hitaym bawloos lakkiyya
tsimotoosess
1
1 bawloos se hinnat Moohaatenne irraxatet kiyyat se Yesus kristoosin akkaattin nam hitaym heka Yesus kristoos kodd kapa
2 hed meetaawu se hoxsasham tsimootosess,
Mooha appaanne poldaaynu Yesus kristoos kapa has dikkanne mutsuroottaanne andotanno hedi koddenii.
korsa tsimootosi daasam
3 helpa min kallapanne awadd antu Mooha dinkamiyyo hedin immashsh oorsannin illo,
Mooha se qum appadaawotep qaap miilin antu iyy erkanniyyu aypisannin.
4 etin ilmamaatt immashsh oorsanniyo ikkimin ikkaan masmasinossin hed akka hadannin.
5 amaantet shaakket se att qaftunn immashsh oorsannin;
amaantet sedep kishshu turaqattaass ahoshayt loyitenne inkoshayt ewuniqenno heqapan,
hedenno lamm qafnaattaayt henxufnaad.
6 semmaalla helpaan antu harkaaw hed qari qape,
daayy Mooha se att akkaatt hed ila kiyyu ikkim sed qara tawuninnintu sossohashinnintossin hed qaapusinnin.
7 Moohot laaffot irrotatenne hekat hoxsuntatenne,
hekat ittur tooyattaat innu dayy male,
amm laaffot nahamaatemu.
8 semmaallla oot poldaaynot maanyet koddaassenne an se hidamin deesawa diiyii;
hekoddu male irrot se Moohot hedi daanniyun oot lel masmasuntat an olle rakkot qeeddadu.
9 iyy se innu diniyy miilumassenno innu hemb Mooha kida.
sedenno qaapayyenne dikkumooyann male amm qum erkamaannotessemu;
dikkumayinenno sapanat dihama hira turann Yesus kristoosenn innu daassamen.
10 dikkuma moohaatenno dinsampaytaannu Yesus kristoos deyaan ammann hexakkaaden.
iyyat irrot toxtat allpatiyy illo lel masmasuntatin kiyyat parpar se toxt uqqalle teekit innu akkiyy.
11 moohanno iyy lel masmasunt sed eeshshiyyonne nam hitaymatenne kollisampaytass kod an maakumisiyy.
12 antu rakkot sedenno qeeddanniyyu sed minann kida.
hekoddu male oot antu se antu amaaniyyu upu maalla,
amm indeesawinhinamu;
se an harki haayamenno hak awsettetess ikkim iyyat lusha fottinu henxufnaad.
13 se att an qara dakayt,
paahnat kollila shaakketat kodd illo amaantetanne hoxsunt Yesus kristoos kanni aanii;
14 laaffot miilot se innu qalle kallaannishshonn hin dikk hed harki haayam lushadu.
15 hin huss issiyaate kiyy dahenn an ketta allkiddaaddu heufut;
iyyaa ilanno fikelusenne hermokenes kiyy.
16 pold,
orr man onesforeti mutsuroodu;
maana maalla helpa lekess iyyat an kokkokkiye;
hidamawonnenno amm hedeesawemu.
17 laaddu helpaan iyyat roome paiye an fad fad illo an akk.
18 lashsh muutaytaate pold iyy mutsuroodu;
helpaan antu efesoone kiyyo ashshann ikkim iyyat an qarqaar att hedikkitt ufta.