erkama man miilot se husslah qara kishshot
9
1 kaka turaqatta tampet Mooha shoomattaatenne man miilot se husslah qara kishshot qapan.
2 tunkaan tallin qootan lakk qapu ulli dikkisam kiyy.
qootan hiraym talla iyaan op ispa uqqari haayiyyanenne tsarabeesaanne laaqqot laaqqaatenno kiyyan;
por hin "imiil" kidamin.
3 kaarrata lakkiyya pateeshsh qootan "miilot se miilt" kidamiyyu kiyy.
4 qootan se talla iyaan worqet ila soorumam op itsaana uqqalli doohinniyanenne taapota kaka se worqetin patmaxaaram kiyy;
taapota kakanett qalle masoopet worqet se mennot uqqalle kiyyonne halitt aron se huushshenne daka lakk se acac hund uqqari tsaafam kiyy.
5 taapota se qara kirupelawwa serka iyyaan karpalooddun por juppot ushuqa qar dekiy kiyy.
hekoddu male ammann oot hin dahenneti shokku shokko ishaamaass amm fottinhinnamu.
6 heikk sedep dikkisamene,
suukamma erkamaaddu erkassaass tunkaan se talla qootan shokkiyya tallop lashshmin luumin.
7 lamm iyy qootan lakkiyya se tallin kiyyu tallop luumiyu suuka suukammaateeh.
iyyat ullop luumiyyu paralle shokkoohann.
iyyanno oot jupposhayyetenne oot juppot se siipat ufunaatta diittan erkanniyoti diikin anta male amm luumiyyamu.
8 hak tunkaan shokkiyyot ulla kiyyoss paana hin miilot miiltep anniyyu iy patpah kodda diittaayy laaffot miilot paana sedenn akkinnin.
9 sedenno sapan sedess paahnat kida.
paana sedenn daayyanne laaqqaan dehaanniyy amm qaap nam se laaqqaan dehaanniyyu miilisa fottiyyanemu.
10 hin dahenn tampet damaatenne heka ukotatenne hekat miilawa se hawhawi kikkiyyu hak tampet awshittet deyintosseeh erkawsamiyy kida.
11 hekoddu male kristoos iyaan dikk deya qara kiyyassa suuka suukammaat (kaadayt qeesawwa) kodd dey;
tunkaan hin iyyat uttallop luum,
ikaanenne ihaasutta dap kida.
tunkaan hin iy hark namatin dihama diiyyenne uuma sed ila kodda diiy kida.
12 iyyat shokkoohass ituri diikayyin miilot se miiltep luum male amm diik orkawaatenne heka mirkawaat qapad luumemu.
paana sedenn qaxama parpar innu akkusiyy.
13 ikkim dakinshiddu pateel miilintu diik orkawaatenne heka mirkawa settep lamm tardat korontet se laaqqa doohisant fidan et orr se ooshum miilinniyyan koddo,
14 diik kristoos hin laaffot Mooha parparatin laaqqaan haasutta dapi mashshayy ikodan Mooha iddehayy ikkimin Mooha se ulla kiyyu erkanninnoss,
ashshann sed qara tawu qaapaaynu erkamaan toxt qarin naman painniyy ila miilisa diinnina!
15 orr hin Moohot hemb ikkim irraxatet kiyyat parpar tayima qeeddanninaaness kristoos otantishsh kaka awshiyya kodd;
maana maalla,
ikkim orr se helpa kaka olote juppot erkay qayinoss toxshaddu toyan iyyaan hat.
16 et namat amaytet amayyo,
nam hin amaytet se amayy toyaayy patapaha fadusinnin.
17 maana maalla,
amaytet erkama qara nakayishshu,
et nam hin amaytet se amay toyu kanna kida.
et nam hin amaytet se amay kiyyatin kinnaado amm amaytet hin erkama qara nakayishshamu.
18 paana sedenn kaka ololayyaanno amm diik male erkama qara henakayenemu.
19 turaqattaass muuset acacadda halitt settet siip dahenni lel;
ukannakuless diik mirkawaatenne heka orketat haq olle lah illo matsaafa halitt settetenne siip dahenn qari hisobbetanne rifant laah roomatin fid.
20 iyyat fidiyyonno,
"diik kaka hin Moohot acac hin iy" hekidin.
21 settep lamm tunkaan settenne mehadda uqqalle erkasa dahenn qarass diik fid.
22 qum halitt muus qarass,
iyaan qoj pateeshsh heikk dahenn diikann miilin kida;
diikat tiiqama male,
juppot amm alliushuqamishshamu.
laaqqa kodda kristoos juppot patinnin
23 semmaalla,
hin heka moontalleti paahnat koddiyy paana sedep kiyyun miilawa iyyaa fadusinnin makess;
hekoddu male hin moontalle kiyy laaqqaan hin qareell tawin miilawa iyyaa fadusinnin.
24 kristoos amm "man miilot" se hark namatin diham paahnat shaakket kodd tallop heluumemu;
iyyat ammann ootaaynu Mooha kapa akkaattaass moonttallep kal.
25 suuka suukamma parpar kapa diik hekaayy kodda diiyenn miilot se miilt tallop luumin.
lamm kristoos amm helpaan leke mashshayy laaqqa koda heluumemu.
26 et sedep kodd kid,
hak husslah uumame hiran helpaan leki rakkot qeeddatta iyy qara fadamaay.
lamm ammann sapan muutaytaate juppot dahenn allpatisaass shokkooh ituri laaqqa ikodan akkiyy.
27 namat shokkoohin toya illo toxt kanna horat dehaattot iiss daassam;
28 settep lamm kristoos juppot orr leki allushuqaass shokkoohi ituri toy.
lamm juppot haisa kodda male,
orr se iyy lushanniyyu dinisaass lakkiyya deyina.