hitaym bawloos shokkiyya
tsimotoosess
paanussa
1
1 bawloos se acac dinnsampayitaayinnu heka Moohaatenne heka irraxateshaynu heka Yesus kirstoosin nam hitaym heka Yesus kristoos kod kapa,
2 hed tsimootos se amaantetin meetawu shaakk koddess,
apaayinu moohaanne poldaaynu Yesus kristoos kapa has dikkanne mutsurotaanne andotanno hedi koddenii.
kollila eerpa qara illushatta
3 helpaan antu meqtooniyaap anniyyo qum se antu hedi lelep,
ikkim orr shakkan kollila eerpa inkollinnini efeson laddii.
4 torrotanne dihhaasa mayt hin muutayt dap qallep ikkim iyyaa inkallin acacii;
hin shiittaan deyin male erkama Mooha hin amaantetin erkawsamiyyass amm koddiyyanemu.
5 qaap acac seddetenno hoxsunt mutsuraan miilenne,
qaap dikkanne amaantet shaakketi ila akkaannishshu kida.
6 orr shakkan sed ketta all reehaden illo por shiitaan qunda dapetep mitaaten.
7 iyyaa sedep kodiyyan,
kollisampayya halitt kodda fadaan kida;
hekoddu male iyaan iyyaa shaakket kidyyanenne ishaamiyyan amm heupanemu.
8 et namat paana dikkin inxerkayyo,
halitt ikkim idikk kodd henxufn.
9 settep lamm halitt soorumam,
orr didikkass ikkim kodda diiy henxufn;
halitt sorumam,
orr se halitt qeppinniyyanne siitampayaanne orr Mooha huura diinniyyanne juppampayaanne miilum dap,
hin heka Mooha kodd tufanniyy,
hin appaddonne inkotaddu ikanniyyassenne kiyyat nam patinniyyassenne,
10 arpalayyaassenne diidaan diida olle arpalumiyyassenne orr se nam kashiyyassenne eerpampayyassenne,
hin eerpa ashikanniyyassenne orr se kollilaan paah kettaashsh akkan hawi kiyyu erkanniyyass kida.
11 kollila shaakket lamm akkaanniyan,
lel masmasunt se oot serka Mooha se aypisam leliyyu ila kida.
lel masmasunt sedetenno ikkimin lelinoss an harki haayam.
aypilaan bawloos oot dinila moohaati dehay
12 oot iyyat nam amaanami an dih illo erkamaayyi an maakumusiyy maalla poldaaynu Yesus kristoosin se irrot ani dayy aypisanninkiyy;
13 sed tureeshsh antu iyy kristoos otiyyonne kann arinniyyonne iyy deesanniyyu koddu nafenno,
iyyat anni mutsuroottayyen all ani diiyy;
settenno,
oot antu ufunaata diiyyenne amaantet dap maalla kida.
14 has dikk heka poldaaynu heka Yesus kristoos amaantetanne hoxsunt olle purinatann ani daassam.
15 "Yesus kristoos juppampayyaa dinisaass husslah qarop deyy" lel hin kidiyyu,
shaakketatenne namat dahenn ikkim qeeddanninoss iyy fadusinniyyu kida;
juppampaya ilano karakut iyy jupampayt kodd an kida.
16 hekoddu male,
iyyat maalla an mutsurodenno,
duupattayy se heel dap an se jupposhiyu juppampaya dahenn qareell kishshu akkisaayenn orr iyy amaaniyyonne kiyyat parpar akkanninass ikkimin paahnat kodinos kida.
17 semmaalla Daam parpar,
se toya diinniyyu,
se akkaatta diinniyyu Mooha se iyy shokkooh koddess serkanne aypila hak parparati ikoddenii,
ameen.
18 meetoot tsimootos,
qum him se tureeshsh ootaayt lelam qarass ikkim adant dikk adintosin hed acacin.
19 amaantetanne qaap dikk qafinaaduu,
orr shakkan qaap se dikk alldiiyen illo qum konkot kotan tuquuramin patiyop amaanteshaddun allpaten.
20 otanshaddu qalle hermenosenne iskintiroos kiyy;
ikkim iyyaa Mooha qari otitta lela qara ilushata kollinanessin seetsani iyyaa tarpiyy dayy.