kollisampayya eerpa
4
1 laaffot miilot lamm patipahinnin illo sedep kidin,
"helpa muutaytaate orr shakkan laaffot patin nam dapusinnishshonne kollila qayy kanni antaann amaantet alldiinninan."
2 kollila hinep kiyy deyiyan,
ippeepampayyaan eerpa ishaamiy,
qaapaaddu afa silf doohin waatsam shikamoodep kiy kapa kida.
3 orr hin orqeedda dawurin,
illo orr se amaaniyanne shaakket uponno Mooha aypisattan ikkim daminan,
hin Moohot um "dama diiyyaa" kidan dawurin.
4 hin Moohot um dahenn oot iyyaa iyaan dikk kodden maalla et namat aypilan qeeddado iyaan all kashamiyy amm hekiyyanemu.
5 maana maalla,
lel moohaatenenne dinkamann iyaan miill kodin kida.
erkamampayt kristoos iddikk kodda
6 et sed kafaayit kollito,
lel amaantetatenne kollillaan dikk att kanni annishon kamhint illo erkamampayt Yesus kristoos idikk koddint.
7 lamm torroot ahhaawa se awita dafit Mooha serkisot uqqalle teek ketta sekaadu illo Mooha hura ikolliyyii.
8 dakint ikkim qimintu kollisot iqojeseeh koddin.
Mooha acacaman kallaattot lamm ammannessenno kiyyat se paarre deyishshossenno oot iraxatet uqqalle kishshu maalla,
heikketess koddin.
9 lel hin lel shaakket iyy namat dahenn qeeddatta fadusinniyyu kida.
10 sed maallan hak muutaytati tashin sotina;
settenno oot innu Mooha kiyyat se nam heikk dininniyyu,
karakutt lamm se orr amaaniyyu dininniyyu qari irraxatet hayanninkinnu maalla kida.
11 hin acac koliyyii.
12 meumaayt minan namat hed intuffannin;
laddoss ishaamanne qaapanne hoxsuntanne amaantetanne miiluman orr se amaaniyyoss pahnat kodd.
13 hak antu deyinu matsaafadda miilot siip warusisaanne,
korsaanne kollisaassenno kokkaadu.
14 helpaan himat hedi lelamenne qimaayya maapar kristaana harkaaddu hed qariqapenne daayy Mooha se hedi daasam immashshi patisatta diiyyii.
15 kaanusaatt ikkim nam heikketi akkaanninaness sed qari qimii,
illo lashsh mitt erkayyii.
16 kollilaattassenne mashshayti iluushadu,
sedennenno qimii;
et sedep kodito,
mashshaytenno orr se hed qara dakayiyonno dininninta.