melketseteq suukishsh (qeesishsh)
7
1 melketseteq Daam sapara saalemetenne suuka (qeesishsh) rumma,
heka Moohaat kida;
melketseteq helpaan aprihaam daamadan push mitaatiyyo paanaalle mini pai illo qor.
2 aprihaamenno lamm iyaan iyyat pooj qara hark hundiyya sohashiyy illo idayy;
furila mahh melketseteq "Daam tsillot" kida.
lakkiyyot lamm,
"Daam saalem" shoke,
"Daam andoti" kida.
3 melketseteq amm appaanne inkot shoke mayt dalashot,
tsaafan ufunaytisant heqapamu;
hirayta sapanayyetenno muutayta kiyyatayyetenno amm hekiyyamu;
melketseteq qum paahnat meet moohaatep koddaann parpari suuka koddin kallaanin.
4 nam hin nam ashshann kaan koddaayy tooyaa!
aprihaam appa mayt nafenno mehaddaan iyyat pooj qara hark hundiyya sohashshiyy iddayy.
5 medda lewi hin erkama suukum qari haayamiyy,
siip se qara,
settenno kafaaddu se hotta aprihaam kodd qara hark hundiyya ikkim qeeddanninaness halittin acacamen.
6 hekoddu male melketseteq se hotta lewi kodda diiy nafenno aprihaam qara hark hundiyya qeeddad;
aprihaam se lel irraxatet idaassamenno qor.
7 hin qoriyu ikkim iyy se qoramiyyu qara tawu amm kaassiyy heqapamu.
8 paana shokkonn hin hark hundiyya qeeddanniyy orr toynu kida;
paana shokkon lamm hin hark hundiyya qeeddanniyyu,
melketseteq se ikkim kiyyatin kiyyaanninu ootaayyi lelant kida.
9 lewi se hark hundiyya qeeddanniyyu nafenno aprihaam kapaan hark hundiyya day kidaas fottamint.
10 maana maalla,
helpaan melketseteq aprihaam mini pae lewet appayy aprihaam ila kiyy.
11 halittat siip daassam,
sheeht suukum lewi qarass kida;
paanna sedenn et suukum lewi iyy haasutta dap kodd kid,
suukum aronep kiyyun kodda male,
suukishsh pil iyy suukum melketseteq qapu ikkim deyinu amm fadusinnaayemu.
12 helpaan suukumat oohamiyyo,
halittanno olle oohama fadusinnin.
13 suukishsh hin ootaayy hin dahenn lelamen mayt pil ila kida;
mayt sed ila nam shokkooh naf amm por laaqqa uqqari dehaanniyyan kapop hedehaad erkayyemu.
14 poldaannu iyy mayt yihuta ila dey koddaayy iufunasham.
hekoddu male helpaan muus oot suukum ishaamiyyo,
iyaan iyyat oot mayt yihutaat lel amm hekiyyanemu.
suukum kristoosenne heka melketseteq
15 lel hin patpah akkaad,
helpaan suuka pil iyy melketseteqep kiyyu sohade kida.
16 iyyat suukum qeeddad,
irrot kiyyashayy se muutayta daftenn male,
amm acac halitt se maytin koddennemu.
17 maana maalla,
"qum melketseteq suukumep att hak parparatess suuka" hekidant ootaayyi lelant.
18 oot halitt ololayt tashshampaytanne iyy awuta dap kodd maalla,
all ooham.
19 amm halitt muus akkan shokkooh nafenn kaysila qarin paxa hefottemu;
ammann lamm irraxatet aakitu innu Mooha kapop indehaanninu innu daassam.
20 suukum hin amm ashkot male hekoddemu;
shakkan ashkot male suukamma kodden.
21 Yesus lamm suuka kodd ashkot moohaatenn kida;
maana maalla,
qum se it
"Moohot,
att hak parparates suuka' hekid,
iashshkad,
amm oohinamu;"
kidant iyy lelant qarass kida.
22 ashkot sed minan Yesus kakaan aakass waas kodd.
23 oot toxt minin suukishsh shokku suukum qara hak parparat kinnaatta diinniyyu maalla,
suukamma olu iyyaan lek kida.
24 Yesus lamm iyy hak parparati kallaanniyyu kodd maalla,
suukumaayyenno amm oohamiyyamu.
25 semmaalla oot iyyat ootaaddu Mooha dinkaman hak parparat kallaanniyyu maalla,
orr se iyy kapin Mooha kapop deyiyyu dahenn ituri dinisa fottina.
26 innoss suuka suukamma (kaadayt qeesawwa) iyy miilampayt kodd,
haasutta dap,
nayqunt dap,
juppampayya ketta reehad,
moont qareell ikkaan kodd fadusinnin.
27 iyyat qum suuka suukammaan (kaadayt qeesawwaan) shakkanatep amm turaqatta oot jupposhayyetess,
ukanna lamm oot juppot siipati lashsh min laaqqa dehasa iyy fadusinniyyamu.
helpaan iyyat mashshayy laaqqa dehayye iturass kaysiyy.
28 halitt,
orr tashshampayya kodd suuka suukammaat kodusinnin;
lel ashkot hin halitt kanna dey lamm,
meet Mooha iyy hak parparat haasutta dap suukumusiyy.