4
1 semmaalla por haysoshayyetep kala irraxatet hin innu qeeddann oot it sanu kaysaatta diitt maalla,
inn ila nam por haysot sedetep kala diinninu kinnaatta tura dahetaynun ihelisannaa.
2 qum se iyyaa lel masmasunt dakayenep innonno hendakayin;
hekoddu male lel se iyyaa dakayen oot iyyaa amaantetin qeeddatta diiyyen maalla amm iyyaa hekoddemu.
3 erkamaayy hak husslah uumameeshsh hiran iyaan kaysaad et koddan nafenno qum se iyyat,
"amm por haysot se antu iyyaa daanninotep kalinanemu henkid miiraawun ashkad" kidep ammannenno innu hin amaanniyy por haysot se Moohot innu daanninotep kalinhinna;
4 oot lashsh tappiyaatess por shokku ilass,
"Moohot erkamaayy dahenn qara lashsh tappiyaate haysad" hekidant tsaafant.
5 lamm por sed ila qar oorin,
"amm por haysot se antu iyyaa daanninotep kalinanemu" kidin.
6 oot orr se lel masmasunt turaqatta dakayenno acacama diiyyen maalla,
por haysot se Moohot iyyaa dayyetep amm hekalenemu;
hekoddu male orr ullop kala it iyyaa daasant karaddu kiyy.
7 semmaalla Moohot "awi" kidaan qaraoor lashsh shakk ulli quur;
sedenno qum se iyyat sapan lek kanna taawit kapin,
"awi inn nassayy dakayishshane,
mutsuraann iij kodatta diiyyaa."
kid ishaamep kida.
8 et iyaasot por haysot iyyaa daatta fott kid,
Moohot amm lakkiyya,
"awi" kidan oot lashsh pilet lelaayemu.
9 sedeeshsh siip moohaatess haysot lashsh sampataatepa kishshu hat.
10 por haysot settetep iyyaan kalin,
qum Moohot erkamaay qara haysadep haysanninan.
11 semmaalla aynonno acacama diitta orr sedetep kiyyu kanni antan sunka tura por haysot moohaatep kala kokkaannaa.
12 lel Mooha iyy kiyyat qaponne iyy erkanniyyu;
pillaw kap lakk qapu qareell iqaarawi kida;
nafsetanne laaffotanne ripaanne laft hak orrikela reehinos quurin;
qaapanne hadat mutsuraalle kishshonno shoyyannin,
horat quurin.
13 uuma Mooha tura dekanniyyu amm apure hekiyyamu;
iyy tura heikk dank patt koddin akkaannin;
innonno iyy turopin dehaanninna,
kaassiyaayyi oorila mitaattinninna.
Yesus suuka suukamma ikkaan
14 semmaalla,
oot innu suuka suukamma ikkaan iyy moontalleel sohad qafnu maalla,
amaanteshaynu dikkinnu qapannu;
suuka suukammaanettetenno (kaadayt qeesawwaatenno) meet Mooha Yesus kida.
15 suuka suukamma (kaadayt qeesawwa) hin innu qafnu tashshoshaynu ila iyy innu mutsuroonniyyu kida;
iyyat paana heikketenn iyy qumaaynop ekkawusam;
hekoddu male amm apure juppot hexerkayyemu.
16 semmaalla,
ikkimin allhattot akkanninnu illo helpaan qarqaarsot innu fadusinniyyo dikkuma Mooha akkanninnos por se dikkuma hin ulla akkaanniyyane sheedda Mooha turop huura male dehaannaa.