6
1 semmaalla kollila hirayta hin oot kristoosi daasam allidiittan por kollila hin qim kaysila qarin namin paiyyatep tarpinaa;
oot erkamaan toxt qarin namin painniyy qara mitaataatenne oot Mooha amaanaati qar oora sheeht haaya diinnaa.
2 settep lamm kollila pil oot ahalilaatenne oot nam qari hark qapaatenne oot toxt ila sohattaatenne oot horat parpar qar oora diinnaa.
3 et Moohot kidon sed erkanninna.
4 orr se sed tureeshsh attumat Mooha iyyaa akkaatt;
iyyaan daayy moontallettenno lokad;
laaffot miilotanno qeeddad;
5 lel Mooha se dikkanne irrot husslah se deyintotenno lokad;
6 ukanna lamm amaanteshaddu allidiiy,
oot iyyaa mashshaddu qar ooriyyan meet Mooha rahhiyyanenne deesanniyyan maalla,
ikkim idakaysamaannintu iyyaa juppotddu qara mitaatinan kodot amm fottamiyyamu.
7 ul helpa min roop se iyy qari roopiyyu ukiyyu illo nam se uqqall dihot dihanniyyu dihot se pallhanniyyu Mooha kapa qorana akkannin.
8 et quddetanne kaappat deehiyyo lamm aypot koddin;
helpaan deh ilassenno otamina,
muutaytaayyenno apittin dooha koddina.
9 inn moyshadoot,
etin sed ishaamiyyu nafenno qaap aaku dinaaynin deyiyyu ila kinnaattaayn amaaninnikinna.
10 Moohot iyy horat pahit quuriyyu kida;
semmaalla erkamaannanne hoxsunt se inn sed tureeshshanno koddo ammannenno miilampayya qarqaaran mahhaay maalla akkitten amm immashshi patisanninhinamu.
11 inn dahetaynenn hak irraxatet se inni daassant kaysaannintoss ikkim qimussa hinep kiyy hak muutaytaat akkinnintanessin hadannin.
12 innu hadanninkinnonno,
ikkim qum orr se amaantetanne duupattan qiman lel irraxatet se iddaassant tayiyyap kinnaannintaness male amm ikkim melakalayya koddintanessemu.
13 helpaan Moohot aprihaami irraxatet dayye,
oot iyaan iyy qareell kiyy iyyat ashkanninu teeken maalla sedep kid mashshayyi iashkad;
14 "antu shaakketassinn hed qorina;
hottaaytenno lekinnina."
15 aprihaam heduupad lushad illo irraxatet se iddaassant akkad.
16 helpa namat ashkanniyyo mahh nam iyy qara tawotenn ashkannin illo ishaamaaddonno ashkotin qarqimisan otanshaddu talla shiittaaddu dahenn allhattinnin.
17 paana sedenn Moohot hin iyyat lel ikkim oohama diinniyyan akkisaass fad illo orr se irraxateshay tayinaas irraxatet sett ashkotin qarqimiyy.
18 paana sedenn akkan lakk,
iyaan oohama diinniyy Moohot inxeerpootta diinniyyu innu dayy;
iyaanno irraxatetanne ashikoshayy kida.
hin lakk kapann irraxatet se innu tura kishshu qimisa qapatta ikkimin fottinnos innu hin kaatta ukeli kersatta akkatta poraayyep feelad kokkunt qintin akkannin.
19 irraxatet hin kiyyashaynoss melihiqet op konkan ellashinniyyanep iqqint kida;
irraxatet hin innu yesusin qafnu,
kaarrata se ilin tarpaann miilot se miilt tallop luumint.
20 Yesus miilot se miilt tallop qum suukum (qeesum) melketseteqep hak parparati suuka suukamma (kaadayt qeesawwa) kodd ootaaynu turaqatta luum.