Yesus muus qara tawa
3
1 semmaalla inn iyyaan hembanta moontall akkatten kaf miilello!
Yesus se nam hitaym heka amaanteshaynotenne suuka suukamma (kaadayt qeesawwa) kodd qaapadaa.
2 qum muuset man Mooha dahenn talla iyy amaanam koddep,
yesusenno Mooha se iyy hayyotumusiyyess iyy amaanam.
3 qum nam man dihiyyu man se iyyat dihiyyu qareell serka kaan qapop,
yesusenno muus qara tawos serka iyyi fadusinnin.
4 shaakketass manat shokkushokkotayye nam dihiyyu qap;
iyy heikk soorum lamm Mooha kida.
5 muuset ikkim hin ittureesh lelamini maanyet koddinos man Mooha dahenn tallass erhayt amaanam kodd.
6 kristoos lamm man Mooha qarass iyy amaanam kodd,
meet koddaayenn kida.
man settenno innu kida;
innu man sett koddinnu,
etin irraxatet se innu issin eskinninkinnonne infoojinkinnu qimisattan qapanninkinno kida.
haysatta siip moohaati daassam
7 semmaalla qum se laaffot miilot kidishshop,
"awi inn nassayy dakayishshane,
8 helpaan inn lak patpatt kiyyo an ekkawusattene
qum se inn siitan an qari sohattenep,
mutsuraann iij kodatta diiyyaa;
9 appadaann ullass an ekkawusaden;
an baddaden;
iyaan antu par hund afur erkayy akken."
10 "semmaalla dalashot sett olle henjiixi,
'mutsuraaddu lashsh min patindapin;
paanaawonno amm heufunaadenemu' henkid."
11 lamm,
" 'por hayisot se antu iyyaa dayyetep amm kalinanemu!
' henkid
miiraawun ashkad."
12 kafoot,
inn ila ikkim aynonno mutsuraan nayqanne amaana diinniyy,
Mooha ketta nam sekanniyy inqafnaannini illushadaa.
13 sekapeeshsh inn ila namat juppotin sossopaman mutsurooyy iijass inkodannin;
helpaan "awi" kidam hembam haka kiyyaness lashsh mitt orrkorsaa.
14 etin amaanteshaynu hekat turaqatta hak muutaytaat qiminnu qapanno kristoos olle taymampayyan koddinna.
15 sedenno qum se it,
"awi inn nassaayy dakayishane,
helpa tulayyaate qum se inn kodditenep mutsuraann iij kodatta diiyyaa"
kidant tsaafantess kida.
16 kat iyyaan nassaayy dakay illo siitanpayya kodd orrame?
iyyaan muus sinkitt iyyaa kodd kiptse sohad dahenn inhinemu?
17 kat iyyaan par hund afur Mooha miirasan kallaad orrame?
iyyaan juppot erkayy pukkaaddu lak patpatt kiyyu allhat inhinemu?
18 lamm iyyaan acacama diiy pateeshsh,
"amm por haysoshawotep kalihintanemu" iyyat kid iyyaa ashkad orrame?
19 semmaalla iyyaa kala fotta diiyyen,
amaana diittaaddu minan koddaayy akkinkinn.