suuka suukamma (kaadayt qeesawwa) hek kaka awshiyya
8
1 suuka suukamma (kaadayt qeesawwa) iyy sedep kiyyu moontalle sheedda rumma heka Moohaat miskitt qari laiyin qafna;
ishaamaan innu ollin ishaaminkinnu ila iyyaan kaan hin iyaa.
2 iyyat man miilot se tunkaan shaakket kodd talla erkannin;
tunkaan hin hark namatin kodda male,
poldann ulli diham.
3 suuka suukamma (kaadayt qeesawwa) dahenn suukumiyyan,
ikkim daayyanne laaqqa dehanninnanes kida;
semmaalla suukishsh sedenno iyaan iyyat dehanninu qafnaatta iyy fadusinnin.
4 oot suukammaan (qeesawwan) qum halitt qari laaqqa dehanniyy kiyyan maalla,
et iyyat husslah qara kiyad kid amm suuka koddaayemu;
5 tunkaan hin suukamma utalla erkanniyyan se ele moontalle kiyyoss paahnatanne kaatta kida.
helpaan muuset tunkaan se sooromiyyo,
Moohot,
"qum se it utet qari hedi akkaatt qari heikk dahenn helan sorumii" hekid acac.
6 ammann lamm lel kaka awshiyya hin Yesus otantishsh uqqalli kodd qum iyyaa kaka ololayya qara tawanep,
erkamaan iyyat qeeddadenno erkamaaddu qara tawan;
kaka awshiyya hin dihamen,
lel irraxatet se aakitu qarass kida.
7 kaka olu haasutta dapan kid,
kaka awshiyya amm fadusinnaayenemu.
8 Moohot haasutta se siip qara kiyyu akkaann sedep kidin,
"toare,
helpaan antu siip isiraeletatenne siip yihuta olle,
kaka awshiyya kalinu deyina hekidin poldat.
9 kaka hin antu iyyaa olle kalinu
amm qum kakaan helpaan antu harkaddu min qap
huss kipits qalle iyyaa sohashshinniyyo appaadaaddu olle kalep kiyyamu.
oot iyyaa kakaan iyyaa an olle kalen lushatta diiyyen maalla ananno allin iyyaa diiy,
hekidin poldat.
10 toare,
sed kanneeshsh,
kakaan antu siip isiraelet olle
kalinu hin iyaa,
lelaawun qaapaaddu qalli haayina;
mutsuraaddu qallesseno iyyaa tsaafina;
moohaaddonnon iyyaa koddina;
iyyaanno siipaawu koddinan,
hekidn poldat;
11 nam,
'pold ufunaadu' kidan qahittishshayyenno,
kafittayyenno kollinninu amm kinnaanninamu;
hin ukelaash kiyyano hin kakaanenno dahenn,
an ufunaaninan;
12 dapashaddonno allin iyyaa diinnina;
jupposhaddonno sedeeshsh amm iyyaa qaapanninhinamu."
13 sedeeshsh iyyat,
"kaka awshiyya" kidiyyu kaka olu kerdayyaass kod kida;
semmaalla hin op inxerkawusadenenne kerdayya dahenn helpaan iyyaa allipatinan hedehaaden.