawin muuset fasika ulli diikkiyy,
diik fid amaantetann kida.
29 siip israaelet afa huss kok qaraash anniyyanep pakatet se room qallin tarpen amaantetann kida;
lamm orr kipts settep tarpa ekkanniyyane dahenn limamen.
30 siip israaelet kawwashsha ohint iyaarku patmantaran lashsh tapp mimmitaaten kanna ohintin tiiqant amaantetann kida.
31 oot raxap arpalaytet aysampayya israaelet andotin qeeddatt maalla,
orr se acacama diinniyyu olle toya male hatt,
amaantetann kida.
32 sed qareell maanan kidina?
ikkim antu oot ketiyonenne oot paariqenne oot samsoonenne oot yoftaahenne,
oot taawitenne,
oot samuelenne oot himampayyaatenno innass intorrines helpa ani qojin.
33 iyyaa amaantetann daamadan pushen,
paana pahin siip peashshiyyen,
irraxatet se iyyaa daasant akkaden,
karma kap duhen;
34 irrot apitt liqqiyen,
pillaw kela passaden,
tashshot ilaashsh qimussa akkaden,
adantin tannapot kodden,
tor olishsh mitaattiyyen.
35 iskatt,
kaffaaddu hin raaw toxt ila sohaden,
iyyaa qeeddaden.
shakkan lamm toxt ila sohatta aaku akkattaass qaapaden illo rakkot hawhawi kishshu qeeddattan miidamen;
hidan ila furisamaanno amm hefadenemu.
36 shakkan hetuffashamen kaypamen,
shakkan silfann hidamen man hidan tallop kashamen;
37 dakaannenno reepamen,
makaasetin qall quuramen,
pillawin raawen,
qool helemmaatenne heka talla uuwaden payyahen,
hiyyayyanne patayya kodden rakkaden;
38 husslah amm iyyaass hekoddemu;
nakulallenne utawa qarassenne huss kela waashshaanne qaaw talli kallaaden.