sinkiyya maapar kristaana
3
1 nam shokku "et sinkitt maapar kristaana kodda fadiyyo,
erkamaan serkisam hadannin" lel hin kidiyyu shaakket kida.
2 semmaalla nam sinkitt maapar kristaana koddinu,
iyy haasutta dap,
aat shakkaah qapu,
minaxash kallaanniyyu,
illuushanniyu,
paana pahin kallaaniyyu,
hayyitt qeeddanniyyu,
kollisa fottiyyu,
3 iyy taarootta diinniyyu,
qappannayt,
jiiatta diinniyyu,
shiittamatta diinniyyu,
hoxsunt kodashshet dap,
4 nam orr manayy paana pahin pexashshisa fottiyyu;
meddaayy nam serkinniyanenne iacacamiyan kodda iyy fadusinnin.
5 namat et orr manayy dikkisa peashshisa fotta diinniyyu koddo,
maapar kristaana heka Mooha ashshann pexashisa fottina?
6 an tawa kidan innaakottan qum horat taapiloos qari quurantep,
horat qari quurama tura,
kristaana awshitt kodda diiyyu.
7 haasuttaanne urkupa qayy qalli sunka tura,
orr se amaana diinniyyu kapeshsh mahh dikk qafnaatta iyy fadusinnin.
taaqonawwa
8 taaqonawwa lamm iyyaan hoisashamenne serkisam,
kap lakk waara diiniy,
ukot lekisa diinniy,
kodashshet olle hanhama diinniy kodda iyyaa fadusinnin,
9 settep lamm shaakket amaantet se ufunashant qaap dikkin lushanniyy kodda iyyaa fadusinnin.
10 iyyaanno turi qata hetooyamenii,
illo iyyaan haasutta dap et koddane erkama maapar kristaana hexerkayenii.
11 settep lamm inkawa manadotenno iyyaan serkisamenne nam keya diinniy,
minaxash kallaanniy,
akkan dahenenn iyyaan amaanam kodda iyyaa fadusinnin.
12 taaqonawwa lamm iyyaan aat shakkaah qap,
meddoddonne orr manaddotenno paana dikkin peashshinniy kodda iyyaa fadusinnin.
13 erkama maapar kristaana iyyaan paana dikkin erkanniyy serka kaan akkanninan;
amaantet se Yesus kristoosin kishshu lelaassenno amm huurra qafnaanninanemu.
shaakket amaantetat
14 hed kapop shakar kida deya irrayaannin sed hedi tsaafin.
15 etin olado lamm,
man Moohot ulli kallaanniyyu tallass ikkim namat ashshann kallaanninu ikkim ufunaannintossin hedi tsaafin.
man settenno maapar kristaana heka Mooha se kiyyat qapot.
setteno qapayyaanne sheeht shaakket kida
16 shaakket amaanteshayinu hin dekant shurshura male it kaant kida;
sedenno Moohot:
"patpah nam kodd,
shaakketumaayyenno laaffot miilotann ufinasham;
hitaymiyyan akkaad,
siip dahenni eeshsham,
orr husslah qara kiyy iyy amaanen,
moontalleel serkan sohad."
se kidiyyu kida.