dinkam kristaana
2
1 heikk turi qattisan ikkim Mooha dinkamanne fadattaanne oot orr pilati dinkamaanne aypila oot nam daheneti kodintanessin inn korsin.
2 sedennenno Mooha huuranne mutsuraan dikkann ikkimin andotanne tulaya male kallaaninoss,
sed qareell lamm daamadaassenne orr se hayyotum qapu dahenni dinkamaa.
3 hin dinisampaytaynu Mooha turas iyaan dikkanne iyy masmasusinniyy kida.
4 has Mooha ikkim orrat dahenn dinaninanne shaakket ufunaanninaness kida.
5 Moohot shokkooh;
iyy otant Moohaatenne heka nam ila kinnaanniyu ollin araarsiyonno shokkooh kiyy;
iyyanno se nam kodd Yesus kristoos kida.
6 iyyat nam dahenn juppot kela sohashisaass qaxama itarpiy dayy.
sedenenno et hooraan iyyat qap paxane ikkim Moohot orr daahennn dinisa fad akkinin.
7 ananno maanyetum sedess eeshshampaytanne nam hitaym koddan orr ayhuta kodda diiyess amaantetanne shaakketi kollisampayt kodda hitam.
hin antu ishaamiyyono shaakket male amm eerpaamu.
8 sedeeshsh diida hin por heikete kiyy jiiaytaanne tulaya male ikkim harkaan miil dinkami erreel qapanninanessin fadin.
9 settep lamm iskatt mashshaddu soromataann shoke worqetann shoke pirdaan tsorenn shoke uuwaat tsortenn isira koda male,
etantumanenne dippatumann uwashshet senishshu uwadenii.
10 iskatt "moohan amaanin" kidiyy qum it iyyaa qara fadamishshu mitt erkamaan dikk erkasan issirenii.
11 iskattet rui kidaanne acacaman kollitu;
12 iskattet rui kida it fadusinnin male diirt kollisa shoke diirt qari hayyotum qafnaatta amm idaanninkiyyamu.
13 maana maalla,
turi qattaass ataam uumam,
ukanna hewaan uumant.
14 lamm hin patin daftenne acaca Mooha qar tarpit,
iskattet male amm ataamemu.
15 hekoddu male iskatt amaantetanne hoxsuntanne miilumanne etantumann et kallaatto,
medda haayaan dinint.