dina se kaan
2
1 semmaalla se innu dakayin qara shira sunka tura sed qara tawu illushatta innu fadusinnin.
2 lel hin hitaymiyyan lelam shaakket kida;
orr lel sed qar tarpenne acacama diiy horat iyyaa fadusinnishshu qeeddaden;
3 kat etin innu dina sed kaana shikkaarsanninkinnu koddo ashshannin passanninna?
dina sed pold mashshayy turaqatta innu lel;
orr iyy qara dakayenno qar innu qimiyyen.
4 moohaanno lamm ishaakanne yeeshuttaanne shammot hawhawi kishshu erkusisaanne daayy laaffot miilot hasaayyetin qootamenn,
maanyetumaaddu qar qimiyy.
sinkitt por dinaatep innun anniyyu
5 Moohot husslah se ittureesh deyinu innu ootaayy ishaaminkinnu amm ikkim hayyotum hitaymiyya kela kinnaanninu hekodemu.
6 hekoddu male matsaafadda miilot qarass sedep kidam tsaafam,
"att iyy qaapattaass namat maanaa?
ikkim iyy helisannintoss meet nam maanaa?
7 jawshayesseeh hitaymiyya kannaatt qojitt;
sawtet serkaatenne heka aypila qari haayt;
[erkama harkaayt qarassenno iyy hayyotumusitt]a;
8 dahenn hayyotumaayy kelas ikodit.
helpaan iyyat dahenn hayyotumaayy keli ikkodiyyo,
iyaan iyyat hayyotumaayy keli koda male hattiyy amm hekiyyanemu.
hekoddu male ammann heikk hayyotumaayy kanneett kiyyaataaddu amm sanu henxakkinemu.
9 ammann lamm Yesus se dikkuma moohaatin oot nam dahenneti toy jawshayyeseeh hitaymiyya kannaatt kinnaad rakkot toxt qeeddattaayn sawtet serkaatenne heka aypila haayadin akkin.
10 Mooha hin heikk iyyassenne iyyin uumamen,
medda lek por serkaatep deyusisaass,
Yesus se dinaaddu hirayta kodd ikkim rakkot qeeddattan,
iyy haasutta dap koddinu kodot iyyi fadusiyy.
11 iyy nam miilampayt kodusinniyyonne orr iyyi miilampayya koddenno medda appa shokkoohat kida;
sedenn Yesuset,
"kafaawu" kida iyyaa hembaass amm deesawiyyamu.
12 semmaalla matsaafadda miilot,
"mahhaaytin kafaawu lelina;
otant orr amaaniyyu ilassenno laaletin hed aypisannina" hekidin;
13 settep lamm,
"amaanteshawu iyy qarassin haayannina" hekidin;
lamm,
"toare ananne meddaan Moohot ani dayy aren kinn" hekidin.
14 semmaalla meeddaayy iyyaan sohaanne diik qap koddaaddonn yesusenno qumaaddop nam kodd;
iyyat maalla sedep kodd,
toxshayin taapiloos se toxt qari hayyotum qapu allipatisaass kida.
15 lamm orr se toxt tura huuran aylum toxt kela hak kiyyashaddot kallaanniyy qayaass kida.
16 hinnat Yesus hitaymiyya hesa kodda male mayt aprihaami hesaass kida;
17 semmaalla heikketenn qum kafaayyetep kodda iyy fadusinnin;
paana sedenn juppot siip all uushuqa maalla suuka suukamma (kaadayt qeesawwa) iamaanam Mooha erkanniyyu kodd.
18 iyyat mashshayyi ekkawusam illo rakkot qeeddad maalla orr se ekkawusamiyyu qarqaara fottina.