5
1 suuka suukamma (kaadayt qeesawwa) dahenn otant orr ila pahisamin illo iyaan heka Mooha kodd qarass oot siipat daayyanne laaqqaan juppoti kodin dehasa haayamin.
2 oot iyyat mashshayyi nam tashshot qapu kodd maalla,
orr se ufunat dapenne orr se patandapiyyu mutsurottan tooya fottina.
3 oot iyyat mashshayyessenno tashshampayt kodd maalla,
qum iyyat laaqqaan diissama juppot daasusinniyy oot siipati dehanniyyop oot mashshayyetessenno dehasa iyy fadusinnin.
4 nam qum aronep moohan pahisam pateeshsh aynonno amm serkayn mashshayyi akkanniyyamu.
5 settep kristoosenno suuka suukamma (kaadayt qeesawwa) koddaass amm mashshayyi serka heqeeddademu;
hekoddu male iyyat suuka suukamma (kaadayt qeesawwa) kodda serka akkad,
Mooha se,
"att meetaawu;
antu awi appaaytin kod"
"att qum suukum melketseteqetepa
hak parparatess suuka"
hekidin.
7 helpaan Yesus nam kodd are husslah qara kallaanniyyo,
Mooha se toxt ila iyy dinisa fottinu kapop ullupitt kaanenne ilmaman dinkamad,
fadad;
oot iyyat dippatumin lahaat all iqap maalla Moohot dinkamaayy qara dakay.
8 iyyat meet Mooha koddonno rakkot se iyyat qeeddadenn acacama koll.
9 helpaan heikk kaysaaden kanna orr se iyyi acacamiyyu dahenness dina parparat kodd.
10 sedenn Moohot suukum melketseteqetep kiyyun suuka suukammaat iyy kod.
ikkim orrat amaantet all indiinnin helaan daassam
11 oot lel sedetess iyaan lek innu ishaaminnu kiyy;
hekoddu male oot qall qaapattaann iqoj kodd maalla inni lelaass hursaanniyyan.
12 hak ammannet kollisampayya koddaaten makess;
hekoddu male kollila hirayt heka lel Mooha ikkim nam pil qar oorinu inn kollinninu fadusinnin;
semmaalla aanna inni fadusinnin male amm damaan qimemu.
13 oot nam aanna ukiyyu dahenn meet kodd maalla,
iyaan dikkanne iyaan nayq orikela reeha amm hekollemu.
14 orr damaan qim iyyaa fadusinniyyu lamm orraxaashiyaan akkan dikkanne hin nayq reeha koll kida.