hitaym bawloos lakkiyya
orr teseloonqetess
1
1 maapar kristaana sapara teseloonq hin heka Mooha heka appaaynotenne heka pold heka Yesus kristoos koddess,
bawloosenne silaasenne tsimotos kapa hitaym hitam.
2 Mooha appaanne Yesus kristoos pold kapa has dikkanne andot inni koddenii.
horat se dexema kristosse quuramintu
3 kafoot!
inn minann helpa mitta Mooha aypisatta innu fadusinnin;
innu maalla aypisanninkinnonno,
amaanteshinn kaanan antaadenne hoxsunt inn olli qaftan padawamaadenn kida.
4 semmaalla rakkotanne miidama se inn qari paiy dahenn ila,
oot inn duupannishshanenne amaantetin qimishshan maalla,
otant maaparadda kristaana ilan kinnaann innin foojiin.
5 hin dahenn horat Mooha shaakket koddaaddenne daamumaayy se inn maalla rakkot qeeddannishaness iyyaan kayiy koddaayn akkinnin.
6 oot Moohot horat pahit quuriyyu maalla,
orr rakkotin inn qari deyiyyu qarass rakkotin deyan heriyaaddu iyyaa daannina.
7 ammann inn iyyaan rakkot qeeddanniy helpaan Yesus poldat hitaymiyyoyy irrampaya olle moontalleett deyiyyo innu olle inn haysinnina.
8 iyyat moontallett akkaanninonno haalayit apittaten kida.
helpaanette iyyaan Mooha ufunaatta diiyenne lel masmasunt heka poldaaynu heka Yesus acacama diinniy qarass horat quurina.
9 iyyaanno pold turanne serka irroshayy ketta reehaminan illo horat patet parpar iyyaa qari quuraminta.
10 horat hin iyyaa qari quuramintu,
lashsh se poldat miilampayyan serkisamaassenne hin amaaniy dahennin shammawsama deyiyyo kida;
lamm oot inn maanyetumaaynu qeeddatten maalla,
iyyaa olle dihamintan.
11 sed qaapattan innu maalla orkanna mita male ootaayni dinkaminkinnu,
moohaannu ikkim iyyaan hembantaayyi kay inn kodinonne has se inn erkamaan dikk erkasa qaftanenne erkama amaanteshayn dahenn ikkim irroshayn inni kaysinninoss kida.
12 settep lamm mahh poldaaynu heka Yesus ikkim innin serkisaminossenne innanno lamm dayy moohaaynotenne heka poldaaynu heka Yesus kristoos mitt ikkim iyyin serkisamintanessin Mooha dinkamin.