korsa kristaana daasam
5
1 qimaayt qum appaytetep kors male tusha diiyyii;
helitt diida qum insharanne ankasatep,
2 iskatt qimaayya qum inkawaatep tooyii;
settep lamm talmaanne iskatt namaxashiya kiyy qum alawtadaatep mutsuraan miilin tooyii.
3 iskatt irshada qarin raawen,
rakkanniy serkiyyii.
4 iskattet irshat qarin toy et medda shoke opopada qafnaatto,
medda hin turiqatta lemooddu qarqaaran Mooha erkasa kollenii.
paana sedenn lemmoddosenno haarot orinninan;
hin Mooha turass iyyaan dikkane iyaan hoxsasham kida.
5 iskattet irshat qarin toy shaakketi iteeh kallaannishshu,
irraxateshadd Mooha qarass haayanin,
illo helpa mitt qarqaarsa Mooha qara dinkamattan fadattan qimin kallaanin;
6 it masmasunt husslah hoxsaannishshu lamm it erri toxt kida.
7 haasutta male ikkim kallaanninani acaca sed iyyaa dayyii.
8 lamm namat iyyann hekkaay koddes karakutt orr manayyeti iyy qaapatta diinniyyu et koddo,
iyy amaanteshay haim kida.
laaddoss nam se amaana diinniyyu qareellanno iyy nayq kida.
9 iskattet irshat qarin toy et maskap qari tsaafamishshu koddito,
paraadd par hund leh kannaatt kodda diiyyu;
itanno aat nam shokkooh kodda it fadusinnin.
10 medda kammisanne kessuma qeeddatanne lukka miilampayya jiqaanne orr rakkanniyyu qarqaaraanne erkamaan dikk dahenn erkasan it ufunashant kodda it fadusinnin.
11 iskatt irshada qarin raawen illo meum qap,
hadat sohaaddu iyyaa pushan hoxsunt se iyyaa kristoos qapan helpaan iyyaa all diinniyyane oot iyyaa aatuma fadiyyan maalla,
maskapa qari tsaafa diiyii.
12 iskatt hin kakaan iyyaa turiqatta kristoos olle kalen oot iyyaa allpulpuliyyan maalla,
horatann iqarop deyin.
13 lamm erkama erkasa diitta kollin;
erkama erkasa diittaah kodda male,
iyyaan man kel antan nam keyiy,
heka nam qallep kaliyanne iyaan iyyaa ishaama diinnaayen ishaamiyy koddin.
14 semmaalla iskatt irshada qarin raawen illo meum qap ikkim aatuminan,
medda haayinan,
manaddonno ikkim seninninan peashinninanessin iyyaa koorsin;
sedenn olishshat paana iyyat mahhaaynun patinninu dapina.
15 sed tureeshshanno iskatt karatiddu iyyaan irshada qarin raawen seetsan kanni antaann paana amaantet qalle all sohaden.
16 iskattet amaanishshu,
et iskatt irshada qarin raawen orraadd ila kiyyaadane,
ikkim iyy maapar kirstaanatess haisot inkoddini iyy qarqaartu.
paana sedenn maapar kristaana iskatt irshada qarin raawen,
hesaym dapeeh qarqaara fottina.
17 qimaayaan paana dikkin peashshinniyy,
karakutt hin lel Mooha lelaanne kollisan tashshiyy,
serka kaan iyyaa fadusinnin.
18 maana maalla,
matsaafa miilot,
"horm se uunt mijjirinniyu kap hida diiyii."
settep lamm,
"hin erkanniyyass heriy erkamooddot iyyaa fadusinnin" hekidin.
19 maanyet lakk shoke halpatt qari dehaatta male,
kisset qimaayt maapar kristaana qari dehaannishshu qeeddatta diiyii.
20 orr shokku ikkim nahinaness hin juppot erkanniy nam heikk turi tushii.
21 akkan shokkooh naf qari quura,
shoke por shokkoohap kellisa male,
ikkim dahenn erkannintossin moohaanne Yesus kristoos poldanne hitaymiyya Mooha hin pahisam turi hed korsin.
22 erkama moohaati hitaass shakar kida nam qari harkayt qapa diiyii,
orr pil olle juposhaddu qootatta diiyii;
mashshayti miiluman illuushadu.
23 oot kardaytetenne baaqaayt se hedi hahhayiyu maalla,
woynet jawshadd uki male,
ittureesh haq patt uka diiyii.