wottaattar Yesus iyy amaanam koddan rakkot qeeddatta
2
1 att ammann meetot,
has dikk se Yesus kristoosin kiyyun kokkaadu.
2 lamm kollila hin att maanyet lekit ilaashsh an qara dakayt,
orr pil iyyaan kollisa fottinanne amaanam harki haayii.
3 wottaattar Yesus kristoos iddikkap koddan an olle rakkot qeeddadu.
4 nam wottaattarumin erkanniyyu se sinkitt tor kodd masmasusisaass idikkisad kodda iyy fadusinnin male,
hin erkama wottaattarum kodda diiyyenn amm issakaaliyamu.
5 lamm nam feelanta feeliyu et halitt feelantaanett qari feela diiyo,
amm qoyqoyt inpusha akkanniyyamu.
6 peehampayt hin tashshiyu orr qundaan damiyu ila iyy turi qattiyu kodda fadusinnin.
7 oot poldat akkan heikketenn qalliqaapatta hedi daanninu maalla,
hin antu kidiyyu dikkiy qalliqaapadu.
8 Yesus kristoos se toxt ila sohad,
hotta taawit kodd qaapadu;
lel masmasunt se antu leliyonno hin iyi kida.
9 lel masmasunt sed lelaawonn qum nam erkamaan nayq erkanniyotep hidamaannin rakkot qeeddataalle kiyy,
hekoddu male lel Mooha amm hidamiyamu.
10 semmaalla,
ikkim iyyaa dina se Yesus kristoosin kiyyonne serkaan muutayta dap akkanninanessin,
oot orr se pahisam maalla heikketin duupattan qimin.
11 lel hin,
"etin iyy olle toino,
kiyyatannin iyy olle kallaanninna.
12 etin duupattan qimino,
iyy ollenn daamuminna.
etin iyy maramanno iyyat innu marimina;
13 etin amaana diinno,
iyyat iamaanam koddina kallaannina;
amm mashshayy immarma fottinamu" kidiyyu iamaanam kida.
erkamampayt qim
14 sed iyyaa qaapusiyyii;
lel minannenno ikkim iyyaa ollennin jiiannin Mooha turi qimiyii korsii;
jiiayta hin iy awutadap illo orr se dakayiyyonno allipatinniyu kida.
15 erkamampayt amaanam lel shaakket qaap pahin ishaamiyyonne deesawa diinniyyop koddii illo Mooha iddehasa kokkaadu.
16 lamm ishaamaan awtadap Mooha serkisot uqqalle teek ketta all sekaadu,
ishaamaan hinep kiyyin qapamot ikkim namat Mooha ketta all sekaanninoss koyin.
17 ishaamaaddonno peesat siitawshop paldaannin.
iyyaa ilanno hemenewosenne filitsos kiyy.
18 orr hin,
"orr raaw turann toxt ila sohaden" kidaan,
paana shaakket qara qishshawen,
amaantet orr shokkotenno allpatinnin.
19 hekoddu male sheeht Mooha hin sesseya diinnishu,
qimaann kallaannin;
sheeht se qallenno maatam,
"Moohot hin hekooyy kodd heup" lamm "nam mahh Mooha hembiyyu dahenn nayqunt ketta hesekaadu" kidiyyu kiyy.
20 man kaan talla mehaddaan kiyy,
iyyaan worqetanne pirret ila sorumameeh kodda male mehadda qoyranne huss okkot ila soorumamenno kiyyan;
mehaddaan ila pakatiddu erkama serkaatess,
pakatiddu erkamaan serka dapess koddin kida.
21 et namat erkama hinep kiyy qara immiiliyyo,
mehadda serka iyaan miili,
erkamaan dikk dahennessenno dikkisad,
poldaayyessenno seninu koddina.
22 att lamm hadat helum se nayqat ketta all feeladu,
orr se mutsuraan miilin pold hembanniyu olle tsillumanne,
amaantetanne,
hoxsuntanne,
andot qimisadu qapadu.
23 lamm shiitta eepumatenne hin awtadap ikkim siitan deyinan ufunaadu illo ketta allisekaadu.
24 erkamamapyt pold heka Yesus iyy nam heikketess dikk,
kollisaassenno ikkayiyu,
duupattan qimiyyu kodda iyy fadusinnin male,
amm iyy siitan deyiyyu kodda iyy fadusinniyyamu.
25 orr se iyy qar hittinniyonno iyy dikkuman pahinniyu kodda iyy fadusinnin;
shoke Moohot ikkim shaakket ufnaanninan juppot qara mitaatinaness iyyaa kodina.
26 paana sedenn mutsuraaddu iyyaalli oorinan illo iyyaa urkupaan taapiloos ikkim hasayy kaysinninan iyyaan qap kela passanninan.