pawlos Mooha innu dinkamaa kid
3
1 muutaytaass kafoot!
qum se it inn kapi kodditep,
lel pold ikkim shakar kidinu qall paldaanninossenne serkisaminoss Mooha innu dinkamaa.
2 iyyaan lelaayy dakay dahenn amm amaaniyanemu;
semmaalla ikkimin orr qaap kell qaponne orr nannayq kela passanninu Mooha innu dinkamaa.
3 hori poldat iamaanam;
iyyat inn qiminnina,
iyy se nayq kelanno inn lushina.
4 ammanenno koddo ittureeshanno iyaan innu inn acacinkinnu ikkim kaysinnintaness poldat ikkimin amaantet inn qari kashanninnoss innu kod.
5 pold mutsuraann por hoxsunt se Moohot inn qapotepanne por duupatta se kristoos akkiyetep mitaattiyu.
kokkilaan oot erkamat daassam
6 kafoot!
inn ila iyyaan erkama erkasa diinniyyanne qum kollilaani innu inni lel mitt kallaatta diinniy ketta ikkim reehannintanesin mahh pold heka Yesus kristoosin inn acacin.
7 maana maalla,
pahnashaynu kanni ashshann anta ikkim inn fadusinniyyu mashshayness heufutan.
helpaan innu inn olle kinno amm erkasa male henkallaannemu,
8 amm patt dama nam hendannemu,
se kapeeshsh inn ila aynu qarasseno haisot kodda turan kallapanne awwadd erkaman kokkaann.
9 innu maalla sedep kodin,
ikkim inn pahanashaynu kanni annintaness male,
amm inn kapa qarqaarsa akkatta hayyotum dapaaynonnemu.
10 helpaan innu inn kapa kinno,
"nam erkama erkasa diinniyyu dama diiyyu" henkidin inn acacin.
11 innu maalla sedep kidin,
otanshayin ila iyyaan erkama erkasa diinniyyanne hin iyyaa rakkusisa diiy ilop kaliyy illo orr pil rakkusinniy kinnaataaddu oot innu dakayn maalla kida.
12 orr hinep kikkiyy ikkim dui kidinan erkamooddu erkanninan isin peashinninanessin mahh pold heka Yesus kristoosin iyyaa acacin,
korsin.
13 inn lamm kafoot!
erkamaan dikk erkasa tashsha diiyyaa.
14 nam korsa hitaymaaynu sed innu inni daann qeeddatta diinniyyu et kinnaado,
dikkiyyaa toyaa,
ikkim desawnu iyy olle kinnaata diiyyaa.
15 hekoddu male,
qum kafittatep tusha male olishshap diha diiyyaa.
16 pold andoti,
paana heikketenn helpa mitt andot inni dayyu,
pold dahetaynin inn olle kinnaadu.
17 paanussa hin an bawloos harkawun tsaaf,
hitaymaawu dahenn sedenn ishahamannin.
antu tsaafiyyonno sedep kida.
18 has dikk heka pold heka Yesus kristoos dahetaynin inn olle kinnaadu.