korsa erkamampayya daassam
6
1 mahh Moohaatenne kollila hin ikkim inxotamines,
aylamma poldallaaddoss serka dahenn ikkim fadusinniyyan qaapadenii.
2 aylammaan poldalla amaaniyy qapa,
Yesus kristoos poldin oot iyyaa kafaaddu kodden maalla,
he iyyaa tuffatta diiyyenii;
sekapeeshsh oot iyyaa orr amaaniyonne kafaaddu iyyaan hoxsasham kodden maalla,
se turi qara tawnisan ierkayyenii.
kollila eerpaatenne shorokum shaakket
hin kolliyyii illo korsii.
3 nam kollilaan pah heka Yesus kristoos heka poldaaynu hin Mooha acacama olle seniy alldiittan kollilaan haw kiyy kollinniyyu et kinnaado,
4 nam hin foojann innaakod;
amm akkan shokkooh naf heupamu;
hekoddu male shiittaanne jiiayta hoxsaannin;
hin ilanno maxashanumanne,
siitaanne,
otittaanne,
kexemaan nayq hoxsaannin.
5 orr hin iyyaan qaapaaddu qara nayqaadenne shaakket turi pattenne shiitta alldiitta diinniy kida;
orr sedep kiyyoss Mooha acacamot paana shorokumin akkattaatep iyyaa kinnaan.
6 nam se,
"hin antu qapu an kayinan" kidiyyoss lamm Mooha huurot shohot kaant kaant akkatta kida.
7 are husslah qarop amm akkan shokkooh nafenn hendeenemu;
husslah qara akkan shokkooh naf innu qapanninnu inxanninnu amm hekiyyanemu.
8 iyyaan innu daminnonne uwanninnu etin akkano innu kayinan.
9 orr shorohot kodda fadiyyu lamm ekkawsamaann sunkinan;
urkupa hadat se lekit awta daft nam nayqinnishshonne allpatinnishshu qalless qapaminan.
10 kodashshet hoxsattot nayqunt heikketess hittin kida;
orr shakkan shorokum hadattaann paana amaantet qara sunken illo baaqur lekin immaden.
korsa bawloos tsimotoos dayy
11 att lamm nam moohaatello!
hin ketta allfeeladu;
tsillumaanne Mooha huuraanne amaantetanne hoxsuntanne duupattan qimaanne dikkuma kanni antaa qimii.
12 adant amaantet se dikk adii;
kiyyat parpar se att ihembant qapadu.
kiyyat settenno se att maanyet lekit turi maanyetum shaakket daatt kida.
13 Mooha se heikketi kiyyat daanniyonne Yesus kristoos,
se bentsenishsh bilaatsoos turi maanyetum dikk lel turassin hed acacin.
14 hak poldaannu Yesus kristoos deyinos patandapaanne tuuhama male acaca sed lushadu.
15 dexemaayanno,
lashsh se iyyeeh mashshayy iaypisamenne iyy shokkooh pexashisampayt koddi,
Daam daamada,
pold poldalla qapad qarass koddint;
16 iyy toya diinniyyu iyyeeh kida;
iyyat attummat op raantop dehaatta diinniyyan ila kallaannin;
nam shokkooh naf amm iyy heakkemu;
nam iyy akka fottinonno amm hekiyamu;
serkaanne irrot parpar iyy koddenii;
ameen.
17 shoroht husslah sed ikkim iyyaa infoojin shoke shorokum se tarpinu qarass irraxateshaddu ikkim iyyaa inhaayannin acacii;
sekapeeshsh Mooha se ikkimin inmasmasinnu akkan heikk purunnatan innu daanniyyu qarass ikkim irraxateshaddu haayanninani acacii.
18 lamm ikkim erkamaan dikk erkanninan,
erkamaan dikkannenno shorokuminan,
nami daattaassenne hin iyyaa qapan qara nami qootaasenno dikkisaninani acacii.
19 paana sedenn kiyyat shaakket akkattaas shorokum se sheeht qint qapu sapan se deyiyyoss orqari tooranninan.
20 tsimootosello!
hin hed harki haayam lushii;
shiittaanne ishaamaan awuta dap,
Mooha serkisot uqqalle teek,
eerpaan ufunatap kinnaanniy ketta all sekaadu.
21 orr shakkan,
"ufunat sedep kishshun qafn" kidaann paana amaantet qalle all sohaden.
has dikk heka Mooha inn olle kinnaadu.